လါအီကူး ၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် တီအူကီၢ်ရ့ၣ် သၣ်တီၣ်ကၠံကီၢ်ဆၣ် ယၤဒိၣ်ဟီၣ်က၀ီၤအပူၤ စးထီၣ်ဖဲအပူၤကွံာ်လါယူၤလံ ၁၁ သီ အနံၤန့ၣ် တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤဒီး ဖဲန့ၣ်၀ံၤလီၢ်ခံသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ ယၤဒိၣ်ဒီး သ၀ီလၢအိၣ်တၢ်ခိၣ်တၢ်ဃၢၤဖဲန့ၣ်အိၣ်၀ဲ(၃၃)ဘျီအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါယူၤလံ ၃၁ သီ အနံၤန့ၣ်လီၤႉ
တၢ်ဒုးကဲထီၣ်လၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ၀ံၤလီၢ်ခံ ဖဲလါယူၤလံ ၁၂ သီ အနံၤ ကဘီယူၤဟဲခးလီၤတၢ်အိၣ်(၂)ဘျီႇ ၁၈ သီအနံၤန့ၣ်(၇)ဘျီႇ ၂၂ သီအနံၤန့ၣ်(၁၃)ဘျီႇ ၂၃ သီအနံၤန့ၣ် ဟဲတ့ၢ်လီၤ၀ဲ(၁၁)ဘျီ ခဲလၢာ်ဟဲခးလီၤတၢ်အိၣ်(၃၃)ဘျီညါအဃိ ယၤဒိၣ်သ၀ီဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ် တၢ်ဘူၣ်တၢ်ဘါတၢ်သူၣ်ထီၣ်ဃုာ်ဒီးကမျၢၢ်အဟံၣ်အဃီဟးဂီၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ စံး၀ဲန့ၣ် လီၤႉ
လၢန့ၣ်အမဲာ်ညါခီဖျိကဘီယူၤဟဲခးလီၤတၢ်အဃိလီၢ်က၀ီၤကမျၢၢ်ဘၣ်ဒိဘၣ်ထံးတအိၣ်၀ဲဘၣ်ဆၣ် လီၢ်က၀ီၤကမျၢၢ်ဃုာ်ဒီး ၦၤမိၢ်ဒၢႇၦၤဖိဒံဖိသၣ်အဂၤ(၂၀၀၀)ဘျဲၣ်ဘၣ်ဃ့ၢ်ထီၣ်၀ဲဒီးလိၣ်ဘၣ်၀ဲဒၣ်တၢ်အီၣ်တၢ်အီႇ ကသံၣ်ကသီဒီးတၢ်ခိၣ်ဒုးသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤဒီးၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ၦၤလၢအမၤစၢၤၦၤဃ့ၢ်မှံဟးဖျိးတဂၤစံး၀ဲလၢ“စှၤသီအတီၢ်ပူၤအံၤပယီၤသုးနုာ်လီၤလၢယၤဒိၣ်ႇပယီၤသုးတၢ်လူၢ်တကပၤန့ၣ်မီၤနီၤႉဟံၣ်လၢအစၢ်တအိၣ်ဘၣ်တဖၣ်န့ၣ်ပယီၤသုးနုာ်လီၤဟံၦၤတၢ်ဖိတၢ်လံၤလၢဟံၣ်ပူၤႉမ့၀ံၤအ၀ဲသ့ၣ်နုာ်လီၤအိၣ်လၢ ၦၤဟံၣ်ပူၤဒ်သိးခ့ၣ်အဲၣ်ယူၣ်သုးမ့ဟဲထီၣ်န့ၣ်အ၀ဲသ့ၣ်ကဒီသဒၢလီၤသးအဂီၢ်မီၤနီၤႉဟံၣ်ခီန့ၣ်အိၣ်လၢကျဲကပၤအဃိမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
တကီၢ်ခါခဲအံၤပယီၤသုးတဖၣ်အံၤတၢ်ဒုးမ့ကဲထီၣ်လၢဟီၣ်က၀ီၤပူၤဒ်သိးအ၀ဲသ့ၣ်ခးလီၤစၢၤကျိဖးဒိၣ်ကသ့အဂီၢ်န့ၣ် အ၀ဲသ့ၣ်မၤအါထီၣ်အၦၤလၢ(ဘဟိ)သ၀ီပူၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ
ဒ်ခ့ၣ်အဲၣ်ယူၣ်အလံာ်တၢ်ပာ်ဖျါပူၤအသိးန့ၣ်လၢ(သုးက့ ၂)ဟီၣ်က၀ီၤ တီအူကီၢ်ရ့ၣ်အပူၤ စးထီၣ်တနံၣ်အံၤ(၂၀၂၃) လါယနူၤအါရံၤတုၤလၢလါယူၤ လၢ(၆)လါအတီၢ်ပူၤန့ၣ် တၢ်ဒုးဖိတၢ်ဒုးဖးဒိၣ်ကဲထီၣ်၀ဲအဘျီ(၃၀၀)ဘျဲၣ်အသိး ပယီၤသုးတကပၤသံ၀ဲအဂၤ(၄၀၀)ဘျဲၣ်အကျါပၣ်ဃုာ်၀ဲ သုးရ့ၣ်ခိၣ်(၃)ဂၤႇ သုးရ့ၣ်ခိၣ်–၂ (၂)ဂၤႇ သုးဒ့ခိၣ်(၁)ဂၤ ဒီး ဘၣ်ဒိ၀ဲအဂၤ(၂၀၀)ဃၣ်ဃၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံ ၂၈ သီအခါစ့ၢ်ကီး လၢတီအူကီၢ်ရ့ၣ် ထီတထူၣ်ကီၢ်ဆၣ်အပူၤ တၢ်ဒုးကဲထီၣ်၀ဲလၢ ပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး ဖဲန့ၣ်ခီဖျိကဘီယူၤဟဲတ့ၢ်လီၤမ့ၣ်ပိၢ်လၢ ထိၣ်လွံၢ်၀ါ ကီၢ်သူလ့ၤတီၤထီကၠိ ကပၤဒီး ပယီၤသုးစ့ၢ်ကီးခးလီၤကျိဖးဒိၣ်အဃိ သ၀ီ(၄)ဖျၢၣ် ကမျၢၢ်ဘၣ်ဃ့ၢ်ထီၣ်ဒံး၀ဲဒၣ်န့ၣ်လီၤႉ
