လါအီကူး ၁၇ သီႇ၂၀၂၃ နံၣ်ႇ ခ့ၣ်အဲးစံၣ်
ပယီၤသုးအံၤလၢကထီၣ်ဟံန့ၢ်က့ၤမၠၣ်၀တံၣ်ကပၤ(လဲၣ်ခၣ်တီၤ)သုးကလၢၤအံၤအဂီၢ် ဖဲလါအီကူး ၁၅ သီအနံၤ အ၀ဲသ့ၣ်ဟဲထီၣ်၀ဲဒီးဖဲခံခီခံကပၤတၢ်ဒုးကဲထီၣ်အတီၢ်ပူၤန့ၣ် ပယီၤသုးတကပၤသံ(၁၅)ဂၤအကျါ ပၣ်ဃုာ်၀ဲ သုးခိၣ်ဒိၣ်ဖိ(၁)ဂၤအဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ခီၤဘြၤသုးကျိၤ သုးဒ့(၃)ထုးထီၣ်ပာ်ဖျါ၀ဲ ဖဲမဟါလါအီကူး ၁၆ သီ အနံၤန့ၣ်လီၤႉ
ဒ်ခီၤဘြၤသုးကျိၤထုးထီၣ်ပာ်ဖျါ၀ဲအသိးန့ၣ်စးထီၣ်ဖဲလါအီကူး ၁၅ သီ ဂီၤခီ ၃ နၣ်ရံၣ်အဆၢကတီၢ်န့ၣ် ပယီၤသုးခးလီၤ ကျိဖးဒိၣ်ဆူခီၤဘြၤသုးကျိၤသုးပာ်ဖှိၣ်ဟူးဂဲၤအလီၢ်(လဲၣ်ခၣ်တီၤ)အခိၣ်အဃၢၤန့ၣ်ဒီးဖဲအ၀ဲသ့ၣ်သုးကျိၤနုာ်လီၤအခါ တၢ်ဒုးကဲထီၣ်အဃိ ပယီၤသုးတကပၤသံ(၁၅)ဂၤအကျါ ပၣ်ဃုာ်၀ဲ သုးခိၣ်ဒိၣ်ဖိ(၁)ဂၤႇသုးခိၣ်စိ(၁)ဂၤဒီး ဘၣ်ဒိ၀ဲခဲလၢာ် (၂၁)ဂၤအဂ့ၢ်န့ၣ် လံာ်တၢ်ပာ်ဖျါပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါတၢ်မၤန့ၢ်ပယီၤသုးအကျိချံၦာ်သၣ်တဖၣ်လၢအမ့ၢ်(60mm)ခီၣ်မဲဒိၣ်ပျီ တခိၣ်ႇ (MAsniper)တခိၣ်ႇ (MA4)ခံခိၣ်ႇ (MA3)သၢခိၣ်ႇ (MA2)လွံၢ်ခိၣ်ႇ (MA1)တခိၣ်ႇ (M16)တခိၣ်ႇ (MA)ကျိချံဒၢ ၅၃ ခါႇ (MA2)ကျိဒၢ လွံၢ်ခါႇ (M16)ကျိချံဒၢ ခံခါႇ (5.56)အချံ ၅၂၀၀ ဖျၢၣ်ႇ (7.62NATO)အချံ ၂၆၅၀ ဖျၢၣ်ႇ (MAsniper)အချံဒၢ တခါႇ (60mm)မ့ၣ်ပိၢ် ၃၆ ဖျၢၣ်ႇ (RPG)မ့ၣ်ပိၢ် ၉ ဖျၢၣ်ႇ (RPG)ဘျါအ့ၣ် ၈ ခါႇ (40mm)မ့ၣ်ပိၢ် ၅၇ ဖျၢၣ်ႇ စဲးကတိၤတၢ်(၁)ဖျၢၣ် အဂ့ၢ်န့ၣ် ခီၤဘြၤလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
တၢ်ဒုးကဲထီၣ်အတီၢ်ပူၤပယီၤသုးခးလီၤကျိဖးဒိၣ်အဘျီ(၃၀၀)ဘျဲၣ်ႇ (Jet Fighter)ကဘီယူၤ ဟဲခးလီၤတၢ် ၃ ဘျီႇ Mi-35(Attack-Helicopter) ကဘီယူၤဟဲခးလီၤတၢ် ၃ ဘျီအသိး တၢ်စဲးကျိၤတၣ်၀ၣ်တၢၣ်ဒီးတၢ်ဘူၣ်တၢ်ဘါ တၢ်သူၣ်ထီၣ်ဟးဂီၤ၀ဲဒၣ်န့ၣ်လီၤႉဒ်န့ၣ်အသိးမ့မ့ၢ်တၢ်ပၢၢ်ဆၢသုးပာ်ဖှိၣ်တကပၤန့ၣ် ၦၤသုးဖိဘၣ်လုၢ်ထီၣ်ကွံာ်အသး သမူ(၂)ဂၤႇ ဘၣ်ဒိ၀ဲ(၅)ဂၤအဂ့ၢ်န့ၣ် ခီၤဘြၤလံာ်တၢ်ပာ်ဖျါအပူၤစံး၀ဲန့ၣ်လီၤႉ
