လါစဲးပထ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ ဖဲလါစဲးပထ့ဘၢၣ် ၃ သီအနံၤ ပယီၤသုးကဘီယူၤဟဲခးလီၤတၢ်လၢသ၀ီ(၃)ဖျၢၣ်ပူၤအဃိ ကမျၢၢ်သံ(၁)ဂၤဒီး ဘၣ်ဒိ(၆)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲလါစဲးပထ့ဘၢၣ် ၃ သီ ဟါခီအဆၢကတီၢ် ခီဖျိပယီၤသုးကဘီယူၤဟဲခးလီၤတၢ်လၢ(မူကီၢ်ဆၣ်)ငထွ့ၤစိၣ်သ၀ီႇ မၠဲၣ်ယဲ(ကညီ)သ၀ီႇ(ပယီၤ)သ၀ီတဖၣ်အပူၤအဃိ (ငထွ့ၤစိၣ်)သ၀ီဖိသံဘၣ်ဒိဘၣ်ထံး၀ဲဒၣ်(၇)ဂၤအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ
“မၠဲၣ်ယဲသ၀ီတၢ်အိၣ်သးဒုတသ့ၣ်ညါဘၣ်ႉဖဲမဟါန့ၣ်ကဘီယူၤဟဲခးလီၤစိ၀ဲလၢ(မၠဲၣ်ယဲ)သ၀ီပူၤမီၤနီၤႉ ၀ံၤမးအဟဲ ထီၣ်ကဒါလၢ(ငထွ့ၤစိၣ်)သ၀ီဘျီပစံၣ်တချုးလၢၤဘၣ်ႉတၢ်ဒုးဒုကဘၣ်မ့ၢ်(သ့ၣ်ခၠၣ်စ့ၣ်)တၢ်ဒုးအတၢ်ပိာ်ထွဲလီၤမီၤနီၤႉဖဲမဟါတၢ်ဒုးကဲထီၣ်န့ၣ်ပတနၢ်ဟူဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါစဲးပထ့ဘၢၣ် ၄ သီ အနံၤန့ၣ်လီၤႉ
လၢန့ၣ်အမဲာ်ညါခီဖျိပယီၤသုးကဘီယူၤဟဲခးလီၤတၢ်(၃)ဘျီညါအဃိ ငထွ့ၤစိၣ်သ၀ီပူၤ ဟံၣ်အူဟီၣ်ကအိၣ်လၢ အဖျၢၣ်(၁၀)ဃၣ်ဃၣ်ညါအသိး ငထွ့ၤစိၣ်သ၀ီႇမၠဲၣ်ယဲ(ကညီ)သ၀ီႇ(ပယီၤ)သ၀ီ ၃ ဖျၢၣ်အံၤ ကမျၢၢ်တဖၣ် ဘၣ်ဃ့ၢ်ထီၣ်၀ဲ အဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
အပူၤကွံာ်လါအီကူး ၃၁ သီအနံၤ ဖဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ (KNDO)ဒီးသုးပာ်ဖှိၣ်တဖၣ် လဲၤထီၣ်ခး၀ဲမူကီၢ်ဆၣ် သ့ၣ်ခၠၣ်စ့ၣ်ပယီၤသုးကလၢၤအခါ တၢ်ဒုးကဲထီၣ်၀ဲလၢ ခံခီခံကပၤအဘၢၣ်စၢၤဒီးဖဲန့ၣ်ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤစၢၤတၢ်အဃိ(မၠဲၣ်ယဲ)သ၀ီဃုာ်ဒီး သ၀ီလၢအိၣ်တၢ်ခိၣ်တၢ်ဃၢၤဖဲန့ၣ်(၂၆)ဖျၢၣ် ကမျၢၢ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲလါစဲးပထ့ဘၢၣ် ၂ သီအနံၤန့ၣ်လီၤႉ
ဒ်န့ၣ်အသိးဖဲမဟါလါစဲးပထ့ဘၢၣ် ၄ သီအနံၤစ့ၢ်ကီး ပယီၤသုးလၢအိၣ်(သထ့ကိ)သ၀ီတဖၣ် ခးလီၤကျိဖးဒိၣ်ဆူ ဒူသ၀ီတၢ်လီၢ်လၢ(KNLA)သုးပာ်ဖှိၣ်အိၣ်အလီၢ်သ့သ့ၣ်တဖၣ်အပူၤအဂ့ၢ် လီၢ်က၀ီၤကမျၢၣ်စံး၀ဲအိၣ်ဒီး ဘၣ်ဆၣ် ဘၣ်ဃးတၢ်တၢ်သံတၢ်ဘၣ်ဒိဘၣ်ထံးတၢ်ဟးဂူာ်ဟးဂီၤတၢ်အိၣ်သးအံၤ ပခ့ၣ်အဲးစံၣ်–ကညီတၢ်ကစီၣ်ဃုသ့ၣ်ညါ မၤလီၤတံၢ်အီၤအဖၢမုၢ်န့ၣ်လီၤႉ
