ဖီၣ်စုက၀ဲၤဖိတဖၣ်ကဘၣ်လူၤပိ၁်မၤထွဲသုးတၢ်သိၣ်တၢ်သီအဂ့ၢ်(မိၣ်ကီၢ်သီပၣ်တံၣ်)ဆီၣ်တခူထီၣ်၀ဲ

လါဖ့ၤဘြူၤအါရံၤ ၁ သီႇ ၂၀၂၃ နံၣ်ႇ ခ့ၣ်အဲးစံၣ်

ဖီၣ်စုက၀ဲၤသုးဖိတဖၣ်ကဘၣ်ပာ်ကဲလူၤပိာ်မၤထွဲသုးတၢ်သိၣ်တၢ်သီတၢ်ဘျၢဒီးကဟးဆှဲးတၢ်ခးလိာ်သးလၢဒူသ၀ီႇက၀ီၤဒ့ပူၤအဂ့ၢ်န့ၣ် မိၣ်ကီၢ်သီပၣ်တံၣ် ဒူသထူၣ်ကီၢ်ရ့ၣ် ထုးထီၣ်ပာ်ဖျါဆီၣ်တခူထီၣ်၀ဲဖဲအပူၤကွံာ်လါယနူၤအါရံၤ ၂၉ သီ အနံၤန့ၣ်လီၤႉ

ဖဲအပူၤကွံာ်လါယနူၤအါရံၤ ၂၄ သီအနံၤန့ၣ် လၢကညီကီၢ်စဲၣ် ကီးတရံးကီၢ်ဆၣ် တလၢၤဒူသ၀ီ(ကါနံၤ)သ၀ီခိၣ်သ၀ီဃၢၤန့ၣ် တၢ်ဒုးကဲထီၣ်၀ဲလၢသုးခိၣ်အဲၣ်စ့၀ါတီခိၣ်ရိၣ်မဲ(Lion Battalion Commando)သုးပာ်ဖှိၣ်အံၤဒီးပယီၤသုးအဘၢၣ်စၢၤအဃိ မ့ၣ်အူအီၣ်ကမျၢၢ်အဟံၣ်အဃီအဖီခိၣ်အံၤ ဖီၣ်စုက၀ဲၤသုးဖိသံၣ်ဖိတဖၣ်ကလူၤပိာ်မၤထွဲ၀ဲသုးတၢ်သိၣ်တၢ်သီတၢ်ဘျၢအဂ့ၢ်န့ၣ် မိၣ်ကီၢ်သီပၣ်တံၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဖဲလါယနူၤအါရံၤ ၂၃ သီအနံၤန့ၣ် ကီၢ်သူလ့ၤသုးမုၢ်ဒိၣ်(KTLA)သုးကျိၤသုးပာ်ဖှိၣ်နုာ်လီၤခး၀ဲ(ကါနံၤ)သ၀ီ သုးမီၤစိရိၤပၢပြး၀ဲၤဒၢးဒီးဖဲလါယနူၤအါရံၤ ၂၄ သီအနံၤစ့ၢ်ကီး ဒွဲၣ်အူအီၣ်ကဒီးသုးမီၤစိရိၤအၦၤဟံၣ်ဖိဃီဖိ အဟံၣ်အဃီတဖၣ်အဃိဟံၣ်ဟးဂူာ်ဟးဂီၤ၀ဲအဂ့ၢ်န့ၣ် မိၣ်ကီၢ်သီပၣ်တံၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

ဘၣ်ဃးဒီးလံာ်တၢ်ထုးထီၣ်ပာ်ဖျါအဖီခိၣ်လၢကမၤလီၤတံၢ်တၢ်ဂ့ၢ်တၢ်ကျိၤအံၤအဂီၢ်န့ၣ် ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိးတၢ်ပၢၢ်ဆၢသုးပာ်ဖှိၣ်ၦၤဘၣ်မူဘၣ်ဒါအိၣ်၀ဲဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ

လၢကြုၢ်တု၀့ၢ်ခိၣ်၀့ၢ်ဃၢၤကီၣ်ကၠဲၣ်ႇအၤကလိၤႇကါနံၤသ၀ီတဖၣ်အပူၤန့ၣ်ဖဲအပူၤကွံာ်လါယနူၤအါရံၤ ၂၀ သီအခါ တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢပယီၤသုးတြိၤ(၄၄)စုတီၤဖီလာ်ဒီးတၢ်ပၢၢ်ဆၢသုးပာ်ဖှိၣ်ကရူၢ်ဘၢၣ်စၢၤအံၤအဃိ ပယီၤသုးသံဘၣ်ဒိဘၣ်ထံးကအိၣ်အဂၤ(၉၀)ဘျဲၣ်ညါအဂ့ၢ်န့ၣ် (Lion Battalion Commando)ဒုးယၤသုးကျိၤ ထုးထီၣ်ပာ်ဖျါ၀ဲဖဲလါယနူၤအါရံၤ ၂၉ သီအနံၤန့ၣ်လီၤႉ

လၢန့ၣ်အမဲာ်ညါခီဖျိကျိဖးဒိၣ်သုးရ့ၣ်အံၤခးလီၤကျိဖးဒိၣ်ဒီးသုးမီၤစိရိၤကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိ မ့ၣ်အူအီၣ်သ၀ီပူၤဟံၣ်(၅)ဖျၢၣ်ညါဒီးတၢ်ပၢၢ်ဆၢသုးပာ်ဖှိၣ်တကပၤသံ၀ဲ(၂)ဂၤအဂ့ၢ်န့ၣ်(Lion Battalion Commando)ဒုးယၤသုးကျိၤအတၢ်ပာ်ဖျါအပူၤပာ်ဖျါ၀ဲန့ၣ်လီၤႉ

မိၣ်ကီၢ်သီပၣ်တံၣ်အံၤမ့ၢ်ကလုာ်ဒူၣ်ဖီၣ်စုက၀ဲၤကရူၢ်တဒူၣ်လၢအဆဲးလီၤတ့ၢ်ဃာ်ထံကီၢ်ဒီဘ့ၣ်တၢ်ပတုာ်တၢ်ခးအံၤဖဲ(၂၀၁၈)လါဖ့ၤဘြူၤအါရံၤ ၁၃ သီအနံၤအံၤလၢ(NLD)ဒီကလုာ်ဒံၣ်မိၣ်ခြ့ၣ်စံၣ်ကရၢစိပၣ်တံၣ်ပဒိၣ်စိၤအခါန့ၣ်လီၤႉ

လၢန့ၣ်အမဲာ်ညါသုးမီၤစိရိၤအခိၣ်(မ့အီၣ်လဲၣ်)ကွဲမုာ်တၢ်တဲသကိးတၢ်မုာ်တၢ်ခုၣ်တၢ်ရဲၣ်တၢ်ကျဲၤအခါစ့ၢ်ကီး အါဒၣ်တက့ၢ်မိၣ်ကီၢ်သီပၣ်တံၣ်အံၤလဲၤထီၣ်ပၣ်ဃုာ်ပၣ်ဂီၢ်၀ဲဒီးကလုာ်ဒူၣ်ဖီၣ်စုက၀ဲၤလၢအဂၤတဖၣ်စ့ၢ်ကီးအိၣ်၀ဲန့ၣ်လီၤႉ