လါယနူၤအါရံၤ ၃၀သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,ဒူပျၥ်ယၥ်ကီၢ်ရ့ၣ် ကီးတရံးကီၢ်ဆၣ် ကွံလၢၢ်တၢသဝီ,ဖဲအပူၤကွံၥ်လါယနူၤအါရံၤ(၂၈)သီမုၢ်ဃ့ၢ်လီၤအနံၤန့ၣ်,ကျိချံလီၢ်လံၤလၢတပိၢ်ဖးထီၣ်ဒံးဘၣ်တဖျၢၣ်ပိၢ်ဖးထီၣ်အဃိဖိသၣ်ဘၣ်ဒိဝဲ(၄)ဂၤအကျါ,သံဝဲ(၂)ဂၤဒီးဘၣ်ဒိဘၣ်ထံးဝဲ(၂)ဂၤအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
ကွံလၢၢ်တၢသဝီဖိသၣ်(၄)လၢအဘၣ်ဒီးကျိချံသ့ၣ်တဖၣ်အံၤအသးနံၣ်အိၣ်ဝဲဖဲ(၆)နံၣ်တုၤ(၇)နံၣ်ခိၣ်ဃၢၤဒီးအဝဲသ့ၣ်တဖၣ်အံၤမ့ၢ်ဝဲ,စီၤဆၣ်ဖိဃံ,စီၤဆၣ်ဖိဃ့ဒီးနီၢ်မုၣ်လါစူဃုၥ်ဒီးအဒ့မုၣ်လၢကတိၤတၢ်တဘၣ်ဘၣ်တဂၤအဂ့ၢ်,သ့ၣ်ညါဘၣ်န့ၣ်လီၤ.
ဒီးဖိသၣ်(၄)ဂၤအံၤလိၥ်ကွဲဝဲဖဲအဟံၣ်ကပၤဆၢကတီၢ်ထံၣ်ဝဲကျိချံလၢတပိၢ်ဖးထီၣ်အံၤဒီးတီၢ်လိၥ်ကွဲဝဲအဃိပိၢ်ဖးထီၣ်ဝဲဒီး,ပိၥ်ခွါခံဂၤသံကွံၥ်ဝဲတဘျီဃီအသိးပိၥ်မုၣ်ခံဂၤန့ၣ်ဘၣ်ဒိဝဲဒီးဘၣ်တၢ်ဆှၢအဝဲသ့ၣ်လၢတၢ်ဆါဟံၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ယသ့ၣ်ညါဘၣ်လၢဖိသၣ်ဘၣ်ဒိခဲလၢၥ်(၄)ဂၤ,ပိၥ်မုၣ်(၂)ဂၤပိၥ်ခွါခံဂၤ.မ့မ့ၢ်ပိၥ်ခွါခံဂၤန့ၣ်သံတဘျီဃီဒီးမ့မ့ၢ်လၢအပိၥ်မုၣ်ခံဂၤတခီဘၣ်ဒိအဃိ,တၢ်ဆှၢအဝဲသ့ၣ်လၢတၢ်ဆါဟံၣ်န့ၣ်လီၤ.အပူၤကွံၥ်တၢ်ဒုးကဲထီၣ်အဆၢကတီၢ်ပယီၤခးလီၤတၢ်န့ၣ်ကျိချံတဖၣ်လီၤတဲၥ်လၢသဝီပူၤတပိၢ်ဖးထီၣ်ဒံးဘၣ်အိၣ်ဝဲ,ဖိသၣ်တဖၣ်အံၤတသ့ၣ်ညါဝဲဒီးလဲၤလိၣ်ကွဲအဃိ,ပိၢ်ထီၣ်ဒီးအဝဲသ့ၣ်အဂ့ၢ်,”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ကျိချံလၢလီၢ်လံၤလၢအပိၢ်ဖးထီၣ်ခဲအံၤန့ၣ်တၢ်တယးလၢကမ့ၢ်ဝဲ(ခွ့ပိမ့ၣ်ပိၢ်)ချံအဂ့ၢ်,ဖိသၣ်ပိၥ်မုၣ်လၢအဘၣ်ဒိခံဂၤအံၤဘၣ်ဒိဘၣ်ထံးဝဲနးနးကလဲၥ်ဒီးတၢ်လဲၤဆှၢအဝဲသ့ၣ်ဆူကၠီၣ်တဲၣ်အူးဖၣ်တၢ်ဆါဟံၣ်အဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.
တကတီၢ်ဃီ,ဖဲလါယနူၤအါရံၤ(၂၈)သီအနံၤအပူၤ,ဖိသၣ်(၄)ဂၤဘၣ်ဒိဝံၤအလီၢ်ခံပှၤဘၣ်မူဘၣ်ဒါတဖၣ်လဲၤမၤရှဲလဲက့ၤဝဲကျိချံအက့အခီတဖၣ်အိၣ်ဝဲဒၣ်ဘၣ်ဆၣ်,တၢ်ကဲထီၣ်သးသတူၢ်ကလၥ်ဒ်အံၤအဖီခိၣ်,သဝီလီၢ်ကဝီၤဖိတဖၣ်အိၣ်ဝဲဒီးတၢ်ဘၣ်ယိၥ်ဘၣ်ဘှီလၢ,ကျိချံတပိၢ်ထီၣ်ဒံးဘၣ်တဖၣ်ကအိၣ်ဒံးဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ.
ကွံလၢၢ်တၢသဝီအံၤအိၣ်ဘူးဝဲဒီးပယီၤသုး(ကွံလၢၢ်တၢ)အသုးကလၢၤဒီးအပူၤကွံၥ်တၢ်ခးလိၥ်သးကဲထီၣ်အဆၢကတီၢ်လီၢ်ကဝီၤဖိတဖၣ်ဃ့ၢ်ထီၣ်အိၣ်ကဒုဝဲဒၣ်အသးန့ၣ်လီၤ.ဒီးဖဲအပူၤကွံၥ်(၂၀၂၂)နံၣ်လါအီးကထိဘၢၣ်အပူၤခ့ၣ်အဲၣ်ယူၣ်သုးရ့ၣ်(၁၇)ဒီးသုးရ့ၣ်(၁၈)ပၥ်ဖှိၣ်ထီၣ်မၤန့ၢ်ကွံၥ်ဝဲဒၣ်ဝံၤအလီၢ်ခံ,လီၢ်ကဝီၤဖိတဖၣ်က့ၤအိၣ်ဆိးက့ၤဝဲအဂ့ၢ်,သ့ၣ်ညါဘၣ်န့ၣ်လီၤ.
