ကီးတရံးလီၢ်က၀ီၤကမျၢၢ်တဖၣ်စံၣ်တၢ်ဒုးယံၤထီၣ်လံအဃိတၢ်ကီတၢ်ခဲအိၣ်ထီၣ်လၢအီၣ်အီအိၣ်ဆိးလီၢ်ကျဲ

လါအီးကထိဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ်အပူၤ ဒူသ၀ီၦၤကမျၢၢ်လၢအိၣ်ကီးတရံး၀့ၢ်ခိၣ်၀့ၢ်ဃၢၤတဖၣ်အံၤ ခီဖျိအ၀ဲသ့ၣ်ဘၣ်ဟးစံၣ် ဟးဃ့ၢ်တၢ်ဆၢကတီၢ်ယံၤထီၣ်လံအဃိ တၢ်ကီတၢ်ခဲတၢ်ဃံးတၢ်စ့ၤအိၣ်ထီၣ်လၢတၢ်အီၣ်တၢ်အီတၢ်အိၣ်တၢ်ဆိး လီၢ်ကျဲတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လီၢ်က၀ီၤကမျၢၢ်လၢအိၣ်ကီးတရံး၀့ၢ်ခိၣ်၀့ၢ်ဃၢၤတဖၣ်အံၤဘၣ်ဟးစံၣ်ဟးဃ့ၢ်ကအိၣ်လၢတနံၣ်ဃၣ်ဃၣ်လံဒီး တကီၢ်ခါခဲအံၤအ၀ဲသ့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤဘၣ်အသိး အ၀ဲသ့ၣ်တဖံးအီၣ်မၤအီၣ်ဘၣ်တၢ်လၢၤဘၣ်အဃိ တၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတၢ်အိၣ်တၢ်အိၣ်လီၢ်ကျဲတကပၤအဂ့ၢ်န့ၣ် ကမျၢၢ်ၦၤဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ

“ကသံၣ်ကသီအၦ့ၤမ့ၢ်ဂ့ၤႇတၢ်အီၣ်တၢ်အီၣ်ႇတၢ်အိၣ်တၢ်ဆိးလီၢ်ကျဲစ့ၢ်ကီးတၢ်ကီတၢ်ခဲအိၣ်အကလုာ်ကလုာ်လီၤႉ ပတ့ထီၣ်ဒဲပအိၣ်ဆိလၢၦၤကျီးပူၤဒ်န့ၣ်လီၤႉခီဖျိကျီးကစၢ်န့ၣ်ဆါက့ၤဟီၣ်ခိၣ်ႇၦၤၦ့ၤဟီၣ်ဖိခီဒၢးတဒုးအိၣ်ၦၤလၢၤဘၣ် အဃိပဘၣ်ရိၢ်လီၤကွံာ်ဒဲပဘၣ်တ့ထီၣ်ကဒါလၢအသီမီၤနီၤႉကျီးကစၢ်နီဟးထီၣ်ၦၤအဃိပဘၣ်တ့ထီၣ်ကဒါဒဲလၢသီ န့ၣ်တဘျီခံဘျီလံႉကျိၣ်စ့တၢ်ဟဲနုာ်တအိၣ်ဘၣ်အဃိတၢ်ကီဒိၣ်မး”အဂ့ၢ်န့ၣ် စံး၀ဲန့ၣ်လီၤႉ

လီၢ်က၀ီၤကမျၢၢ်တဖၣ်အံၤအ၀ဲသ့ၣ်ဘၣ်ဟးစံၣ်ဟးဃ့ၢ်တၢ်ဆၢကတီၢ်ယံၤထီၣ်လံဒီးတကီၢ်ခါခဲအံၤ အ၀ဲသ့ၣ်တဒိးန့ၢ်ဘၣ် စ့ၢ်ကီးတၢ်ဆီၣ်ထွဲမၤစၢၤဘၣ်တကးဒံးဘၣ်အမဲာ်ညါခီဖျိတၢ်ဖံးတၢ်မၤႇကျိၣ်စ့တၢ်ဟဲနုာ်တအိၣ်ႇတၢ်ၦ့ၤစ့ၢ်ကီးထီၣ်အဃိ ဘၣ်ကိၢ်ဘၣ်ဂီၤတၢ်လၢဟံၣ်ဖိဃီဖိတၢ်အိၣ်မူခါဆူညါအဂီၢ်အဂ့ၢ်န့ၣ် ကမျၢၢ်ၦၤဃ့ၢ်တၢ်ဒုးလၢအိၣ်ကီးတရံး၀့ၢ်ဃၢၤတဖၣ် စံး၀ဲန့ၣ်လီၤႉ

အပူၤကွံာ်လၢညါကမျၢၢ်ၦၤဃ့ၢ်မှံဟးဖျိးတဖၣ်ဒိးန့ၢ်ဘၣ်တၢ်ဆီၣ်ထွဲမၤစၢၤဘၣ်ဆၣ်ဖဲလီၢ်ခံအံၤ ကီၢ်ပယီၤဒီတဘ့ၣ်အပူၤ ခီဖျိထံဖိကီၢ်ဖိကမျၢၢ်ဘၣ်ဃ့ၢ်မှံဟးဖျိးဟဲအါထီၣ်အဃိ ကီၢ်ပူၤကီၢ်ချၢတၢ်ဆီၣ်ထွဲမၤစၢၤ လီၤစှၤ၀ဲအဂ့ၢ်န့ၣ် ကီးတရံးကီၢ်ဆၣ် ၦၤဂ့ၢ်၀ီတၢ်တိစၢၤမၤစၢၤကမံးတံာ် ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ

“ဖဲကီးတရံး၀့ၢ်ပူၤအံၤလၢညါခါန့ၣ်တၢ်မၤစၢၤအိၣ်ဒံးတစဲးဒံးႉလၢကီၢ်ပယီၤထံကီၢ်ဒီတဘ့ၣ်အံၤအပူၤ ၦၤဘၣ်စံၣ်မှံဟးဖျိး အါအဃိ ကီၢ်ပူၤကီၢ်ချၢတၢ်ဆီၣ်ထွဲမၤစၢၤလီၤစှၤႉလၢပကီၢ်ဆၣ်ပူၤ ၦၤလၢအမၤတၢ်လၢ တၢ်တိစၢၤမၤစၢၤတကပၤန့ၣ်စ့ၢ်ကီး အ၀ဲသ့ၣ်ဂုာ်ကျဲးစၢးဃုကျဲအဘိဘိလီၤႉလၢပကဒိးန့ၢ်ဘၣ်တၢ်ဆီၣ်ထွဲမၤစၢၤအဂီၢ်န့ၣ်ပတီၣ်ထီၣ်ဃာ်စရီအိၣ်မီၤနီၤႉ မ့ၢ်တၢ်အိၣ်သးအိၣ်ဒ်လဲၣ်န့ၣ်တုၤလၢခဲအံၤပတသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲမဟိတနံၣ်လါဒံၣ်စ့ဘၢၣ်အခါန့ၣ်လၢကီးတရံး၀့ၢ်ခိၣ်၀့ၢ်ဃၢၤတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီး ပယီၤသုးအဘၢၣ်စၢၤအဃိ ကၠီၤစှၤကိႇတန့ၤမူၤႇကီၢ်မူႇကမဲၤကိႇကီးနွဲၣ်ႇယွၤသ့ၣ်ကိႇနါကတိသ၀ီ ၦၤကမျၢၢ်လၢအကထိ ဘၣ်ဟးစံၣ်အိၣ်လၢအသမူသကိးအဟံၣ်လၢတၢ်လီၢ်အဂၤဒီးတုၤလၢခဲအံၤၦၤက့ၤအိၣ်လၢ သ၀ီပူၤတအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကီၢ်ခါခဲအံၤခံခီခံကပၤတၢ်ဒုးကဲထီၣ်တအိၣ်လၢၤ၀ဲဘၣ်ဆၣ်ခီၣ်သုးရ့ၣ်(ခလရ–၉၇)လၢအိၣ်ဆီလီၤသးဖဲ ကီးတရံး၀့ၢ်အံၤ ခီဖျိအ၀ဲသ့ၣ်ခးလီၤကျိဖးဒိၣ်ကိးမုၢ်နံၤဒဲးဃၣ်ဃၣ်အဃိ ဖဲလါအီးကထိဘၢၣ် ၃ သီအနံၤစ့ၢ်ကီး နါကတိသ၀ီ ဖိသၣ်မုၣ်(၁၅)နံၣ်တဂၤဘၣ်ဒိ၀ဲဒၣ်ဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ