Home တၢ်ကစီၣ် ပယီၤသုးအိၣ်(နၣ်သၤကွ့)တဖၣ်ခးလီၤကျိဖးဒိၣ်အဃိ ၦၤကမျၢၢ်ဘၣ်ဒိ(၄)ဂၤအကျါပၣ်ဃု၁်ၦၤကၠိဖိ ၂ ဂၤ

ပယီၤသုးအိၣ်(နၣ်သၤကွ့)တဖၣ်ခးလီၤကျိဖးဒိၣ်အဃိ ၦၤကမျၢၢ်ဘၣ်ဒိ(၄)ဂၤအကျါပၣ်ဃု၁်ၦၤကၠိဖိ ၂ ဂၤ

166
0
Photo: CJ

လါအီးကထိဘၢၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ ပယီၤသုးကလၢၤလၢ အိၣ်(နၣ်သၤကွ့)၀့ၢ်ပူၤတဖၣ်အံၤ ဖဲမဟါလါအီးကထိဘၢၣ် ၂၃ သီ မုၢ်ဃ့ၢ်လီၤအဆၢကတီၢ် ခီဖျိအ၀ဲသ့ၣ်ခးလီၤ ကျိဖးဒိၣ်လီၤတဲာ်ပိၢ်ဖးထီၣ်လၢလၢၢ်ဒိၣ်ကီၢ်ဆၣ်(တီကၠီၤပီၣ်)သ၀ီပူၤအဃိ ဘၣ်ဒိဘၣ်ထံး၀ဲၦၤကၠိဖိ(၂)ဂၤဒီး ၦၤဒီဖိမိၢ်(၂)ဂၤ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

ဖဲမဟါလါအီးကထိဘၢၣ် ၂၃ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်လီၤတဲာ် ပိၢ်ဖးထီၣ်လၢ(တီကၠီၤပီၣ်)သ၀ီဆၢလာ် သီခါဖၠၣ်ကပၤအဃိ ၦၤကၠိဖိ(၂)ဂၤဒီးၦၤဒီဖိမိၢ်(၂)ဂၤဘၣ်ဒိဘၣ်ထံး၀ဲဒၣ် န့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“ၦၤကၠိဖိခံဂၤအကျါမ့မ့ၢ်အ၀ဲတဂၤန့ၣ်အအိၣ်လၢ(၀ါပ့ၤစူၣ်)သ၀ီစံၣ်တၢ်ဒုးဟဲအိၣ် ဖဲ(တီကၠီၤပီၣ်)ဟဲထီၣ်လိၤကၠိမီၤနီၤႉမ့မ့ၢ်ၦၤလၢအဂၤတဖၣ်န့ၣ်မ့ၢ်၀ဲဒၣ်(တီကၠီၤပီၣ်)သ၀ီဖိလီၤႉၦၤကၠိဖိတဖၣ်ဘၣ်ဖဲအကၠိပံးလဲၤဂဲၤလိာ်ကွဲလၢသီခါဖၠၣ်ကပၤအခါအဘၣ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကီၢ်ခါခဲအံၤၦၤကမျၢၢ်လၢအဘၣ်ဒိဘၣ်ထံး(၄)ဂၤအံၤ(ခ့ၣ်အဲၣ်ယူၣ်)ဆူၣ်ချ့ၦၤဘၣ်မူဘၣ်ဒါကူစါယါဘျါအ၀ဲသ့ၣ် အဂ့ၢ်န့ၣ် ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

နၣ်သၤကွ့ဒီးတီကၠီၤပီၣ်သ၀ီလၢတၢ်ကဲထီၣ်သးခဲအံၤန့ၣ်အဘၢၣ်စၢၤအိၣ်ထဲတတၢၣ်လီၤဒီးအပူၤကွံာ်လၢညါစ့ၢ်ကီး ခီဖျိပယီၤသုးခးလီၤကျိဖးဒိၣ်အဃိ ၦၤကမျၢၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် ကညီဂ့ၢ်ဂီၢ်အူတၢ်တိစၢၤမၤစၢၤကရူၢ် ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ

Photo: CJ

အ၀ဲစံး၀ဲလၢ“ပယီၤသုးခဲအံၤတဖၣ်အံၤခးလီၤကျိဖးဒိၣ်ကိးမုၢ်နၤဒဲးလီၤႉတၢ်ကဲထီၣ်ဖဲတီကၠီၤပီၣ်ခဲအံၤနါက့ လၢညါနါက့ အကဲထီၣ်သးအိၣ်စ့ၢ်ႉခီဖျိကျိဖးဒိၣ်အံၤအဃိဘၣ်ၦၤမဲာ်သၣ်ချံႇၦၤဘၣ်ကူစါယါဘျါသးအိၣ်ဒီးဒူၣ်ညါႉ ၦၤတနၢ်ဟူလၢ တၢ်ဒုးကဲထီၣ်စ့ၢ်ဘၣ်ႇအ၀ဲသ့ၣ်ခးလီၤကျိဖးဒိၣ်တပယူာ်ဃီအဃိသ၀ီကိးဖျၢၣ်ဒဲးဘၣ်အိၣ်လၢတၢ်ပလီၢ်ပဒီပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

စှၤလါတီၢ်ပူၤအံၤပယီၤသုးခးလီၤကျိဖးဒိၣ်တပယူာ်ဃီလၢချၢၣ်လွံၢ်ထူၣ်ကီၢ်ရ့ၣ် ကီၢ်ဆၣ်တဖၣ်အပူၤဒီး သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ခီဖျိကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်အဃိ ၦၤကမျၢၢ်သံဘၣ်ဒိဘၣ်ထံး အနီၣ်ဂံၢ်နီၣ်ဒွးအိၣ်တစှၤန့ၢ်အဂၤ(၁၀၀)ညါအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG) တၢ်မၤနီၣ်မၤဃါစရီအသိး သ့ၣ်ညါဘၣ်န့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်တၢ်ပၢဟီၣ်က၀ီၤ(၇)ဘ့ၣ်အပူၤ ခီဖျိဒုးယၤတၢ်သဘံၣ်သဘုၣ်အဃိ ချၢၣ်လွံၢ်ထူၣ်ကီၢ်ရ့ၣ်ပူၤ ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲခဲလၢာ်(၂၄၈ႇ၁၆၀)ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ် လီၤႉ