ဒုးယၤခိၣ်သီခဲအံၤတဂၤအဃိ ကၠၤအ့စ့ၣ်ကၠံကမျၢၢ်ဘၣ်ယိၣ်တၢ်ဒုးကကဲထီၣ်လၢ၀့ၢ်ပူၤ

လါအီးကထိဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်

သုးကီၣ်ကးအဒုးယၤခိၣ်သီလၢအဟဲသီလီၤဘၣ်မူဒါဖဲကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤခဲအံၤတဂၤန့ၣ် ခီဖျိအမၤဆူၣ်ထီၣ်ဒုးယၤတၢ်ဟူးတၢ်ဂဲၤလၢဟီၣ်က၀ီၤပူၤအဃိဘၣ်ယိၣ်တၢ်ဒုးကကဲထီၣ်လၢ၀့ၢ်ပူၤအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ် စံး၀ဲန့ၣ်လီၤႉ

ဖဲအပူၤကွံာ်လါစဲးပထ့ဘၢၣ်အခါန့ၣ်မုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်စုတီၤဖီလာ် ဒုးယၤခိၣ်အသီ သုးခိၣ်ဒိၣ်စိ စ့ၤယၤလ့ လၢအဟဲသီလီၤဘၣ်မူဒါဖဲကၠၤအ့စ့ၣ်ကၠံ၀့ၢ်ပူၤအံၤ ခီဖျိအဟးဆှၣ်ဒီးသုးကျိၤလၢက၀ီၤဒ့၀့ၢ်ပူၤ, ဒူသ၀ီပူၤအိၣ်လၢ တနံၤခံဘျီညါဒီးတၤ(ဃ့ဘူၣ်)၀ဲတၢ်ပၢၢ်ဆၢသုးကရူၢ်အဃိ ဘၣ်ယိၣ်လၢတၢ်ဒုးကကဲထီၣ်လၢ၀့ၢ်ပူၤအဂ့ၢ်န့ၣ် ကမျၢၢ်အိၣ်ပူၤတဖၣ် စံး၀ဲန့ၣ်လီၤႉ

က၀ီၤဒ့(၁) ကမျၢၢ်ပိာ်မုၣ်တဂၤစံး၀ဲလၢ“တၢ်ဒုးမ့ကဲထီၣ်တုၤလၢ၀့ၢ်ပူၤဒု ပဘၣ်ယိၣ်ပယီၤသုးအံၤကမၤ၀ဲဒ်သိး ဒီးချၢၣ်တကူၣ်တၢၣ်တၢ်ဒုးကဲထီၣ်တဘျီန့ၣ်ႉတၢ်တဘျီန့ၣ်တပျဲၦၤသ၀ီဖိစံၣ်ဘၣ်ႇဖီၣ်ဖှိၣ်ၦၤသ၀ီဖိဒ်န့ၣ်မီၤနီၤႉ ၦၤမ့စံၣ်ခီဒၢးအ၀ဲသ့ၣ်နုာ်လီၤဟုၣ်တၢ်လၢၦၤဟံၣ်ပူၤၦၤကျးပူၤအဃိကစံၣ်ဒၢးကီကအိၣ်ဒၢးကီ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါဒုးယၤခိၣ်လၢအဟဲသီတဂၤအံၤတၤ၀ဲဒၣ်တၢ်ပၢၢ်ဆၢသုးကရူၢ်အဃိ အပူၤကွံာ်လါအီးကထိဘၢၣ် ၂ သီ အနံၤစ့ၢ်ကီး တၢ်လဲၤတ့ၢ်လီၤဒံးဒြိမ့ၣ်ပိၢ်လၢ၀့ၢ်ပူၤ ပၢပြး၀ဲၤဒၢးတၢ်လီၢ်အံၤဒံးအဂ့ၢ်န့ၣ် ကမျၢၢ်လၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ

“ဒုးယၤခိၣ် စ့ၤယၤလ့ ခဲအံၤတဂၤန့ၣ် အတၤ(ဃ့ဘူၣ်)၀ဲဒၣ်ၦၤကညီသုးႇၦၤ(PDF)တဖၣ်မီၤနီၤႉ အဟးရၤလီၤတၢ်ကစီၣ်လၢ ၀့ၢ်ပူၤတဲ၀ဲလၢဟဲခးဆါကွၢ်မီၤ တဲ၀ဲဒ်န့ၣ်ႉဖဲလါအီးကထိဘၢၣ် ၂ သီ မုၢ်နၤခီ ၁၁ နၣ်ရံၣ် အခါန့ၣ် ၦၤကညီသုးဟဲတ့ၢ်လီၤ ဒြိမ့ၣ်ပိၢ်လၢကၠၤအ့စ့ၣ်ကၠံ ပၢပြး၀ဲၤဒၢးႉ ပယီၤသုးဘၣ်ဒိဘၣ်ထံးအိၣ်ႉဖဲန့ၣ်ပယီၤသုး(ဗျူဟာ)လူၢ်ခးလီၤစိကျိဖးဒိၣ်အဃိ သ၀ီပူၤၦၤဟံၣ်ၦၤဃီဟးဂီၤႉမ့ၢ်ၦၤကညီခီန့ၣ်ဘၣ်ဒိဘၣ်ထံးအိၣ်ဧါႇတအိၣ်ဧါဒုတသ့ၣ်ညါဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲအပူၤကွံာ်လါယူၤလံ ၁၆ သီအခါစ့ၢ်ကီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် လဲၤတ့ၢ်လီၤ၀ဲဒြိမ့ၣ်ပိၢ် လၢသုးကီၣ်ကးစုတီၤဖီလာ် ကၠၤအ့စ့ၣ်ကၠံ၀့ၢ် ကီၢ်ဆၣ်ပၢၤကီၢ်၀ဲၤလီၢ်ႇ ပၢပြး၀ဲၤဒၢးႇ ဟီၣ်ခိၣ်ကပံာ်၀ဲၤဒၢးတၢ်လီၢ် သ့ၣ်တဖၣ်ဒီး တၢ်ကဲထီၣ်သးဖဲန့ၣ်၀ံၤလီၢ်ခံ လၢ၀့ၢ်ပူၤ ဟါခီ ၆ နၣ်ရံၣ်လီၢ်ခံ ၦၤလၢအဟးထီၣ်တၢ်ချၢသ့ၣ်တဖၣ်အံၤ ပယီၤသုးဟးလူၤခး၀ဲဒီးကျိႇဖီၣ်ထၢနုာ်၀ဲလၢဃိာ်ပူၤအဂ့ၢ်န့ၣ် သ့ၣ်ညါဘၣ်လၢကမျၢၢ်တဖၣ်အအိၣ်န့ၣ်လီၤႉ

“ခဲအံၤပယီၤသုးန့ၣ်သူ၀ဲဒၣ်ကၠၤအ့စ့ၣ်ကၠံဒီးမီၣ်လမၠဲၣ်ႇမူၣ်ဒိၤကျဲအံၤတဘူၣ်လၢၤဘၣ်ႉခၠီနခွၣ်တိၤစ့ၢ်ကီးပယီၤသုးသူ၀ဲတဘူၣ်လဲၤ၀ဲတဘူၣ်လၢၤဘၣ်ႉအ၀ဲသ့ၣ်န့ၣ်ဆှၢထီၣ်တၢ်အီၣ်လၢကဘီယူၤဆီတလဲသုးႇဆှၢထီၣ်ကျိချံၦာ်သၣ်ဒ်န့ၣ်ဒု အိၣ်လီၤႉတဘျီတခီၣ်န့ၣ်အ၀ဲသ့ၣ်မၢ၀ဲဒၣ်(BGF)ဒီး(DKBA)တီၣ်န့ၢ်အ၀ဲသ့ၣ်ဒ်န့ၣ်အိၣ်လီၤ”အဂ့ၢ်န့ၣ် (KNLA)ဂံၢ်ခီၣ်ထံး တၢ်ကစီၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တကီၢ်ခါခဲအံၤလၢကညီကီၢ်စဲၣ်ဟီၣ်က၀ီၤတဖၣ်အပူၤတုၤလၢလါယူၤလံႇလါအီကူးဒီးလါစဲးပထ့ဘၢၣ်န့ၣ် ကီၢ်ဆၣ်(၅)ဘ့ၣ်လၢအတပၣ်ဃုာ်ဖၣ်အၣ်ႇလူၣ်ပျဲၢ်အံၤဘၣ်န့ၣ် (KNLA)သုးပာ်ဖှိၣ်နုာ်လီၤခးလဲၤတ့ၢ်လီၤ၀ဲဒြိမ့ၣ်ပိၢ် လၢပယီၤသုးအိၣ်တၢ်လီၢ်ႇ၀ဲၤကျိၤဘၣ်ထွဲ၀ဲၤဒၢးတၢ်လီၢ်တဖၣ်ဒီးတၢ်အိၣ်ခိးခးပယီၤသုးသိလ့ၣ်လၢတၢ်ဘၢၣ်စၢၤႇ တၢ်က၀ီၤခးစဲးပြဲးသုးကီၣ်ကးအသုးကလၢၤတဖၣ်အဃိ တၢ်ဒုးကဲထီၣ်၀ဲကိးမုၢ်နံၤဒဲးအဂ့ၢ်န့ၣ် (KNLA)သုးပာ်ဖှိၣ်တကပၤ စံး၀ဲန့ၣ်လီၤ