လါအီးကထိဘၢၣ် ၂ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲအပူၤကွံာ်လါစဲးပထ့ဘၢၣ် ၃၀ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကရၢခိၣ်လီၢ်လံၤ စီၤမူၤတူစ့ဖိႇ တၢ်ဒီသဒၢ၀ဲၤကျိၤခိၣ်လီၢ်လံၤ ပဒိၣ်ရီကၠၢၣ်ခ့ၤႇ ဒူပျာ်ယာ်ကီၢ်ရ့ၣ် ပဒိၣ်စီၤစွ့ၤမီ လဲၤထံၣ်လိာ်အသးဒီး သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ လၢန့ၣ်ပၠံၣ်တီၣ် ဘယ့ၣ်နီၤဘျီၣ်ပူၤအဂ့ၢ်န့ၣ် သုးကီၣ်ကးအတၢ်ကစီၣ် သန့တဖၣ် ပာ်ဖျါ၀ဲန့ၣ်လီၤႉ
သုးခိၣ်ကျၢၢ်ဒိၣ်စိ စီၤမူၤတူစ့ဖိႇ ပဒိၣ်ရီကၠၢၣ်ခ့ၣ် ဒီး ပဒိၣ်စီၤစွ့ၤမီ တဖၣ်အံၤ လဲၤထံၣ်လိာ်သးအဒီး သုးကီၣ်ကးခိၣ် သုးခိၣ်ကျၢၢ်ဒိၣ်စိ မ့အီၤလဲၤႇ အူယဲ၀့အူႇ သုးခိၣ်နၢ်ဒိၣ်ထီႇ တၢ်ဒုးဘၣ်လိာ်ဖိးဒ့ဒီကလုာ်တၢ်မုာ်တၢ်ခုၣ်တၢ်ထိၣ်ဃူ ကမံးတံာ် သုးခိၣ်ကျၢၢ်ဒိၣ်စိ ယၤပၠ့ၣ်သ့ၣ်တဖၣ်ဒီး တၢ်လဲၤဘျီ၀ဲအံၤအ၀ဲသ့ၣ်တၢၣ်ပီၣ်တဲသကိးဘၣ်ဃးတၢ်မုာ်တၢ်ခုၣ် အဂ့ၢ်အကျိၤသ့ၣ်တဖၣ်အဂ့ၢ်န့ၣ် သုးကီၣ်ကးတကပၤထုးထီၣ်ပာ်ဖျါ၀ဲန့ၣ်လီၤႉ
တကီၢ်ခါခဲအံၤလၢ(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ် ၀ီၢ်ရီဟီၣ်က၀ီၤအပူၤန့ၣ် စးထီၣ်ဖဲအပူၤကွံာ်လါစဲးပထ့ဘၢၣ် ၁၂ သီ တုၤလၢလါစဲးပထ့ဘၢၣ် ၃၀ သီအနံၤ ခီဖျိပယီၤသုးနုာ်လီၤအိၣ်ဆီလီၤသးလၢချၢၣ်တကူၣ်တၢၣ်သ၀ီပူၤအဃိ လီၢ်က၀ီၤကမျၢၢ်အဂၤ(၁၀၀၀၀)ဃၣ်ဃၣ်ဘၣ်ဃ့ၢ်မှံဟးဖျိးဒံး၀ဲတုၤလၢခဲအံၤတစုန့ၣ်လီၤႉ
(ခ့ၣ်အဲၣ်ယူၣ်)ကရၢခိၣ်လီၢ်လံၤ တီခိၣ်ရိၣ်မဲကရူၢ် လဲၤထံၣ်လိာ်သးဒီးသုးကီၣ်ကးအခိၣ်လၢတၢ်ဂ့ၢ်တၢ်ကျိၤ မနုၤလဲၣ်န့ၣ် ခံခီခံကပၤထုးထီၣ်ပာ်ဖျါ၀ဲတအိၣ်ဘၣ် ဘၣ်ဆၣ် အတၢ်လဲၤထံၣ်လိာ်သးအံၤ တမ့ၢ်လၢထံရူၢ်ကီၢ်သဲးႇ တၢ်မုာ်တၢ်ခုၣ်အရီၢ် အသံးအကာ်ကန့ၢ်၀ဲဘၣ်အဂ့ၢ်န့ၣ် ၦၤအိၣ်ခိးဃုသ့ၣ်ညါကညီထံရူၢ်ကီၢ်သဲးဖိတဖၣ် ပဲာ်ထံနီၤဖးစံး၀ဲန့ၣ်လီၤႉ
(ခ့ၣ်အဲၣ်ယူၣ်)ကရၢခိၣ်လီၢ်လံၤ စီၤမူၤတူစ့ဖိ ဒီး ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၤမီ ၂ ဂၤအံၤ ဖဲအပူၤကွံာ်လါအီကူး ၂၉ သီအခါ (ခ့ၣ်အဲယူၣ်)၀ီၢ်ရ့ၣ်ကီၢ်ဆၣ် လီၢ်က၀ီၤကမျၢၢ် ဟ့ၣ်မၤလၤကပီၤအ၀ဲသ့ၣ်လၢတၢ်ဂုာ်ကျဲးစၢး တၢ်မၤလိၣ်ထီၣ် ဖးထီၣ်တၢ်မုာ်တၢ်ခုၣ်ခိၣ်ဖးဒီး ဒ်န့ၣ်အသိးလၢ(ခ့ၣ်အဲၣ်ယူၣ်)တၢ်ကရၢကရိအပူၤအ၀ဲသ့ၣ်မူဒါ တအိၣ်လၢၤ၀ဲဘၣ်ဆၣ် ကဂုာ်ကျဲးစၢးမၤ၀ဲတၢ်လၢကညီဒီကလုာ်တၢ်မုာ်တၢ်ခုၣ်အဂီၢ်လၢကျဲအဘိဘိအဂ့ၢ်န့ၣ် စံးလီၤတ့ၢ်၀ဲဖဲလၢတၢ်ဟ့ၣ်မၤလၤ ကပီၤခိၣ်ဖးတၢ်ရဲၣ်တၢ်ကျဲၤမူးအပူၤန့ၣ်လီၤႉ
