တၢ်နု၁်လီၤခးကၠၤအ့စ့ၣ်ကၠံ၀့ၢ်တၢ်ဒုးကဲထီၣ်အပူၤခံခီခံကပၤတၢ်သံတၢ်ဘၣ်ဒိဘၣ်ထံးအိၣ်

လါနိၣ်၀့ဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ဖဲမဟါလါနိၣ်၀့ဘၢၣ် ၂ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA)သုးပာ်ဖှိၣ်ကရူၢ်နုာ်လီၤခး၀ဲဒီးတၢ်လီၢ်လၢပယီၤသုးအိၣ်ဆီလီၤသး အလီၢ်တဖၣ်ဒီးဖဲန့ၣ်ခံခီခံကပၤ တၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါလါနိၣ်၀့ဘၢၣ် ၂ သီ ဂီၤခီအဆၢကတီၢ် (KNLA)သုးပာ်ဖှိၣ်နုာ်လီၤခး၀ဲကၠၤအ့စ့ၣ်ကၠံ၀့ၢ်ပူၤ သုးကီၣ်ကးအပၢၤကီၢ် ၀ဲၤလီၢ်ႇ ပၢပြး၀ဲၤဒၢးတၢ်လီၢ်သ့ၣ်တဖၣ်ဒီး ဖဲန့ၣ်ခီဖျိသုးကီၣ်ကးကဘီယူၤဟဲက့ၤလီၤစၢၤတၢ်လၢပျီပူၤ အဃိ တၢ်ဒုးဆူၣ်ထီၣ်၀ဲအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဒ်သိးသုးကီၣ်ကးအတၢ်ပၢတၢ်ပြးကပတုာ်ကွံာ်အဂီၢ်န့ၣ်ပလဲၤနုာ်လီၤခးသုးကီၣ်ကးစုတီၤဖီလာ် အ၀ဲၤဒၢးတဖၣ်မီၤနီၤႉဘၣ်ဆၣ်ပၢၤကီၢ်၀ဲၤလီၢ်လၢပလဲၤခးအီၤခဲအံၤန့ၣ်လၢအကပိၤကပၤန့ၣ်ပယီၤသုးကလၢၤအိၣ် ၀း၀းလီၤႉဘၣ်ဆၣ်၀ဲဒၣ်ဒုပတၢ်မၤအိၣ်န့ၣ်ပမၤလီၤႉအတၣ်ဒုတတၣ်ဘၣ်ႇတၢ်ဘၣ်ဒိဘၣ်ထံးဒုအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်နုာ်လီၤခးကၠၤအ့စ့ၣ်ကၠံ၀့ၢ်ပူၤပယီၤသုးတၢ်လီၢ်ဘျီ၀ဲအံၤတၢ်နုာ်လီၤခး၀ဲသုးကီၣ်ကးအပၢၤကီၢ်၀ဲၤလီၢ်ႇ စမံၣ်ဘျီၣ်ႇ (လ၀က)ရူႇပၢပြး၀ဲၤဒၢးသ့ၣ်တဖၣ်ဒီးဒ်န့ၣ်အသိးပယီၤသုးတကပၤသံဘၣ်ဒိဘၣ်ထံးအိၣ်၀ဲဒီး တၢ်မၤန့ၢ်ဃုာ်၀ဲ ကျိချံၦာ်သၣ်တနီၤအဂ့ၢ်န့ၣ် တၢ်ပၢၢ်ဆၢသုးကရူၢ်စံး၀ဲန့ၣ်လီၤႉ

တကီၢ်ခါခဲအံၤလီၢ်က၀ီၤၦၤကမျၢၢ်တနီၤစံး၀ဲလၢတၢ်ပၢၢ်ဆၢသုးကရူၢ်သုးပာ်ဖှိၣ်ဖီၣ်ဂၢၢ်၀ဲကၠၤအ့စ့ၣ်ကၠံ၀့ၢ်န့ၢ်၀ဲဒီး ဘၣ်ဆၣ်ခီဖျိတဒိးန့ၢ်ဘၣ်တၢ်ကစီၣ်တၢ်ဂ့ၢ်တၢ်ကျိၤလီၤတံၢ်လီၤဆဲးဒံးဘၣ်အဃိပာ်ဂၢၢ်ပာ်ကျၢၤအီၤတန့ၢ်ဒံးဘၣ် အဂ့ၢ်န့ၣ် (KNLA)ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်နုာ်လီၤခးပယီၤသုးတၢ်လီၢ်ဖဲကၠၤအ့စ့ၣ်ကၠံ၀့ၢ်ဘျီ၀ဲအံၤအပူၤန့ၣ် (KNLA)သုးပာ်ဖှိၣ်ကရူၢ် (Lion Battalion Commando Special Forces)သုးကျိၤခိၣ်–၂ စီၤလါ ဘၣ်ဟ့ၣ်လီၤကွံာ်အသးသမူဒီး လၢပယီၤသုးတကပၤစ့ၢ်ကီး သံ၀ဲဒၣ်(၂)ဂၤအဂ့ၢ်န့ၣ် တၢ်ကွဲးပာ်ဖျါထီၣ်အီၤဖဲသုးကီၣ်ကးအ(Telegram)ခၠၣ်နၢၣ်ပူၤန့ၣ်လီၤႉ

စးထီၣ်ဖဲ(၂၀၂၂)န့ၣ်တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲကၠၤအ့စ့ၣ်ကၠံ၀့ၢ် ပၢၤကီၢ်၀ဲၤလီၢ်ဒီးပယီၤသုးကလၢၤ တၢ်လီၢ်သ့ၣ်တဖၣ်အံၤခဲအံၤခဲအံၤဒီးဒ်န့ၣ်အသိးခီဖျိပယီၤသုးကဘီယူၤဟဲက့ၤခးလီၤစၢၤတၢ်ႇပယီၤသုးခးလီၤကျိဖးဒိၣ် အဃိ ၦၤကမျၢၢ်သံဘၣ်ဒိဘၣ်ထံးကဲထီၣ်တ့ၢ်အသးအိၣ်၀ဲအဂ့ၢ်န့ၣ် ဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ် န့ၣ်လီၤႉ

လၢကၠၤအ့စ့ၣ်ကၠံ၀့ၢ်ပူၤန့ၣ်ပယီၤသုးခီၣ်သုးရ့ၣ်(ခလရ–၃၂),(ခလရ–၂၈၃)ဒီး(ခလရ–၂၈၄)သ့ၣ်တဖၣ်အံၤ အိၣ်ဆီလီၤသး အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ် စံး၀ဲန့ၣ်လီၤႉ

စှၤသီအတီၢ်ပူၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ နိၣ်တကီကီၢ်ဆၣ် အပူၤ တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲ ကးလံၣ်ခံပယီၤသုးကလၢၤႇကွံလၢၢ်တၢသုးကလၢၤ တကးဒံးဘၣ်နု၁်လီၤခး စ့ၢ်ကီး၀ဲကီးတရံး၀့ၢ် သုးကီၣ်ကးဘၣ်ထွဲအ၀ဲၤကျိၤ၀ဲၤဒၢးတၢ်လီၢ်ဒီး မၠၣ်၀တံၣ်ကီၢ်ဆၣ် ကနဲလ့ပယီၤသုးကလၢၤ သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ