လါနိၣ်၀့ဘၢၣ် ၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ လၢၢ်ဒိၣ်ကီၢ်ဆၣ်အပူၤ ဖဲအပူၤကွံာ်လါအီးကထိဘၢၣ် ၃၀ သီအနံၤ ခီဖျိပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိ(၈)ဂၤအကျါ ပၣ်ဃုာ်၀ဲၦၤဖိသၣ်(၂)ဂၤအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ဖဲလါအီးကထိဘၢၣ် ၃၀ သီ ဟါခီ ၃ နၣ်ရံၣ်တခီအဆၢကတီၢ် ပယီၤသုးခီၣ်သုးရ့ၣ်(ခလရ–၂၆၄) ခးလီၤ (၁၂၀ မမ) ကျိဖးဒိၣ်ခံဖျၢၣ် လီၤတဲာ်ပိၢ်ဖးထီၣ်လၢ(တီၤခ့ၤ)သ၀ီပူၤအဃိ သ၀ီဖိ ဖိသၣ်မုၣ်မၣ်အံၣ်စွ့ၤစ့ၤ(၁၃)နံၣ်ႇ မၣ်သိစွ့ၤစ့ၤဒီပုၢ်၀ဲၢ်မုၣ်(၂)ဂၤဒီး မၣ်သ့သ့(၅၅)နံၣ်ႇအူထွ့တ့ၤ(၅၈)နံၣ်သ့ၣ်တဖၣ်အစုဘၣ်၀ဲဒၣ်ဒီးကျိချံအက့အခီ တဖၣ်အဂ့ၢ်န့ၣ် ချၢၣ်လွံၢ်ထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤကနဲထူဘၠဲ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဖဲအီးကထိဘၢၣ်အသီ(၃၀)ဟါခီ ၃ နၣ်ရံၣ်တခီန့ၣ် ပယီၤသုး(ခလရ–၂၆၄)ခးလီၤကျိးဖဒိၣ်အဃိ ဘၣ်၀ဲဒၣ်ၦၤသ၀ီဖိလွံၢ်ဂၤႉခဲအံၤၦၤသ၀ီလၢအဘၣ်ဒိတဖၣ်န့ၣ်တၢ်ဘၣ်ယိၣ်တအိၣ် လၢၤဘၣ်ႉ ပယီၤသုးအံၤပညိၣ်၀ဲဒၣ် ၦၤကမျၢၢ်ခးလီၤကျိဖးဒိၣ်တပယူာ်ဃီလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါဖဲအပူၤကွံာ်လါအီးကထိဘၢၣ်(၃၀)သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး ချၢၣ်လွံၢ်ထူၣ် ပယီၤသုးကလၢၤဒီးလ့ၤစူၤမိၤတဲပယီၤသုးကလၢၤ ခီၣ်ချ့သုးရ့ၣ်(ခမရ–၂၀)အံၤခးလီၤ၀ဲဒၣ်(၈၁ မမ) ကျိးဖဒိၣ် ကအိၣ်ခဲလၢာ်(၁၉)ဖျၢၣ်ညါအဃိကျိဖးဒိၣ်အံၤလီၤတဲာ်ပိၢ်ဖးထီၣ်လၢပၠ့ၤယ့ၤကၠံသ၀ီႇကွ့ကိသ၀ီႇ ယ့ၤဖၠူၤကၤသ၀ီႇ ရီဘၢၣ်ကျီးႇညီၤပ့ၤကၠံသ၀ီဒီးမံလီၤကိသ၀ီတဖၣ်အံၤအပူၤန့ၣ်လီၤႉ
ခီဖျိကျိဖးဒိၣ်လီၤတဲာ်ပိၢ်ဖးထီၣ်အဃိ(ယ့ၤဖၠူၤကၤ)သ၀ီပူၤ မီၤမ့ခၣ်စီၣ်(၁)နံၣ်ဘျဲၣ်ႇ မၣ်ယိယိ(၃)နံၣ်ႇ မၣ်ခ့ၤမိ၀့ၤ(၂၈)နံၣ် ဒီး ယၤ၀့အီၤ(၂၇)နံၣ်သ့ၣ်တဖၣ်အံၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ န့ၣ်လီၤႉ
ဖဲအပူၤကွံာ်လါအီးကထိဘၢၣ် ၃၀ သီအခါစ့ၢ်ကီး ခီဖျိကညီဒီကလုာ်ဂၢၤသးကရၢ(KNDO) သုးရ့ၣ်(၃) ထုးထီၣ် တၢ်ကလုၢ်လၢ လၢၢ်ဒိၣ်၀့ၢ်ဒီးနၣ်သၤကွ့၀့ၢ်ပူၤ ၦၤလၢအပာ်ဖှိၣ်မၤသကိးတၢ်ဒီးသုးကီၣ်ကးတဖၣ်အံၤ ကဟးထီၣ်ကွံာ်လၢ တၢ်ဖံးတၢ်မၤပူၤဒီး လၢတၢ်န့ၣ်အဃိလီၢ်က၀ီၤကမျၢၢ်တဖၣ်ဘၣ်ယိၣ်လၢတၢ်ဒုးကကဲထီၣ် အဂ့ၢ်န့ၣ် လီၢ်က၀ီၤကမျၢၢ်စံး ၀ဲန့ၣ်လီၤႉ
စးထီၣ်ဖဲ(၂၀၂၃)လါယနူၤအါရံၤတုၤလၢလါအီးကထိဘၢၣ်န့ၣ်ပယီၤသုးကဘီယူၤဟဲခးလီၤတၢ်အိၣ်၀ဲ(၁၀၃)ဘျီဒီး ပယီၤသုးခးလီၤကျိဖးဒိၣ်အိၣ်၀ဲခဲလၢာ်အဖျၢၣ်(၁၅၀၀)ညါန့ၣ်လီၤႉခီဖျိကျိဖးဒိၣ်အံၤအဃိ လီၢ်က၀ီၤကမျၢၢ်သံ၀ဲဒၣ် (၁၈)ဂၤႇဘၣ်ဒိ(၇၈)ဂၤဒီးကမျၢၢ်အဟံၣ်ဟးဂီၤ၀ဲဒၣ်(၇၉)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ် အတၢ်မၤနီၣ်စရီအသိးသ့ၣ်ညါဘၣ်န့ၣ်လီၤႉ
