လါယူၤလံ ၁၆ သီ, ၂၀၂၆ နံၣ်, ခ့ၣ်အဲးစံၣ်
ပှၤတကလုၥ်ကလဲၤထီၣ်လဲၤထီအဂီၢ် တၢ်ပၢတၢ်ြပး,သုးမုၢ်သံၣ်ဘိ,ကမျၢၢ်တဖၣ်တၢ်ပၥ်ဖှိၣ်မၤသကိးမ့အိၣ်မး လဲၤလၢအဂ့ၢ် အကျိၤ ကသ့ဝဲအဂ့ၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤဘီကၠီၤဟဲ စံးလီၤဝဲ ဖဲတနံၤ အံၤ ကညီဒီကလုၥ်ဂၢၤသးကရၢ-KNDO မုၢ်နံၤဆၢက့ၤပှဲၤထီၣ် ၇၉ ဝီတဝီတၢ်ရဲၣ်တၢ်ကျဲၤအပူၤအံၤန့ၣ်လီၤ.
ဖဲတနံၤအံၤလါယူၤလံ ၁၆ သီ ဂီၤခီ ၉း၀၀ နၣ်ရံၣ်အဆၢအတီၢ်န့ၣ် လၢ(KNDO)လီၢ်ခၢၣ်သး မုၣ်အ့ပူၤတၢ်လီၢ်န့ၣ် တၢ်မၤလၤ ကပီၤဝဲ(KNDO)မုၢ်နံၤပှဲၤထီၣ် ၇၉ ဝီတဝီတၢ်ရဲၣ်တၢ်ကျဲၤန့ၣ်လီၤ.
လၢတၢ်ရဲၣ်တၢ်ကျဲၤအပူၤ ပှၤကလုၥ်မ့အိၣ်ဘၣ်ဆၣ်တၢ်ပၢတၢ်ြပး,သုးမုၢ်သံၣ်ဘိ,ကမျၢၢ်ထံဖိကီၢ်ဖိမ့တအိၣ်ဘၣ်န့ၣ် လီၤဂၥ် ဒ်သိး ပှၤလီသံသ့ၣ်အဃိ တၢ်သၢခါအံၤမ့ပၥ်ဖှိၣ်ထီၣ်လိၥ်သးမးပှၤကလုၥ်တၢ်လဲၤထီၣ်လဲၤထီကအိၣ်ဝဲအဂ့ၢ်န့ၣ် (KNLA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤဘီကၠီၤဟဲ စံးလီၤဝဲလၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤ.
အဝဲစံးဝဲလၢ“ပှၤတကလုၥ်ကအိၣ်မူဘၣ်ကျိၤဘၣ်ကျဲလဲၤထီၣ်လဲၤထီအဂီၢ်န့ၣ် တၢ်ပၢတၢ်ြပးကဘၣ်အိၣ်,သုးဂံၢ်ဘါကဘၣ်အိၣ်, ကမျၢၢ်ကဘၣ်အိၣ်. တၢ်သၢခါအံၤမ့ပၥ်ဖှိၣ်မၤသကိးတၢ်န့ၣ်လဲၤထီၣ်လဲၤထီကသ့န့ၣ်လီၤ. သ့ၣ်လၢအကျၢၤန့ၣ်အီၣ်တဲဒၣ်ဒီးအလဲ, အကပိၤ,အဘ့ၣ် တၢ်သၢခါအံၤမ့အိၣ်မးဒိၣ်ထီၣ်ကသ့မူဝဲကသ့လီၤ.သ့ၣ်တနီၤနလဲၤအဲးအဘ့ၣ်န့ၣ်သံကွံၥ်လီၤ.ဒီးတနီၤန့ၣ်အကျီ ဃုၥ်ဒီးအကပိၤန့ၣ်သံလီၤ. အဃိပပှၤကလုၥ်မ့အိၣ်,တၢ်ပၢတၢ်ြပး,သုးဂံၢ်ဘါမ့တအိဘၣ်န့ၣ်ဒ်သိးပှၤလီသံသ့ၣ်အသိးလီၤ.သံဝဲလီၤ. တၢ်ပၢတၢ်ပြးအိၣ်,ကမျၢၢ်အိၣ်ဘၣ်ဆၣ်ပှၤသုးဖိမ့တအိၣ်ဘၣ်န့ၣ်တသ့ဘၣ်အဃိပကဘၣ်လဲၤဃုၥ်အီၤတၢ်သၢခါအံၤလီၤ” စံးဝဲန့ၣ်လီၤ.
လၢတၢ်မၤလၤကပီၤဝဲ(KNDO)မုၢ်နံၤတၢ်ရဲၣ်တၢ်ကျဲၤဘျီဝဲအံၤအပူၤန့ၣ် တၢ်ဟ့ၣ်ထီၣ်သကိးဝဲတၢ်ယူးယီၣ်ဆူကညီဒီကလုၥ် နီၣ်တယၢ် ဃုၥ်ဒီး KNDO-ကညီဒီကလုၥ်ဂၢၤသးကရၢနီၣ်တယၢ် တကတီၢ်ဃီ ဟ့ၣ်ထီၣ်ဃုၥ်စ့ၢ်ကီးတၢ်ယူးယီၣ်ဆူ ခိၣ်နၢ်သိၣ်ဒူ, ထံဖိကီၢ်ဖိကမျၢၢ် လၢအဟ့ၣ်လီၤတ့ၢ်အသးသမူလၢထံကီၢ် ဒီးပှၤကလုၥ်အဂီၢ်သ့ၣ်တဖၣ်အအိၣ်န့ၣ်လီၤ.
တၢ်ဟ့ၣ်တၢ်ဝဲတၢ်ယူးထီၣ်ဝံၤ (KNDO)ဂၢၤသးခိၣ်ကျၢၢ် သုးခိၣ်ကျၢၢ်ဖိ စီၤဆှံလ့ၣ် ကတိၤအိးထီၣ်ဝဲမူးတၢ်ရဲၣ် တၢ်ကျဲၤဝံၤ တၢ်ဖးဖျါထီၣ် ဝဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,(PDF), (ABSDF),(KYO) ကညီပိၥ်မုၣ်ကရၢ(KWO),ဂဲၤဆၢထၢၣ် ကရူၢ်သ့ၣ်တဖၣ်အံၤအလံၥ်ဟ့ၣ်ယုၢ်တဘ့ၣ် စုၥ်စုၥ်န့ၣ်လီၤ.
ဒ်န့ၣ်အသိးလၢတၢ်ရဲၣ်တၢ်ကျဲၤအံၤအပူၤ (KNDO)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤဘီကၠီၤဟဲ ကတိၤဟ့ၣ်ဂံၢ်ဟ့ၣ်ဘါလီၤ တၢ်အမဲၥ်ညါ လီၢ်ခၢၣ်သး ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်သဃဲၤ-၂ ပဒိၣ် စီၤလၣ်ထိ, တၢ်ဒီတဒၢဝဲၤကျိၤ နဲၣ်ရွဲၣ် ပဒိၣ်စီၤန့ၤဧိ, KNLA သုးရိၣ်မဲခိၣ်-၁ သုးခိၣ်ကျၢၢ်ဖိ စီၤတၢ်မျၢ်သီ, လီၢ်ခၢၣ်သး KNPF-ပၢၤကီၢ်ခိၣ်ကျၢၢ်-၂ သုးခိၣ်ဒိၣ်ဂီၢ်ဂ့ၢ် စီၤမူကီၢ်စိ ဃုၥ်ဒီး ခိၣ်နၢ်ဘၣ်ထွဲလၢ အဂၤတဖၣ် ကတိၤ ဟ့ၣ်ဂံၢ်ဟ့ၣ်ဘါ, တဲဖျါထီၣ်ဝဲ(KNDO)ဟဲအိၣ်ထီၣ်ဃုၥ်ဒီးတကီၢ်ခါထံရူၢ်ကီၢ်သဲးတၢ်အိၣ်သး အဂ့ၢ် အကျိၤသ့ၣ်တဖၣ်စုၥ်စုၥ်န့ၣ်လီၤ.
လၢန့ၣ်အမဲၥ်ညါလၢတၢ်ရဲၣ်တၢ်ကျဲၤဘျီဝဲအံၤအပူၤ သုးစကီၤ,သုးစကီၤပြံပတီၢ်ဒီးသုးခိၣ်ဖိပတီၢ်ပၥ်ဖှိၣ်ခဲလၢၥ်(၄)ဂၤ တၢ်သုးထီထီၣ် န့ၢ်ဃုၥ်ဝဲ မူဒါလီၢ်လၤစ့ၢ်ကီးန့ၣ်လီၤ.
ဘၣ်ဃးတၢ်သုးထီထီၣ်န့ၢ်ဝဲသုးဖိသံၣ်ဖိလီၢ်လၤအံၤန့ၣ် (KNDO)ပၢဆှၢဂၢၤသးသုးဂ့ၢ်ဝီခိၣ်-၂ သုးခိၣ်စိ စီၤဆၣ်တူၢ်ဂီၤ စံးဝဲလၢ“ ပသုးထီထီၣ်လီၢ်လၤန့ၣ်အိၣ်ဝဲ(၄)ဂၤ အိၣ်ဝဲသုးခိၣ်ဖိ,သုးစကီၤ,သုးစကီၤပြံသ့ၣ်တဖၣ်မီၤ. သုးဖိလၢတၢ်သုးထီထီၣ်လီၢ်လၤတဖၣ် အံၤကဘၣ်မ့ၢ်ပှၤလၢဒိကနၣ်တၢ်သိၣ်တၢ်သီ,ဒိကနၣ်ခိၣ်နၢ်တၢ်ကလုၢ်,အနၢ်ကဘၣ်လိၤ,တၢ်ဂုၥ်ကျဲးစၢးလၢထံကီၢ်ဒီးပှၤကလုၥ်အဂီၢ် မီၤ.အဃိခိၣ်နၢ်ထံၣ်ဝဲလၢပကဘၣ်သုးထီၣ်န့ၢ်ဝဲအလီၢ်အလၤအဃိတၢ်သုးထီထီၣ်န့ၢ်ဝဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
လါယူၤလံ ၁၆ သီ(KNDO)မုၢ်နံၤဆၢက့ၤလီၤဘၣ်ဘျီဝဲအံၤတဒ်သိးဒီးအပူၤကွံၥ်လီၤဆီန့ၢ်ဒံးနံၣ်လၢအဂၤခီဖျိ စးထီၣ်လၢဂီၤခီ ဂီၤခီဂီၤဂီၤ တုၤဃီၤဝဲဒၣ်လၢတၢ်ရဲၣ်တၢ်ကျဲၤဝံၤ မုၢ်ဃ့ၢ်လီၤ ၁း၃၀ ဃၣ်ဃၣ်တစု အိၣ်ဝဲဒီးတၢ်ဒုၣ်တၢ်အီၣ် တၢ်ရဲၣ်တၢ်ကျဲၤအံၤ န့ၣ်လီၤ.
လၢတၢ်ဒီတဒၢလီၤက့ၤကညီကလုၥ်အသးသမူ,အတၢ်စုလီၢ်ခီၣ်ခိၣ်ဒီး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အတၢ်ဂဲၤလိၥ်အံၤ အဂီၢ် တၢ်ကရၢကရိဒုးအိၣ်ထီၣ်ဝဲ(KNDO)အံၤ ဖဲအပူၤကွံၥ် ၁၉၄၇ နံၣ်လါယူၤလံ ၁၆ သီအံၤလၢ ဝ့ၢ်အ့စ့ၣ် နိၣ်တၢ်မျၢ် တၢ်လီၢ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
