ကညီဖိလၢအတုၤအိၣ်ကီၢ်ဆၢတဖၣ်ပ၁်ဖှိၣ်မၤလၤကပီၤသကိး၀ဲကညီနံၣ်ထီၣ်သီလၢ၀့ၢ်မဲၢ်ဆီး

လါယနူၤအါရံၤ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ်

ဖဲတနံၤအံၤလါယနူၤအါရံၤထီၣ် ၁၁ သီ ဂီၤခီအဆၢကတီၢ်န့ၣ် ကညီဖိလၢအတုၤအိၣ်ဖဲကီၢ်ဆၢတဖၣ် ပာ်ဖှိၣ်မၤလၤကပီၤသကိး၀ဲ(၂၇၆၃)ကညီနံၣ်ထီၣ်သီလၢ၀့ၢ်မဲၢ်ဆီးတၢ်လီၢ်တတီၤဒီး တၢ်ရဲၣ်တၢ်ကျဲၤအံၤဘၣ်တၢ်တီခိၣ် ရိၣ်မဲအီၤလၢခီကီၢ်ကွဲၢ်ကဘီတီၤထီကၠိအံၤန့ၣ်လီၤႉ

ကညီနံၣ်ထီၣ်သီတၢ်ရဲၣ်တၢ်ကျဲၤအံၤဘၣ်တၢ်စးထီၣ်အီၤဖဲဂီၤခီ ၆ နၣ်ရံၣ် လၢတၢ်အီၣ်ဘုသီခိၣ်ဖံဘုယီၤတၢ်ရဲၣ်တၢ်ကျဲၤ ဒီး တကတီၢ်ဃီ၀ဲန့ၣ်ကညီခိၣ်နၢ်ၦၤဘၣ်မူဘၣ်ဒါတဖၣ်ဟ့ၣ်ဂံၢ်ဟ့ၣ်ဘါစံးကတိၤလီၤ၀ဲတၢ်ဘၣ်ဃး ကညီနံၣ်ထီၣ်သီအဂ့ၢ်အကျိၤ တဂၤဘၣ်တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်သိးတၢ်မၤကညီနံၣ်ထီၣ်မူးတၢ်ရဲၣ်တၢ်ကျဲၤဘျီ၀ဲအံၤကကဲထီၣ်လိၣ်ထီၣ်အဂီၢ်တၢ်ရဲၣ်ကျဲၤအီၤဒ်လဲၣ်အဂ့ၢ်န့ၣ် ကညီနံၣ်ထီၣ်သီကကဲထီၣ်လိၣ်ထီၣ်အဂီၢ် ၦၤတီခိၣ်ရိၣ်မဲတၢ်ၦၤဘၣ်မူဘၣ်ဒါလၢအမ့ၢ်စ့ၢ်ကီး(စံၣ်ဒံၣ်စံၣ်)ကၠိခိၣ် စီၤစွ့ၤန့ စံး၀ဲဒၣ်အံၤန့ၣ်လီၤႉ

အ၀ဲစံး၀ဲလၢ“ပကမၤလၤကပီၤကညီနံၣ်ထီၣ်သီအံၤအဂီၢ်န့ၣ်အခိၣ်တိန့ၣ်ပတဲသကိးတၢ်၊ကတဲသကိးတၢ်လၢမ့ၢ်သ့ မ့ၢ်ဘၣ်န့ၣ်တၢ်လီၢ်တခါဂ့ၤတခါဂ့ၤန့ၣ်ပမ့မၤဖှိၣ်ခဲလၢာ်န့ၣ်အဂ့ၤႉအဃိန့ၣ်ပကွၢ်ကဒါက့ၤလၢမဲၢ်ပးဟီၣ်က၀ီၤန့ၣ် ပၦၤကညီဖိအိၣ်အါစ့ၢ်၊၀ံၤဒီးလၢတၢ်အိၣ်သးအဖီခိၣ်န့ၣ်ကွဲၢ်ကဘီကၠိအံၤမ့ၢ်၀ဲဒၣ်ကညီဒီကလုာ်အကၠိအဃိန့ၣ် ပဃုထၢမၤ၀ဲဒၣ်ကညီနံၣ်ထီၣ်သီတၢ်လီၢ်တၢ်ကျဲဖဲအံၤလီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

တၢ်မၤလၤကပီၤကညီနံၣ်ထီၣ်သီဘျီ၀ဲအံၤအပူၤပထံၣ်ဘၣ်စ့ၢ်ကီးတၢ်ပာ်လီၤကွၢ်ကီ၀ဲကညီနံၣ်ထီၣ်သီအတၢ်စံၣ်စိၤ တဲစိၤဟဲကဲထီၣ်အဂ့ၢ်အကျိၤႇကညီခိၣ်နၢ်အတၢ်စံၣ်စိၤတဲစိၤအတၢ်ဂီၤသ့ၣ်တဖၣ်စ့ၢ်ကီးအိၣ်၀ဲန့ၣ်လီၤႉ

အပူၤကွံာ်ခီဖျိတၢ်အိၣ်သးတဂ့ၤဘၣ်အဃိတမၤဘၣ်နံၣ်ထီၣ်သီဘၣ်ဒီးတနံၤအံၤထံၣ်ဘၣ်ၦၤဟဲထီၣ်မၤလၤကပီၤ ကညီနံၣ်ထီၣ်သီဒ်အံၤအဖီခိၣ်ဘၣ်သးမုာ်ဒိၣ်မးအဂ့ၢ်န့ၣ် ခီကီၢ် ကၠိဖိမုၣ် နါသ့ၤစၤယံၤ လၢအဟဲထီၣ်မၤလၤကပီၤ ကညီနံၣ်ထီၣ်သီအံၤ စံး၀ဲဒၣ်န့ၣ်လီၤႉ

အ၀ဲစံး၀ဲလၢ“အပူၤကွံာ်န့ၣ်နံၣ်ထီၣ်သီတအိၣ်ဘၣ်ခီဖျိတၢ်အိၣ်သးတဂ့ၤဘၣ်အဃိမီၤနီၤႉခဲအံၤပထံၣ်ဘၣ်ၦၤကညီဖိဟဲဒီဒူၣ် ပထံၣ်လိာ်ဘၣ်ပသးကညီဖိကဒဲကဒဲဘၣ်ပသးမုာ်ဒိၣ်မးလီၤႉမ့၀ံၤပတတုၤဘၣ်လၢတၢ်လီၢ်ဒ်အံၤန့ၢ်ဖးယံၤလံမီၤနီၤႉ လၢနံၣ်ထီၣ်သီအံၤယအဲၣ်ဒိးဆၢဂ့ၤဆၢ၀ါဘၣ်ၦၤကညီဖိလၢပအိၣ်လၢယိၤကီၢ်မ့ၢ်ဂ့ၤႇဘီကီးမ့ၢ်ဂ့ၤႇ ကီၢ်ပယီၤမ့ၢ်ဂ့ၤ တဘၣ်လိၣ်ပဲာ်ဖးနီၤဖးအဒူၣ်အဆၢတအိၣ်နီမံၤဘၣ်ႉပမၤသကိးနံၣ်ထီၣ်သီတနံၤဃီအံၤပဘၣ်ပာ်ကဖၢလၢပသး” အဂ့ၢ်န့ၣ် စံး၀ဲန့ၣ်လီၤႉ

တကးဒံးဘၣ်အမဲာ်ညါပတဘၣ်မဲာ်ဆှးလီၤပသးလၢပတၢ်ကူတၢ်သိးႇပတၢ်ကတိၤႇလၢပမ့ၢ်ၦၤကညီအံၤဘၣ်ဒီး မ့မ့ၢ်တခီပကဘၣ်ပာ်ဒိၣ်လီၤက့ၤပသးလၢပမ့ၢ်ၦၤကညီပအိၣ်ဒီးတၢ်ကူပကၤႇပတၢ်တိၤႇပတၢ်ဆဲးတၢ်လၤအဂ့ၢ်န့ၣ် နါသ့ၤစၤယံၤ စံးအါထီၣ်၀ဲဒၣ်န့ၣ်လီၤႉ

ဒ်န့ၣ်အသိးကညီနံၣ်ထီၣ်သီအံၤအရ့ဒိၣ်၀ဲဒၣ်လၢကညီဖိအဂီၢ်ထဲလဲၣ်ဒီးဘၣ်မနုၤအဃိအရ့ဒိၣ်၀ဲလဲၣ်န့ၣ် ကွဲၢ်ကဘီကၠိခိၣ် သရၣ် စီၤကၠီၤချ့ဆှူစံး၀ဲဒ်အံၤန့ၣ်လီၤႉ

“ကညီနံၣ်ထီၣ်သီအံၤပဘၣ်ဟံးဃာ်ပၢၤဃာ်အီၤကိးဂၤဒဲးလီၤႉဘၣ်မနုၤပဘၣ်ဟံးဃာ်ပၢၤဃာ်အီၤလဲၣ်န့ၣ် ဒ်သိးပတၢ်ဆဲးတၢ်လၤတလီၤဘၣ်အဂီၢ်န့ၣ်ပကဘၣ်ဟံးဃာ်ပၢၤဃာ်ထုးဖှိၣ်က့ၤအီၤမီၤနီၤႉဘၣ်မနုၤအဃိအရ့ဒိၣ်လဲၣ် န့ၣ်ပကညီတၢ်ဆဲးတၢ်လၤမ့လီၤမၢ်န့ၣ်ၦၤကကျၢၢ်ဘၢနၤညီကၣ်က့းလီၤႉအဃိထီၣ်က့ၤဖိလံၤတဆီဘၣ်တဆီန့ၣ်ဒ်သိး အ၀ဲသ့ၣ်ကသ့ၣ်ညါနၢ်ပၢၢ်၀ဲအဂီၢ်န့ၣ်ပဒုးနဲၣ်ဖျါထီၣ်က့ၤလၢပတၢ်ဆဲးတၢ်လၤလီၤ”အဂ့ၢ်န့ၣ် စံး၀ဲန့ၣ်လီၤႉ

တနံၤအံၤမ့ၢ်၀ဲကညီမုၢ်နံၤဒိၣ်မုၢ်နံၤထီတနံၤလၢကညီဖိခဲလၢာ်အဂီၢ်ဒီးတကးဒံးဘၣ်အမဲာ်ညါမုၢ်နံၤအံၤ ဘၣ်တၢ်မၤလၤကပီၤစ့ၢ်ကီး၀ဲလၢကီၢ်ပူၤကီၢ်ချၢထံဆၢကီၢ်ဆၢဒဲက၀ီၤတၢ်လီၢ်အါတီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးသူၣ်မုာ်သးမုာ်ဒိၣ်မးလၢပထံၣ်ဘၣ်လိာ်သးလၢကညီနံၣ်ထီၣ်သီမူးဘျီ၀ဲအံၤအဂ့ၢ်န့ၣ် သးစၢ်နါမ့ၤမၠိအ့ စံး၀ဲန့ၣ်လီၤႉ

“တနံၤအံၤယထံၣ်ဘၣ်ၦိၢ်ဖိစှီၤဖိအါအါဂီၢ်ဂီၢ်ဒ်အံၤဘၣ်ယသးမုာ်ဒိၣ်မးႉယတထံၣ်ဘၣ်ၦၤကညီအါဂီၢ်ဂီၢ်ဒ်အံၤနီတဘျီဘၣ်ႉ ၦၤကညီဖိဟဲထံၣ်လိာ်သးတနံၣ်တဘျီဒ်အံၤဘၣ်သးမုာ်ဒိၣ်မးႉကညီနံၣ်ထီၣ်သီအံၤမ့ၢ်ကညီတၢ်ဆဲးတၢ်လၤတခါအဃိ အရ့ဒိၣ်၀ဲဒၣ်လၢၦၤကညီဖိကိးဂၤဒဲးအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢတၢ်မၤကညီနံၣ်ထီၣ်သီတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ လီၢ်ခၢၣ်သးထီဘိကမံးတံာ် ပဒိၣ်စီၤသမ့ၤထိႇ ခ့ၣ်အဲၣ်ယူၣ် ကီၢ်ဆၢဂ့ၢ်၀ီမူဒါခိၣ် သုးခိၣ်ဒိၣ်စိ တံစိစိႇ ကၠီၣ်တဲၣ်ၦၤဘၣ်မူဘၣ်ဒါႇတၢ်ဘူၣ်တၢ်ဘါခိၣ်နၢ်ႇၦၤဘၣ်မူဘၣ်ဒါလၢအဂၤတဖၣ်ဃုာ်ဒီးၦၤကၠိဖိသူၣ်ဘီၣ်သးစၢ်ကမျၢၢ်သ့ၣ်တဖၣ်ဟဲထီၣ်၀ဲခဲလၢာ်ကအိၣ်လၢသၢကထိဃၣ်ဃၣ်အဂ့ၢ်န့ၣ် ၦၤလၢအတီခိၣ်ရိၣ်မဲမူးအံၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါနံၣ်ထီၣ်သီတၢ်ရဲၣ်တၢ်ကျဲၤအံၤအပူၤန့ၣ်အိၣ်စ့ၢ်ကီး၀ဲတၢ်ဂဲၤကလံၣ်ဒိႇတၢ်သူၣ်၀ံၣ်သးဆၢႇတၢ်ခးဖျၢၣ်ထူႇ တၢ်ထီၣ်၀ၣ်ဃုာ်ဒီးတၢ်လိာ်ကွဲလၢအဂၤသ့ၣ်တဖၣ်ပၣ်ဃုာ်၀ဲဒၣ်န့ၣ်လီၤႉ