ကၠးအ့စ့ၣ်ကၠံဒီးကၠဲးမယီကီၢ်ဆၣ်ခံဘ့ၣ်အပူၤသုးကီၣ်ကးအသုးကလၢၤတဖၣ်တၢ်ထီၣ်သုတန့ၢ်တဂ့ၤအဂီၢ်သုးကီၣ်ကး ဘှီဂ့ၤထီၣ်တၢ်လီၢ်

လါယနူၤအါရံၤ ၁၇ သီႇ ၂၀၂၄နံၣ်ႇ ခ့ၣ်အဲးစံၣ်

ကၠၤအ့စ့ၣ်ကၠံ ကၠဲးမယီ–ခၠီနခွးမူၣ်ဒိၣ်ကျဲမုၢ်ဒီတဘိအပူၤ သုးကီၣ်ကးအသုးကလၢၤတဖၣ်အံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံၤသုးပာ်ဖှိၣ်ဒီးကမျၢၢ်တၢ်ဒီသဒၢသုးကရူၢ်သ့ၣ်တဖၣ် ထီၣ်ဒုးသုတန့ၢ်တဂ့ၤအဂီၢ်သုးကီၣ်ကးဒီးသုးခိးကီၢ်ဆၢ(BGF)ကတဲာ်ကတီၤမၤအါထီၣ်၀ဲအသုးဂံၢ်ဘါသ့ၣ်တဖၣ် အဂ့ၢ်န့ၣ် ဂံၢ်ခီၣ်ထံးလီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ

တကီၢ်ခါခဲအံၤ(Lion-Battalion)အသုးကျိၤခိၣ်သုးခိၣ်ဂီၢ်ဂ့ၢ်စီၤအဲၣ်စ့၀ါဒီး ဒုးယၤဂ့ၢ်၀ီလီၤဆီကရူၢ်(SOF) အသုးခိၣ်အီၣ်စၣ်ရှါဟဲပာ်ဖှိၣ်မၤသကိးတၢ်အိၣ်၀ဲအဃိသုးကီၣ်ကးဘၣ်ယိၣ်၀ဲလၢတၢ်ကထီၣ်ဒုးအ၀ဲသ့ၣ်သုးကလၢၤသ့ၣ်တဖၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ

အ၀ဲစံး၀ဲလၢ“သုးခိၣ်ကီၢ်ဆၢ(BGF)ပၢၤကီၢ်ဒီးသုးကီၣ်ကးသ့ၣ်တဖၣ်ကတီၤဃာ်အ၀ဲသ့ၣ်တၢ်လီၢ်တၢ်ကျဲႇ ဒူၣ်ထီၣ်ဖိးထီၣ်တ့ထီၣ်၀ဲအသုးကလၢၤတၢ်လီၢ်တဖၣ်လၢအသီဒီးမၤၦဲၤက့ၤ၀ဲအသုးဖိနီၣ်ဂံၢ်လၢကဒုးစၢၤတၢ်သ့ၣ်တဖၣ်သနာ်က့လၢတၢ်ချၢသုးကျိၤတၢ်ဟူးတၢ်ဂဲၤတကပၤဒုမၤ၀ဲတဘူၣ်ဘၣ်ႇအ၀ဲသ့ၣ်အိၣ်ဒၣ်ခိးသမံသမိးတၢ်ဃ့စ့မၤဒၢၣ်မၤလီၤတၢ်လၢကျဲမုၢ်ဖးဒိၣ်တၢ်အိၣ်ခိးတြဲၤအလီၢ်တကပၤလီၤမီၤနီၤဒဒအဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

ဖဲအပူၤကွံာ်(၂၀၂၃)နံၣ်အတီၢ်ပူၤန့ၣ်ကၠဲးမယီခၠီနခွးႇကၠးအ့စ့ၣ်ကၠံႇဟီၣ်က၀ီၤအပူၤသိၣ်မှံၤပာ်ဖှိၣ်တဖၣ် ထီၣ်ဒုး၀ဲသုးကီၣ်ကးအသုးကလၢၤအဃိသုးကီၣ်ကးအသုးကလၢၤတၢ်လီၢ်ႇပၢၤကီၢ်၀ဲၤလီၢ်ဒီးအသုးကျိၤလၢဟူးဂဲၤတဖၣ်ဘၣ်ဒိ၀ဲနးမးအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်တကပၤစံး၀ဲန့ၣ်လီၤႉ

လၢတၢ်န့ၣ်အဃိဖဲတနံၣ်အံၤ(၂၀၂၄)ထီၣ်သီအတီၢ်ပူၤအံၤဒ်သိးတၢ်ထီၣ်ဒုးအ၀ဲသ့ၣ်သုးကလၢၤတဖၣ်သုတန့ၢ်တဂ့ၤအဂီၢ်သုးကီၣ်ကးတဖၣ်အံၤခးလီၤ၀ဲကျိဖးဒိၣ်ဆူ(KNLA)ကညီတၢ်ထူၣ်ဖျဲးသုးမုၢ်ဒိၣ်သိၣ်မှံၤပာ်ဖှိၣ်တဖၣ်ဟူးဂဲၤအိၣ်ဆိးတၢ်လီၢ်အဃိဒူသ၀ီ(၁၅)ဖျၢၣ်ဒီးလီၢ်က၀ီၤဖိအဂၤ(၅၀၀၀)ဃၣ်ဃၣ်ဘၣ်ဃ့ၢ်အိၣ်ကဒု၀ဲအသးအဖၢမုၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

“သုးကီၣ်ကးအသုးဒုးစၢၤတၢ်တဖၣ်ဟဲတုၤအါထီၣ်၀ဲဒီးတၢ်ခးကျိဖးဒိၣ်အလီၢ်တဖၣ်ဘၣ်တၢ်မၤအါထီၣ်၀ဲလၢ အသီအဃိၦၤမၢ၀ဲက၀ီၤဒ့ပူၤကမျၢၢ်တဖၣ်ဃ့ၢ်အိၣ်ကဒုဆိအသးမီၤနီၤႇသုးကီၣ်ကးတဲ၀ဲလၢတၢ်ဒုးမ့ၢ်ကဲထီၣ်ဒုၦၤသ့ၣ်တဖၣ်အံၤတမ့ၢ်ကပူၤဖျဲးဘၣ်ႉအခဲအံၤၦၤတအိၣ်အါအါလၢၤဘၣ်ၦၤဟးအိၣ်က့ၤလၢန့ၣ်လၢအံၤန့ၢ်သၢလါလံႉ ကျးသ့ၣ်တဖၣ်ၦၤအိးထီၣ်ဘူၣ်ဘူၣ်တဘူၣ်ဘူၣ်အဃိလၢကၦ့ၤအီၣ်က့ၤတၢ်အဂီၢ်တၢ်ကီတၢ်ခဲအိၣ်ထီၣ်ဖးယံာ်လံ” အဂ့ၢ်န့ၣ် လီၢ်က၀ီၤဖိလၢအိၣ်ကၠးအ့စ့ၣ်ကၠံထံကၢၢ်နံၤတဂၤစံး၀ဲန့ၣ်လီၤႉ

တကီၢ်ခါခဲအံၤလၢကညီကီၢ်စဲၣ်ကီးတရံးဟီၣ်က၀ီၤအပူၤ(KNLA)ကညီတၢ်ထူၣ်ဖျဲးသုးမုၢ်ဒိၣ်သိၣ်မှံၤသုးပာ်ဖှိၣ်တဖၣ်ထီၣ်ဒုးမၤန့ၢ်၀ဲတီၤကၠးအ့ပၢၤကီၢ်၀ဲၤလီၢ်ဒီးတီၤကၠးအ့တီၤထီကၠိအဘၢၣ်စၢၤသုးကီၣ်ကးအသုးကလၢၤတဖၣ်အိၣ်၀ဲအသိးဟံန့ၢ်၀ဲတၢ်လီၢ်တၢ်ကျဲကးတံာ်ဃာ်၀ဲကီးတရံးႇဃိၣ်သၢဖျၢၣ်ဒီး ကၠၤအ့စ့ၣ်ကၠံ ၀့ၢ်တၢ်လီၢ်တဖၣ်အိၣ်၀ဲအဃိ ခံခီခံကပၤဘၢၣ်စၢၤတၢ်ဖ့ၣ်ဆၢအိၣ်၀ဲအဖၢမုၢ်အဂ့ၢ်န့ၣ် သုးဟီၣ်က၀ီၤတၢ်ကစီၣ်စံး၀ဲန့ၣ်လီၤႉ

တကတီၢ်ဃီသုးကီၣ်ကးအသုးကလၢၤလၢအိၣ်ဆီလီၤအသးလၢကညီကီၢ်စဲၣ်ပူၤတဖၣ်အံၤခီဖျိသူဒြိမ့ၢ်ပိၢ်ႇ တၢ်ဒုးဆူၣ်ထီၣ်၀ဲလၢကီးတရံးဟီၣ်က၀ီၤပူၤအဃိကမျၢၢ်လီၢ်က၀ီၤဖိတဖၣ်သံဘၣ်ဒိဘၣ်ထံးအါထီၣ်၀ဲအဂ့ၢ်န့ၣ် ကီးတရံးၦၤဃ့ၢ်အိၣ်ကဒုဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

ကီးတရံးလီၢ်က၀ီၤဖိတဂၤစံး၀ဲလၢ“သုးကီၣ်ကးအၦၤတဖၣ်ထုးထီၣ်ရၤလီၤ၀ဲတၢ်ကစီၣ်လၢအတမ့ၢ်တတီတဖၣ်ဒီး ပာ်ထီၣ်၀ဲလၢကလံၤကျါတဲ၀ဲလၢၦၤက့ၤအိၣ်က့ၤလၢဟံၣ်န့ၢ်လံတၢ်ခးလိာ်သးတအိၣ်လၢၤဘၣ်အဃိၦၤတနီၤက့ၤအိၣ်က့ၤလၢအဟံၣ်မီၤနီၤႉတုၤၦၤက့ၤအိၣ်လၢဟံၣ်ဘျီအ၀ဲသ့ၣ်ဟဲတ့ၢ်လီၤ၀ဲဒြိမ့ၢ်ပိၢ်လီၤတဲာ်လၢက၀ီၤဒ့အပူၤ၀ံၤဘၣ်ဒိဘၣ်ထံး၀ဲၦၤကညီမီၤႉဟံၣ်သ့ၣ်တဖၣ်က့မ့ၣ်အူအီၣ်ကွံာ်တလီၢ်လီၢ်အဃိၦၤဘၣ်စံၣ်ထီၣ်ကဒီးခဲအံၤခဲအံၤမီၤႉဒ်သိးၦၤကဟဲမၤ စၢၤအဂီၢ်ၦၤဘၣ်ဃ့တၢ်မၤစၢၤလၢၦၤဂၤအအိၣ်မီၤနီၤ”အဂ့ၢ်စံး၀ဲန့ၣ်လီၤႉ

ကီးတရံး၀့ၢ်ပူၤတၢ်ဒုးတံာ်တာ်၀ဲတလါအတီၢ်ပူၤကမျၢၢ်လီၢ်က၀ီၤဖိဒံဖိသၣ်သူၣ်က့သးၦၢ်သံ၀ဲဒၣ်(၂၀)ဂၤဘျဲၣ် ဒီးဘၣ်ဒိဘၣ်ထံး၀ဲခဲလၢာ်အဂၤ(၃၀)ဃၣ်ဃၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉဒ်န့ၣ်အသိးလၢ၀့ၢ်က၀ီၤဒ့ပူၤဒီး သ၀ီပူၤဟံၣ်အဖျၢၣ်(၂၀၀)ဃၣ်ဃၣ်မ့ၣ်အူအီၣ်ကွံာ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ