လါယနူၤအါရံၤ ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃)လၢၢ်ဒိၣ်ကီၢ်ဆၣ်အပူၤ ဖဲမဟါလါယနူၤအါရံၤ ၂၀ သီ ဟါခီ ၆း၃၀ အဆၢကတီၢ်ခီဖျိပယီၤသုးပညိၣ်ခးလီၤကျိဖးဒိၣ်ဆူ ငဖဲၤအ့သ၀ီပူၤအဃိ ၦၤသ၀ီဖိသံ၀ဲဒၣ်တဂၤဒီးဘၣ်ဒိ၀ဲဒၣ်ဖိသၣ်(၁၄)နံၣ်တဂၤအဂ့ၢ်န့ၣ် လၢၢ်ဒိၣ်ကီၢ်ဆၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ
ခီဖျိပယီၤသုးခီၣ်သုးရ့ၣ်(ခလရ–၂၆၄)အံၤခးလီၤကျိဖးဒိၣ်ဆူ ငဖဲအ့သ၀ီပူၤအဃိ ဘၣ်သံ၀ဲၦၤသ၀ီဖိတဂၤႇ ဘၣ်ဒိ၀ဲဖိသၣ်တဂၤဒီးမ့မ့ၢ်ဖိသၣ်လၢအဘၣ်ဒိတဂၤအံၤခီန့ၣ် ဆူၣ်ချ့၀ဲၤကျိၤတကပၤကွၢ်ကဟုကယာ်အီၤအဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ်စံး၀ဲဒၣ်န့ၣ်လီၤႉ
ဘၣ်ဃးဒီးတၢ်ကဲထီၣ်သး၀ဲအံၤန့ၣ် ပဒိၣ်စီၤ၀ါမုၢ်စံး၀ဲလၢ “ဖဲမနၤအသီ ၂၀ လါယနူၤအါရံၤန့ၣ်န့ၣ် ခးလီၤ၀ဲဒၣ်ကျိဖးဒိၣ် ဖဲလၢၢ်ဒိၣ်ကီၢ်ဆၣ်ဟီၣ်က၀ီၤတၢ်ပၢလၢအမ့ၢ်၀ဲဒၣ်(ငဖယ်အင်း)သ၀ီအပူၤမီၤနီၤႉ လီၤတဲာ်ဘၣ်၀ဲဒၣ်ကမျၢၢ်ခံဂၤလီၤႉ အတဂၤခီဘၣ်၀ဲလၢအဟၢဖၢဒီးသံကွံာ်၀ဲဒၣ်မီၤႉ ဒီးအတဂၤခီန့ၣ်ဘၣ်ဒိ၀ဲလၢအခီၣ်လီၤႉ မ့မ့ၢ်လၢၦၤဘၣ်ဒိတဂၤန့ၣ်ဒု ဆူၣ်ချ့၀ဲၤကျိၤကွၢ်ထွဲကဟုကယာ်အီၤလီၤ”အဂ့ၢ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ငဖဲၤအ့သ၀ီဖိလၢအသံတဂၤအံၤန့ၣ်မ့ၢ်၀ဲ ညါတခၠါ(၆၈)နံၣ်ဒီး ၦၤဖိသၣ်လၢအဘၣ်ဒိတဂၤန့ၣ်မ့ၢ်၀ဲ န့ၤလ့ထိ(၁၄)နံၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါဘၣ်ထွဲဒီးတၢ်ခးလီၤကျိဖးဒိၣ်တၢ်ဂ့ၢ်တၢ်ကျိၤအံၤန့ၣ်မ့ၢ်လၢသုးကီၣ်ကးသ့ၣ်တဖၣ်ပာ်၀ဲကမျၢၢ်သ့ၣ်တဖၣ်ဒ်ဒုၣ်ဒါအသိးအဃိ ကွၢ်၀ဲဖဲတၢ်မ့ၢ်လိၤဘၣ်အီၤတကပၤန့ၣ်ခးလီၤ၀ဲကျိဖးဒိၣ်ဆူဒူသ၀ီပူၤဒ်အံၤအဖီခိၣ် တၢ်၀ဲအံၤန့ၣ်မ့ၢ်တၢ်လၢတၢ်တပာ်လုၢ်ပာ်ၦ့ၤကမျၢၢ်ထံဖိကီၢ်ဖိဘၣ်အဂ့ၢ် လၢၢ်ဒိၣ်ကီၢ်ဆၣ်အၦၤကတိၤတၢ်ပၢစံးအါထီၣ်စ့ၢ်ကီး၀ဲဒ်အံၤန့ၣ်လီၤႉ
“ဘၣ်ထွဲဒီးတၢ်ခးလီၤကျိဖးဒိၣ်အဂ့ၢ်အကျိၤခီဒု ဒုၣ်ဒါတဖၣ်ပာ်၀ဲကမျၢၢ်တဖၣ်ဒ်သိးဒီးဒုၣ်ဒါအဃိ ကွၢ်၀ဲလၢဒူသ၀ီ အတၢ်လိၤဘၣ်အီၤဖဲလဲၣ်တဖျၢၣ်န့ၣ်ခးလီၤ၀ဲလီၤမီၤႉ အဃိသးန့ၣ်ပထံၣ်လၢတၢ်ခးလီၤကျိဖးဒိၣ်၀ဲအံၤန့ၣ်မ့ၢ်ဒၣ် တၢ်တပာ်လုၢ်ပာ်ၦ့ၤ၀ဲကမျၢၢ်ဘၣ်ဒီးတပာ်ကမျၢၢ်လၢနီၣ်ဂံၢ်တၢဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ် ကစီၣ်န့ၣ်လီၤႉ
ဒ်န့ၣ်အသိးဖဲပူၤကွံာ်လါယနူၤအါရံၤ(၁၆)သီလၢလၢၢ်ဒိၣ်ကီၢ်ဆၣ်အပူၤပယီၤသုးနုာ်လီၤ၀ဲလၢ အနါဘီၤ သ၀ီပူၤ၀ံၤဖီၣ်၀ဲၦၤသ၀ီဖိ(၄)ဂၤဒီးမၤသံကွံာ်၀ဲဒၣ်န့ၣ်လီၤႉ ၦၤသ၀ီဖိလၢအဘၣ်တၢ်မၤသံအီၤတဖၣ်န့ၣ်မ့ၢ်၀ဲ မီၤစီၣ်မ့သ့ႇ ဖိစီၣ်ဒီး မ့မ့ၢ်လၢအ၀ဲခံဂၤခီန့ၣ် တၢ်ဃုသ့ၣ်ညါအမံၤအဖၢမုၢ်လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
တကတီၢ်ဃီ (ရွှေ၀ါ) ပယီၤသုးရ့ၣ်အံၤစ့ၢ်ကီးခီဖျိအ၀ဲသ့ၣ်ခးလီၤ၀ဲကျိဖးဒိၣ်ဆူ အနါဘီၤ သ၀ီပူၤအဃိဘၣ်သံ၀ဲ ဒီၤမၤမၤအူ(၃၂)နံၣ်ဒီး မီၤစိအီၤ(၃၅)နံၣ်ခံဂၤအံၤအဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ထုးထီၣ်ပာ်ဖျါ၀ဲဖဲလါယနူၤအါရံၤ (၁၈)သီအနံၤန့ၣ်လီၤႉ
