လါယနူၤအါရံၤ ၁၉ သီႇ ၂၀၂၄ နံၣ်ႇ ခ့ၣ်အဲးစံၣ်
ဖဲတလါအံၤလါယနူၤအါရံၤ(၁၅)သီ၊တုၤလၢ(၁၇)သီအနံၤန့ၣ်ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBAမၤ၀ဲ(၁၇)၀ီတ၀ီသုးခိၣ်နၢ်တဖၣ်တၢ်အိၣ်ဖှိၣ်ဖဲသုး၀ဲၤလီၢ်ခိၣ်သ့ၣ်တၢ်လီၢ်အပူၤ၊သုးခိၣ်သုးနၢ်ဒိၣ်ထီတနီၤတဟဲထီၣ်ပၣ်ဃုာ်ပၣ်ဂီၢ်၀ဲတၢ်အိၣ်ဖှိၣ်ဘျီ၀ဲအံၤဘၣ်အဂ့ၢ်န့ၣ် DKBAၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ
လၢသုးခိၣ်နၢ်တၢ်အိၣ်ဖှိၣ်ဘျီ၀ဲအံၤအပူၤသုးခိၣ်နၢ်ဒိၣ်ထီဒ်အမ့ၢ်သုးရိၢ်မဲခိၣ်ကျၢၢ်ခံသုးခိၣ်ကျၢၢ်စိ သုးခိၣ်စီၤတၢ်ခုႇ တီနီၢ်မုၢ်ထီၣ်ဟီၣ်က၀ီၤသုးက့(၁)အသုးက့ခိၣ် သုးခိၣ်ကျၢၢ်ဖိ စီၤစဲကၠီၤလၣ်ဒီး တီနီၢ်မုၢ်နုာ်သုးက့(၂) အဒုးယၤခိၣ် သုးခိၣ်ဒိၣ်စိ သုးခိၣ်စီၤအ့ၤ၀ါသ့ၣ်တဖၣ်တဟဲထီၣ်ပၣ်ဃုာ်ပၣ်ဂီၢ်၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခိၣ်နၢ်ဒိၣ်ထီလၢတဟဲတၢ်အိၣ်ဖှိၣ်သ့ၣ်တဖၣ်စံး၀ဲလၢတၢ်အိၣ်ဆူၣ်အိၣ်ချ့အဃိပၣ်ဃုာ်ပၣ်ဂီၢ်၀ဲတတုၤဘၣ်အဂ့ၢ်န့ၣ် ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ် DKBAသုးဂ့ၢ်၀ီခိၣ် သုးခိၣ်ကျၢၢ်ဖိ စီၤစ့ၤ၀့စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ
“တၢ်အိၣ်ဖှိၣ်ပူၤခိၣ်နၢ်တဟဲထီၣ်ခဲလၢာ်ဘၣ်မီၤဒ်သိးလၢတီနီၢ်မုၢ်နုာ်တကပၤန့ၣ်ခီန့ၣ်သုးခိၣ်အ့ၤ၀ါႇသုးရိၣ်မဲခိၣ်ကျၢၢ်ခံဒီးဒုးယၤခိၣ်သ့ၣ်တဖၣ်န့ၣ်ခီဖျိအတၢ်အိၣ်ဆူၣ်အိၣ်ချ့တဂ့ၤဘၣ်အဃိန့ၣ်တဟဲထီၣ်ပၣ််ဃုာ်ဘၣ်မီၤနီၤႉကိးဘျီခီန့ၣ် ပမ့မၤတၢ်အိၣ်ဖှိၣ်န့ၣ်အါတက့ၢ်ပမၤထဲတသီလီၤႉတဘျီညါအံၤခီတံာ်တာ်သၢသီညါမီၤနီၤပတဲအိၣ်သကိးတၢ်ဘျဲးဘျဲးဘျီးဘျီးလီၤမီၤ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါဖဲတၢ်အိၣ်ဖှိၣ်သၢသီအတီၢ်ပူၤန့ၣ်ၦၤဟဲထီၣ်တၢ်အိၣ်ဖှိၣ်ဖိတဖၣ်ပာ်ဖျါထီၣ်သကိး၀ဲလီၢ်က၀ီၤပူၤ တၢ်ကီတၢ်ခဲတၢ်အိၣ်သးသ့ၣ်တဖၣ်ဒီးတၢၣ်ပီၣ်ကတိၤသကိး၀ဲတၢ်ဖျိဖျိဖျါဖျါဟ့ၣ်ဂံၢ်ဟ့ၣ်ဘါဟ့ၣ်ကူၣ်ဟ့ၣ်ဖးလိာ်သးကဒဲကဒဲအမဲာ်ညါကတိၤသကိး၀ဲတကီၢ်ခါခဲအံၤထံရူၢ်ကီၢ်သဲးတၢ်အိၣ်သးဒီးဒ်သိးဟီၣ်က၀ီၤပူၤကမျၢၢ်လီၢ်က၀ီၤဖိတဖၣ်ကအိၣ်ဘၣ်ဘံၣ်ဘံၣ်ဘၢဘၢအဂီၢ်ကဖီၣ်လိာ်စုမၤသကိးတၢ်ဒီးဖီၣ်စုက၀ဲၤကရူၢ်ကရၢကိးဖုဒဲးအဂ့ၢ်န့ၣ် သုးခိၣ်ကျၢၢ်ဖိ စီၤစ့ၤ၀့ စံးအါထီၣ်၀ဲန့ၣ်လီၤႉ
လၢတၢ်အိၣ်ဖှိၣ်ဘျီ၀ဲအံၤန့ၣ်ခီဖျိလၢခိၣ်နၢ်ဒိၣ်ထီတပၣ်ဃုာ်ပၣ်ဂီၢ်ခဲလၢာ်ဘၣ်အဃိ လၢတၢ်ကက့ၤကွၢ်ကဒါက့ၤ ၂၀၂၃ နံၣ်တၢ်မၤအကျိၤအကျဲစ့ၢ်ကီးတကဲထီၣ်ဘၣ်အသိး လၢတၢ်ကပာ်လီၤ ၂၀၂၄ နံၣ် တၢ်မၤအကျိၤအကျဲအဂီၢ် တၢ်ဆၢတဲာ်သ့ၣ်တဖၣ်စ့ၢ်ကီးတၢ်မၤအီၤတကဲထီၣ်နီတမံၤဘၣ်အဂ့ၢ်န့ၣ် ဒံၣ်ခ့ၣ်ဘံၣ်အ့ၣ် ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲတၢ်မၤ၀ဲသုးခိၣ်နၢ်တၢ်အိၣ်ဖှိၣ်အပူၤန့ၣ်သုးရိၣ်မဲခိၣ်ကျၢၢ် စီၤစတံႇ လီၢ်ခၢၣ်သးခီၣ်တဃာ်ဒုးယၤခိၣ် သုးခိၣ်စီၤဆါအီၤႇကျိၣ်ထူဘီလီၢ်ခၢၣ်သးသုးက့ခိၣ် သုးခိၣ် စီၤစွ့ၤ၀ၣ်ႇ သုးက့ဒုးယၤခိၣ်ဃုာ်ဒီး ဒံၣ်ခ့ၣ်ဘံၣ်အ့ၣ် သုးခိၣ်သုးနၢ်ဖိတဖၣ်ဟဲထီၣ်၀ဲခဲလၢာ်အိၣ်၀ဲ(၁၅၀)ဃၣ်ဃၣ်န့ၣ်လီၤႉ
တၢ်ဘၣ်ဘျူးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် DKBAအံၤ မ့ၢ်၀ဲကညီဖီၣ်စုက၀ဲၤအကျါ ဖီၣ်စုက၀ဲၤကရူၢ်ကရၢတဖုလၢ အဆဲးလီၤတ့ၢ်ထံကီၢ်ဒီဘ့ၣ်တၢ်ပတုာ်တၢ်ခး NCA ဖဲ ၂၀၁၅ နံၣ်ဒီး ဒ်န့ၣ်အသိးတကီၢ်ခါခဲအံၤဘၣ်တၢ်တီခိၣ်ရိၣ်မဲ အီၤလၢသုးရိၣ်မဲခိၣ်ကျၢၢ် စီၤစတံအံၤ န့ၣ်လီၤႉ
