လါယနူၤအါရံၤ ၂၃ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃)လၢၢ်ဒိၣ်ကီၢ်ဆၣ်အပူၤ ဖဲမဟါလါယနူၤအါရံၤ ၂၂ သီ ဟါခီ(၉း၁၀)မံးနံးအဆၢကတီၢ် ခီဖျိပယီၤသုးခီၣ်သုးရ့ၣ်(ခလရ–၂၆၄) ခးလီၤကျိဖးဒိၣ်(၁၂၀ မမ)ဆူ ကၠီကိသ၀ီပူၤအဃိလီၢ်က၀ီၤကမျၢၢ်ဘၣ်ဒိ(၅)ဂၤအကျါပာ်ဃုာ်၀ဲပိာ်မုၣ် ၁ တဂၤအဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢလၢၢ်ဒိၣ်ကီၢ်ဆၣ်ဟီၣ်က၀ီၤအပူၤဒူသ၀ီကိးဖျၢၣ်ဒဲးဃၣ်ဃၣ်ဘၣ်ကွၢ်ဆၢမဲာ်၀ဲဒၣ် ပယီၤသုးအတၢ်ခးလီၤကျိဖးဒိၣ်ဆူဒူသ၀ီပူၤအိၣ်၀ဲတလီၢ်လီၢ်အဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ
“ဘၣ်ထွဲဒီးဒုၣ်ဒါခးလီၤကျိဖးဒိၣ်လၢဒူသ၀ီပူၤခီန့ၣ် ပကွၢ်က့ၤန့ၣ်စးထီၣ်ဖဲသုးဟံန့ၢ်ဆူၣ်ထံကီၢ်တၢ်စိတၢ်ကမီၤ ၀ံၤအလီၢ်ခံန့ၣ် ဒူသ၀ီကိးဖျၢၣ်ဒဲးဃၣ်ဃၣ် လၢလၢၢ်ဒိၣ်ကီၢ်ဆၣ်ဟီၣ်က၀ီၤအပူၤခီဒု ဘၣ်ကွၢ်ဆၢမဲာ်၀ဲဒၣ်တၢ်၀ဲအံၤန့ၣ် သ၀ီကိးဖျၢၣ်ဒဲးဃၣ်ဃၣ်န့ၣ်ပတဲသ့လီၤမီၤ”အဂ့ၢ်န့ၣ် စံး၀ဲန့ၣ်လီၤႉ
ခီဖျိပယီၤသုးခးလီၤကျိဖးဒိၣ်အဃိ ကၠီကိ ၦၤသ၀ီဖိလၢအဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်၀ဲ ကိၤလါမ့(၅၃)နံၣ်ႇ စ့ၤထ့(၅၂)နံၣ်ႇ ဖိကၠီၤ၀့(၆၈)နံၣ်ႇ ဘူကၠံ(၁၅)နံၣ် ဒီး မၣ်မ့ၤသဲၣ်နဲၤ(၅၂)နံၣ်သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးလၢၢ်ဒိၣ်ကီၢ်ဆၣ်အပူၤ စးထီၣ်တလါအံၤလါယနူၤအါရံၤ(၂၀)သီတုၤ(၂၂)သီလၢသၢသီအတီၢ်ပူၤအံၤ ခီဖျိပယီၤသုးခီၣ်သုးရ့ၣ်(ခလရ–၂၆၄)အံၤ ခးလီၤကျိဖးဒိၣ်လၢ ငဖဲၤအ့သ၀ီႇ လ့ၣ်ပ့ၤ၀ဲႇ ၀ါခၠဲဒီးကၠီကိသ၀ီသ့ၣ်တဖၣ်အံၤအပူၤအဃိ ၦၤကမျၢၢ်ဘၣ်ဒိ၀ဲခဲလၢာ်(၉)ဂၤႇ သံ၀ဲဒၣ်(၁)ဂၤအဂ့ၢ်န့ၣ် သ့ၣ်ညါလၢလၢၢ်ဒိၣ်ကီၢ်ဆၣ် ၦၤဘၣ်မူဘၣ်ဒါ အအိၣ်န့ၣ်လီၤႉ
တကးဒံးဘၣ်ဖဲလါယနူၤအါရံၤ(၂၁)သီအနံၤစ့ၢ်ကီး နၣ်သၤကွ့ကမျၢၢ် တံမီၤယီလၤ(၆၀)နံၣ်အံၤ ဖဲအဟဲက့ၤဟံန့ၢ်တၢ်ဖိတၢ်လံၤလၢဟံၣ်အဆၢကတီၢ်ပယီၤသုးလၢအိၣ် နၣ်သၤကွ့တဖၣ်ဖီၣ်အီၤဒီး တုၤတကီၢ်ခါခဲအံၤတၢ်တပျၢ်လီၤအီၤဒံးဘၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲ တနံၤအံၤလါယနူၤအါရံၤ(၂၃)အနံၤန့ၣ်လီၤႉ
