လါဖ့ၤဘြူၤအါရံၤ ၂၆ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် သုးက့(၃) လၢၢ်ဒိၣ်ကီၢ်ဆၣ်အပူၤ ဖဲပူၤကွံာ်မဟါလါဖ့ၤဘြူၤအါရံၤ(၂၅)သီအနံၤန့ၣ် ခီဖျိသုးကီၣ်ကးအကဘီယူၤဟဲခးလီၤတၢ်လၢ ကညီဒီကလုာ်ပၢၤကီၢ်သုး(KNPF)တၢ်လီၢ်အဃိသုးကီၣ်ကးအၦၤသံ(၁)ဂၤဒီးဘၣ်ဒိ၀ဲဒၣ်(၁၄)ဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲဒၣ်န့ၣ်လီၤႉ
စးထီၣ်ဖဲဂီၤခီ (၁၀း၃၀) အဆၢကတီၢ်န့ၣ် ခီဖျိပယီၤသုးအ(Helicopter)ကဘီယူၤဟဲခးလီၤတၢ်လၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် ကျီးမီၤခိၣ်သ၀ီၤဃၢၤကညီဒီကလုာ်ပၢၤကီၢ်သုး(KNPF)တၢ်လီၢ်တစှၤန့ၢ် (၁၆)ဘျီအဃိသုးကီၣ်ကးအၦၤလၢ(KNPF)ဖီၣ်ဃာ်၀ဲလၢတၢ်ကမၣ်ပူၤသ့ၣ်တဖၣ်အံၤသံဘၣ်ဒိဘၣ်ထံး၀ဲဒၣ်ဒီး တကးဒံးဘၣ်(KNPF)ပၢၤကီၢ်တၢ်သူၣ်ထီၣ်သ့ၣ်တဖၣ်စ့ၢ်ကီးဟးဂီၤ၀ဲဒၣ်အိၣ်အဂ့ၢ်န့ၣ် လၢၢ်ဒိၣ်ၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ
ဘၣ်ဃးဒီးတၢ်ကဲထီၣ်သးအံၤန့ၣ်လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံး၀ဲလၢ “ဘၣ်ထွဲဒီးတၢ်ကဲထီၣ်သးဖဲမဟါအခါန့ၣ်ဒုၣ်ဒါကဘီယူၤဒုးသုးဟဲနုာ်လီၤခး၀ဲဒၣ်လၢၢ်ဒိၣ်ကီၢ်ဆၣ်ပၢၤကီၢ်သုးကလၢၤမီၤနီၤႉ မ့မ့ၢ်လၢသုးကီၣ်ကးကဘီယူၤန့ၣ်ဟဲ၀ဲဒၣ်(၆)ဘ့ၣ်ဒီး(Helicopter)ကဘီယူၤန့ၣ်ဟဲတဘ့ၣ်ႇ ဟဲခးလီၤ၀ဲဒၣ်ခီန့ၣ်အိၣ်၀ဲခဲလၢာ်(၁၅)ဘျီလီၤႉ ၦၤလၢအဘၣ်ဒိန့ၣ်အိၣ်၀ဲ(၁၄)ဂၤႇ သံ(၁)တဂၤမီၤနီၤႉ ဖဲန့ၣ်န့ၣ်ဒုၣ်ဒါအကဘီယူၤလၢဟဲခးလီၤတၢ်ဖဲသုးကလၢၤအံၤန့ၣ်ၦၤလၢအဘၣ်ဒိ(၁၄)ဂၤဒီးသံ(၁)သ့ၣ်တဖၣ်အံၤန့ၣ်မ့ၢ်၀ဲဒုၣ်ဒါအပၢၤ (ၦၤလၢအမၤသကိးတၢ်ဒီးဒုၣ်ဒါ) မီၤနီၤႉ ဒုၣ်ဒါအၦၤသ့ၣ်တဖၣ်အံၤန့ၣ်ဒ်ပၢၤကီၢ်တၢ် မၤကျဲအိၣ်အသိးပကၢာ်ဃာ်အီၤဖဲန့ၣ်မီၤနီၤႉ ဖဲပကၢာ်ဃာ်အ၀ဲသ့ၣ်အဆၢကတီၢ်ဒီးအ၀ဲသ့ၣ်အကဘီယူၤဟဲ ခးလီၤတၢ်အဃိဘၣ်ဒိဘၣ်ထံးက့ၤအ၀ဲသ့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ကညီတၢ်ကစီၣ် န့ၣ်လီၤႉ
လၢန့ၣ်အမဲာ်ညါတၢ်တနံၤဃီ၀ဲအံၤပယီၤသုးကဘီယူၤဟဲခးလီၤ၀ဲတၢ်(၁၆)ဘျီဒီးတကးဒံးဘၣ် ခးလီၤဃုာ်စ့ၢ်ကီး(အီၤလံကၢး)ကျိစဲးလးဒီးကျိဖးဒိၣ်အါအါဂီၢ်ဂီၢ်အဃိ ဘၣ်ဟးဂီၤကွံာ်၀ဲကျီးမီၤခိၣ်သ၀ီ သီခါဖၠၣ်တဖျၢၣ်ဒီးတၢ်သွၣ်ခိၣ်တၢ်သူၣ်ထီၣ်တဖျၢၣ်အဂ့ၢ်န့ၣ် သ့ၣ်ညါန့ၣ်လီၤႉ
သုးကီၣ်ကးအံၤလၢပူၤကွံာ်လၢညါလံၤလံၤဒ်သိးပ၀ဲကညီဖိပကအိၣ်ဒီးတၢ်စံၣ်ညီပၢလီၤက့ၤသးအဂီၢ်န့ၣ် တမ့ၢ်အ၀ဲသ့ၣ်ကဟ့ၣ်တၢ်ပျဲဘၣ်အဃိပညိၣ်ဟဲခးလီၤ၀ဲတၢ်ဒီးကဘီယူၤဒ်အံၤလီၤအဂ့ၢ်န့ၣ် ပဒိၣ်စီၤအါမုၢ်စံးအါထီၣ်၀ဲဒ်အံၤန့ၣ်လီၤႉ
“အ၀ဲသ့ၣ်ဟဲခး၀ဲအတၢ်ပညိၣ်ခီန့ၣ်ဒုၣ်ဒါသ့ၣ်တဖၣ်အံၤလၢပျၢၤလံလံဒ်သိးပနီၢ်ကစၢ်ကစံၣ်ညီၣ်ပၢလီၤက့ၤအသးအဂီၢ်န့ၣ်တမ့ၢ်လၢကဟ့ၣ်တၢ်ပျဲဘၣ်ႉဒ်န့ၣ်အသိးပၢၤကီၢ်သုးကလၢၤအံၤမ့ၢ်၀ဲဒၣ်သုးကလၢၤတခါလၢအဟူးဂဲၤမၤ၀ဲဒၣ်သဲးစးတၢ်ဒိၣ်စိတၢ်မၤအဃိဒီးပကွၢ်ကဒါက့ၤလၢလၢၢ်ဒိၣ်ကီၢ်ဆၣ်ဟီၣ်က၀ီၤအပူၤကမျၢၢ်ထံဖိကီၢ်ဖိသ့ၣ်တဖၣ်သဲးစးတၢ်ဒိၣ်စိကအိၣ်အဂီၢ်န့ၣ်(ထံမီ၀့ၤထၣ်)ပၢၤကီၢ်သုးကလၢၤအံၤဟူးဂဲၤမၤ၀ဲဒၣ်အဖီခိၣ်သုးကီၣ်ကးအံၤဟဲမၤ၀ဲဒၣ်ဒ်အံၤလီၤ”အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
တကီၢ်ခါခဲအံၤလၢချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ တၢ်ဒုးတၢ်ယၤကဲထီၣ်တအိၣ်ဘၣ် ဘၣ်ဆၣ် ခီဖျိပယီၤသုးအံၤခးလီၤကျိဖးဒိၣ်ႇ ကဘီယူၤစ့ၢ်ကီဟဲခးလီၤတၢ်လၢလီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤ အီၣ်လီၢ်ကျဲပူၤဟဲအါထီၣ်၀ဲအဃိၦၤကမျၢၢ်သံဘၣ်ဒိဘၣ်ထံး၀ဲဒၣ်အိၣ်ဒီးတကးဒံးဘၣ် ဘၣ်ကွၢ်ဆၢမဲာ်၀ဲ တၢ်ပျံၤတၢ်ဖုးတၢ်ကီတၢ်ခဲအကလုာ်ကလုာ်အဂ့ၢ်န့ၣ်ၦၤမၤစၢၤၦၤဃ့ၢ်မှံဟးဖျိးစံး၀ဲအသိးသ့ၣ်ညါဘၣ်န့ၣ်လီၤႉ
