လါဖ့ၤဘြူၤအါရံၤ ၁ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤအပူၤ လၢသၢနံၣ်အတီၢ်ပူၤန့ၣ် ကမျၢၢ်ၦၤဃ့ၢ်မှံဟးဖျိးအနီၣ်ဂံၢ် အိၣ်၀ဲ(၇၀၀ႇ၀၀၀)ဘျဲၣ်အဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုာ်တၢ်ခုၣ်ၦာ်ဘျးစဲ ကရူၢ် (KPSN)ထုးထီၣ်ပာ်ဖျါ၀ဲဖဲ တနံၤအံၤလါဖ့ၤဘြူၤအါရံၤ ၁ သီအနံၤ န့ၣ်လီၤႉ
လၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤစးထီၣ်(၂၀၂၁)လါယနူၤအါရံၤ တုၤလၢ(၂၀၂၃)လါဒံၣ်စ့ဘၢၣ် လၢသၢနံၣ်အတီၢ်ပူၤ ခီဖျိဟီၣ်က၀ီၤပူၤတၢ်အိၣ်သးအကလုာ်ကလုာ်အဃိ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ ခဲလၢာ်(၇၅၂၆၆၉)ဂၤအဂ့ၢ်န့ၣ် (KPSN)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဘၣ်ဃးဒီးၦၤဃ့ၢ်မှံဟးဖျိးနီၣ်ဂံၢ်ဟဲအါထီၣ်အဖီခိၣ်အံၤ(KPSN)ၦၤနဲၣ်တၢ် နီၢ်၀ါခုၣ်ဆှံ စံး၀ဲလၢ“ခဲအံၤခီဖျိ တၢ်ဒုးတၢ်ယၤ ဆူၣ်ထီၣ်ပယီၤသုးတၢ်လီၢ်တၢ်ကျဲလီၤက့ၤအဖီခိၣ်အ၀ဲသ့ၣ်သူအါက့ၤလၢကဘီယူၤႇခးလီၤကျိဖးဒိၣ် အဃိ ၦၤဖံးအီၣ် မၤအီၣ်က့ၤလၢသ၀ီတသ့လၢၤဘၣ်ၦၤဘၣ်စံၣ်မှံဟးဖျိးမီၤနီၤႉသ၀ီလၢအိၣ်ဘူးဒီးပယီၤသုးကလၢၤတဖၣ်နါက့ဘၣ်ဃ့ၢ်မှံဟးဖျိးထီၣ်ဒ်န့ၣ်မီၤနီၤႉဒီးအဂၤတခါတၢ်ဒုးမ့ကဲထီၣ်န့ၣ်ကဘီယူၤန့ၣ်ဟးကွံာ်နၢၤတၢ်အဃိၦၤက့ၤ မၤအီၣ်တၢ်တဘူၣ် လၢၤဘၣ် သ၀ီတဖၣ်န့ၣ်အါဒၣ်တက့ၢ်ဘၣ်အိၣ်ခူသူၣ်က့ၤလၢၦၢ်ပူၤအဃိပထံၣ်ဘၣ်လၢၦၤနီၣ်ဂံၢ်န့ၣ်အါထီၣ်၀ဲ(၇)ကလီၢ်ဘျဲၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါတကီၢ်ခါခဲအံၤၦၤဃ့ၢ်မှံဟးဖျိးသ့ၣ်တဖၣ်အဂီၢ်လိၣ်ဘၣ်၀ဲဒၣ်ဂံၢ်ခီၣ်ထံးတၢ်အီၣ်မိၢ်ၦၢ်ဟုသးဒီး ဒ်န့ၣ်အသိးလၢၦၤဃ့ၢ်မှံဟးဖျိးအဂၤ(၇)ကလီၢ်ဘျဲၣ်အံၤအဂီၢ်လၢ(၁၂)လါတနံၣ်အဂီၢ်လိၣ်ဘၣ်၀ဲဒၣ်စ့ဒီၣ်လၣ်(၆၆) ကကွဲၢ် အဂ့ၢ်န့ၣ် သရၣ်မုၣ် နီၢ်၀ါခုၣ်ဆှံ စံးအါထီၣ်၀ဲဒၣ်န့ၣ်လီၤႉ
ဒ်(KPSN)လံာ်တၢ်ပာ်ဖျါပူၤအသိးန့ၣ်ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤပူၤန့ၣ် ကမျၢၢ်ၦၤဃ့ၢ်မှံဟးဖျိး အနီၣ်ဂံၢ်အိၣ်၀ဲ(၁၄၃ႇ၅၂၉)ဂၤႇတီအူကီၢ်ရ့ၣ်(သုးက့ ၂)န့ၣ်အိၣ်၀ဲ(၂၀၁ႇ၅၂)ဂၤႇချၢၣ်လွံၢ်ထူၣ်ကီၢ်ရ့ၣ်(သုးက့ ၃) န့ၣ်အိၣ်၀ဲ (၂၄၈ႇ၁၆၀)ဂၤႇဘျံးဒ၀ဲၢ်ကီၢ်ရ့ၣ်(သုးက့ ၄)န့ၣ်အိၣ်၀ဲ(၇၅ႇ၁၈၅)ဂၤႇမုၢ်တြီၢ်ကီၢ်ရ့ၣ်(သုးက့ ၅)န့ၣ်အိၣ်၀ဲ (၉၁ႇ၆၉၃)ဂၤႇ ဒူပျာ်ယာ်ကီၢ်ရ့ၣ်(သုးက့ ၆)န့ၣ်အိၣ်၀ဲ(၁၅၀ႇ၉၆၉)ဂၤဒီးမ့မ့ၢ်လၢဖၣ်အၣ်ကီၢ်ရ့ၣ်(သုးက့ ၇)ခီန့ၣ် ၦၤဃ့ၢ်မှံဟးဖျိးနီၣ်ဂံၢ် အိၣ်၀ဲ(၂၂ႇ၉၈၁)ဂၤ အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤဘၣ်တၢ်ဆီၣ်ထွဲမၤစၢၤအ၀ဲသ့ၣ်လၢ(Karen Office of Relief and Development) တၢ်ကရၢကရိလၢအပၣ်ဃုာ်၀ဲကညီတၢ်ကရၢကရိသ့ၣ်တဖၣ်ဒီး တၢ်ဆီၣ်ထွဲတနီၤန့ၣ် အိၣ်ဟဲ၀ဲဒၣ်လၢနီၢ်တဂၤတၢ်မၤဘူၣ် စ့ၢ်ကီးအိၣ်၀ဲအဂ့ၢ်န့ၣ် (KPSN)ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါလၢတၢ်ဆီၣ်ထွဲမၤစၢၤတကပၤန့ၣ်ပဃ့ထီၣ်ထံဂုၤကီၢ်ဂၤသ့ၣ်တဖၣ်လၢကယဲၢ်မ့ၢ်တၢ်ဆီၣ်ထွဲမၤစၢၤ န့ၣ်ကြၢးဟဲခီဖျိ၀ဲဒၣ်လၢကညီကရူၢ်ကရၢလၢအအိၣ်ပာ်စၢၤဟူးဂဲၤပာ်စၢၤလၢဟီၣ်က၀ီၤပူၤအအိၣ်တဆီဒီး သုတမ့ၢ်လၢထံဂၤကီၢ်ဂၤတၢ်ကရၢကရိလၢတၢ်ချၢဟဲ၀ၣ်နုာ်လီၤဘၣ်အဂ့ၢ်န့ၣ် (KPSN)ၦၤဘၣ်မူဘၣ်ဒါစံး၀ဲန့ၣ်လီၤႉ
စးထီၣ်(၂၀၂၁)သုးဟံးန့ၢ်တၢ်စိတၢ်ကမီၤတုၤလၢခဲအံၤန့ၣ်ဒုးယၤတၢ်ဖ့ၣ်ဆၢအိၣ်ထီၣ်၀ဲဒၣ်လၢကီၢ်ပယီၤတၢ်လီၢ် သကုၤဆးဒးဒီးဖဲန့ၣ်ခီဖျိပယီၤသုးအံၤခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်အဃိကညီကလုာ်ကမျၢၢ်ထံဖိကီၢ်ဖိဃုာ်ဒီးကလုာ်ဒူၣ်လၢအဂၤသ့ၣ်တဖၣ်စ့ၢ်ကီးဘၣ်ဃ့ၢ်ထီၣ်အိၣ်၀ဲဒၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
