လါဖ့ၤဘြူၤအါရံၤ ၁၅ သီ ˜ ၂၀၂၄ နံၣ် ˜ ခ့ၣ်အဲးစံၣ်
လၢကဟဲတလါအံၤလါဖ့ၤဘြူၤအါရံၤ(၁၇)သီအနံၤန့ၣ် KYOကပာ်ဖှိၣ်သးကမၤ၀ဲ “ကျိၣ်ကညီၢ်ကွဲၤဟူကိးဖှိၣ်” တၢ်ဒ့တၢ်အူတၢ်ဃုစ့ပာ်ကီၤအမူးလၢကညီၦၤဃ့ၢ်မှံဟးဖျိးတဖၣ်အဂီၢ်အဂ့ၢ်န့ၣ် ကညီသးစၢ်ကရၢ(KYO) ထုးထီၣ်ဒုးသ့ၣ်ညါလီၤ၀ဲလၢအ(FacebookPage)ပူၤန့ၣ်လီၤႉ
ကီၢ်သူလ့ၤဟီၣ်က၀ီၤအပူၤကညီကမျၢၢ်လၢအဃ့ၢ်တၢ်ဒုးတဖၣ်ကဒိးန့ၢ်ဘၣ်တၢ်ဆီၣ်ထွဲမၤစၢၤအဂီၢ်န့ၣ်လၢကဟဲ(၁၇) သီအနံၤန့ၣ်ကညီသးစၢ်ကရၢ(KYO)ကလုာ်ဒူၣ်ပာ်ဖှိၣ်တၢ်ဒုးနဲၣ်ဖျါထီၣ်တၢ်ပာ်သးကမံတံာ်(GSCN) ဒီး ကညီဒွဲလၤကရၢKAA(Karen Art Association)သ့ၣ်တဖၣ်အံၤကပာ်ဖှိၣ်ထီၣ်သးမၤ၀ဲ“ကျိၣ်ကညီၢ်ကွဲၤဟူကိးဖှိၣ် ”တၢ်ဒ့တၢ်အူတၢ်ဃုစ့ပာ်ကီၤမူးတၢ်ရဲၣ်တၢ်ကျဲၤတခါလၢကမျၢၢ်ၦၤဃ့ၢ်မှံဟးဖျိးဟံၣ်အဂီၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
ဒ်န့ၣ်အသိးတၢ်သူၣ်၀ံၣ်သးဆၢတၢ်ရဲၣ်တၢ်ကျဲၤအံၤတၢ်ကမၤအီၤလၢ(ခ့ၣ်အဲၣ်ယူၣ်)ဟီၣ်က၀ီၤ သ၀ီတဖျၢၣ်အပူၤဃုာ်ဒီး ဒီးစ့ပာ်ကီၤလၢတၢ်ဒိးန့ၢ်၀ဲလၢတၢ်ရဲၣ်တၢ်ကျဲၤအံၤအပူၤတဖၣ်တၢ်ကက့ၤဟ့ၣ်လီၤမၤစၢၤက့ၤ ကညီၦၤဃ့ၢ်မှံဟးဖျိးဟံၣ်ခိၣ်(၁၀၀၀)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဃးဒီး (KYO, KAA, GSCN) ကပာ်ဖှိၣ်မၤ၀ဲ “ကျိၣ်ကညီၢ်ကွဲၤဟူကိးဖှိၣ်” တၢ်ဒ့တၢ်အူတၢ်ဃုစ့ပာ်ကီၤလၢ ကညီၦၤဃ့ၢ်မှံဟးဖျိးတဖၣ်အဂီၢ်အံၤန့ၣ် သရၣ်စီၤအဲလ်ဘၢၣ်ခၠိၤ လၢအဟူးဂဲၤလၢထံရူၢ်ကီၢ်သဲးပူၤအံၤ စံး၀ဲဒၣ်ဒ်အံၤန့ၣ်လီၤႉ
အ၀ဲစံး၀ဲလၢ“ တၢ်ရဲၣ်တၢ်ကျဲၤအံၤအခီပညီမ့ၢ်၀ဲဒၣ်တၢ်ကမၤစၢၤဆီၣ်ထွဲက့ၤပကီၢ်သူလ့ၤပူၤကမျၢၢ်လၢဘၣ်ဃ့ၢ်တၢ်ဒုးတဖၣ်အဟံၣ်ခိၣ်အဖျၢၣ်(၁၀၀၀)အဂီၢ်မီၤနီၤႉအဃိန့ၣ်ပဆါ၀ဲလဲးမးတဘ့ၣ်န့ၣ်လၢစ့ယိၤန့ၣ်(၅၀၀)ဘးလၢစ့ပယီၤတခီ(၅၀၀၀၀)ကၠးမီၤနီၤႉပတိာ်လီၤပာ်လၢဟံၣ်ဒူၣ်တဖၣ်ဖျၢၣ်စုာ်စုာ်န့ၣ်ပကဆီၣ်ထွဲအီၤ(၅၀၀)ဘးမီၤနီၤအဃိန့ၣ်ပအဲၣ် ဒိးကွဲမုာ်ဘၣ်ပၦၤကညီဖိလၢအသူစိၤရှၢၣ်မံၣ်ဒံၣ်ယၢၣ်သ့ၣ်တဖၣ်လၢကပာ်ဖှိၣ်မၤသကိးတၢ်ဒီးၦၤမီၤနီၤႉမ့တုၤဖဲ(၁၇)သီဟါခီန့ၣ်ပကပာ်ဖျါထီၣ်၀ဲတၢ်ဒ့တၢ်အူတၢ်ဒုးနဲၣ်သ့ၣ်တဖၣ်လၢ(KYO)ဒီး (GSCN) facebook တဖၣ်အပူၤလီၤမီၤနီၤႉအဃိန့ၣ်ပကွဲမုာ်ၦၤကိးဂၤလၢကနုာ်လီၤကွၢ်ဒီးဟ့ၣ်ဂံၢ်ဟ့ၣ်ဘါဟ့ၣ်ဆီၣ်ထွဲမၤစၢၤမီၤနီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါတကီၢ်ခါခဲအံၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ တုၤလၢ(၇)ကလီၢ်ဘျဲၣ်ဒီးဘၣ်ဆၣ်ၦၤဒိးန့ၢ်ဘၣ်တၢ်ဆီၣ်ထွဲဘၣ်စၢၤထဲ(၂)ကလီၢ်(၃)ကလီၢ်အဘၢၣ်စၢၤဒံးလီၤဒီး ကမျၢၢ်လၢအိၣ်တ့ၢ်(၃)ကလီၢ်(၄)ကလီၢ်တဖၣ်အံၤခီဖျိတဒိးန့ၢ်ဘၣ်တၢ်မၤစၢၤဘၣ်အဃိဒ်သိးအ၀ဲသ့ၣ်ကဒိးန့ၢ်ဘၣ် တၢ်ဆီၣ်ထွဲမၤစၢၤအဂီၢ်န့ၣ်ဘၣ်တၢ်ပာ်ဖှိၣ်မၤသကိး၀ဲတၢ်ရဲၣ်တၢ်ကျဲၤအံၤလီၤအဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်တီနံဆီတခူစံးလီၤ၀ဲလၢ (KYO) Facebook Page ပူၤဒ်အံၤန့ၣ်လီၤႉ
အ၀ဲစံး၀ဲလၢ“အခဲအံၤန့ၣ်ကီၢ်ပယီၤထံကီၢ်ဒီတဘ့ၣ်အပူၤကမျၢၢ်ဘၣ်စံၣ်တၢ်ဒုးအိၣ်၀ဲတုၤလၢ(၂)ကကွဲၢ်ဘျဲၣ်လံဒီး မ့မ့ၢ်လၢကီၢ်သူလ့ၤတၢ်ပၢဟီၣ်က၀ီၤပူၤတခီန့ၣ်(၂၀၂၃)လါဒံၣ်စ့ဘၢၣ်အပူၤတၢ်မၤနီၣ်မၤဃါအပူၤန့ၣ်ကညီကလုာ်ဒူၣ်ကမျၢၢ်တဖၣ်ဘၣ်ဃ့ၢ်အိၣ်ကဒုသးခဲလၢာ်အိၣ်၀ဲထီၣ်ဘးလၢ(၇)ကလီၢ်ဘျဲၣ်လံမီၤနီၤႉဘၣ်ဆၣ်ၦၤဃ့ၢ်အိၣ်ကဒုသး (၇)ကလီၢ်ဘျဲၣ်အကျါအံၤၦၤလၢဒိးန့ၢ်ဘၣ်၀ဲတၢ်ဆီၣ်ထွဲဘၣ်စၢၤန့ၣ်န့ၢ်ထဲ(၂)ကလီၢ်ဒီး(၃)ကလီၢ်အဘၢၣ်စၢၤလီၤမီၤႉကမျၢၢ်ဃ့ၢ်အိၣ်ကဒုနီၣ်ဂံၢ်လၢအိၣ်တ့ၢ်(၃)ကလီၢ်(၄)ကလီၢ်တဖၣ်န့ၣ်တဒိးန့ၢ်ဘၣ်၀ဲတၢ်ဆီၣ်ထွဲမၤစၢၤဘၣ်ပတဲသ့၀ဲအဃိန့ၣ်ၦၤသ့ၣ်တဖၣ်အံၤကဒိးန့ၢ်တၢ်ဆီၣ်ထွဲမၤစၢၤအဂီၢ်တဘၣ်ပျဲတၢ်ဟူးတၢ်ဂဲၤဘျီ၀ဲအံၤလဲၤတလၢနၤတဂ့ၤဖဲပအိၣ်တပူၤလၢ်လၢ်ပကဂုာ်ကျဲးစၢးပၣ်ဃုာ်သကိးမီၤနီၤ ” အဂ့ၢ်န့ၣ် စံး၀ဲန့ၣ်လီၤႉ
လၢ “ကျိၣ်ကညီၢ်ကွဲၤဟူကိးဖှိၣ်” တၢ်ဒ့တၢ်အူတၢ်သူၣ်၀ံၣ်သးဆၢတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် ကညီသူၣ်ဘီၣ်သးစၢ်ၦၤသး၀ံၣ်တၢ်ဖိလၢအမံၤဟူသၣ်ဖျါတဖၣ်ကပၣ်ဃုာ်ပၣ်ဂီၢ်၀ဲဒီးဒ်န့ၣ်အသိး ကပၣ်ဃုာ်စ့ၢ်ကီး၀ဲ ကညီလုၢ်လၢ်တၢ်ဆဲးတၢ်လၤတၢ်ဂဲၤကလံၣ်˜ ကညီထူထံးတၢ်ဂဲၤဒိတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဃုစ့ပာ်ကီၤတၢ်ရဲၣ်တၢ်ကျဲၤလၢကညီၦၤဃ့ၢ်မှံဟးဖျိးအဂီၢ်ဘျီ၀ဲအံၤန့ၣ်ဘၣ်တၢ်မၤအီၤဒီးခဲအံၤတ၀ီန့ၣ် န့ၢ်၀ဲ(၃)၀ီတ၀ီလံန့ၣ်လီၤႉအပူၤကွံာ်တၢ်သူၣ်၀ံၣ်သးဆၢတၢ်ရဲၣ်တၢ်ကျဲၤအခါန့ၣ်ဘၣ်တၢ်မၤတ့ၢ်အီၤလၢ (အီၣ်လါ)ပူၤဒီးခၠီကီၢ်စဲၣ်အပူၤအဂ့ၢ်န့ၣ်˜ ၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
