Home တၢ်ကစီၣ် သုးကီၣ်ကးဟံၣ်ဖိဃီဖိ(၇၁)ဂၤလၢတၢ်ဖီၣ်န့ၢ်၀ဲဖဲမူကီၢ်ဆၣ်တၢ်ဒုးပူၤတဖၣ်အံၤတၢ်ပျၢ်လီၤက့ၤ၀ဲ

သုးကီၣ်ကးဟံၣ်ဖိဃီဖိ(၇၁)ဂၤလၢတၢ်ဖီၣ်န့ၢ်၀ဲဖဲမူကီၢ်ဆၣ်တၢ်ဒုးပူၤတဖၣ်အံၤတၢ်ပျၢ်လီၤက့ၤ၀ဲ

136
0
Photo: CJ

လါမးရှး ၁၄ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်တၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့(၃) မူကီၢ်ဆၣ်အပူၤ သုးကီၣ်ကးဟံၣ်ဖိဃီဖိ(၇၁)ဂၤ လၢတၢ်ဖီၣ်န့ၢ်၀ဲဖဲမူကီၢ်ဆၣ်တၢ်ဒုးပူၤအခါသ့ၣ်တဖၣ်အံၤ ဖဲလါမးရှး(၁၂)သီဂီၤခီအဆၢကတီၢ်န့ၣ် တၢ်ပျၢ်လီၤက့ၤ၀ဲလံအဂ့ၢ်န့ၣ် မူကီၢ်ဆၣ်အၦၤဘၣ်မူဘၣ်ဒါစံး၀ဲန့ၣ်လီၤႉ

သုးကီၣ်ကးအဟံၣ်ဖိဃီဖိလၢဘၣ်တၢ်ဖီၣ်န့ၢ်အီၤဖဲမူ၀့ၢ်တၢ်ဒုးပူၤအခါသ့ၣ်တဖၣ်အံၤ အပူၤကွံာ်(၂၀၂၃) လါဒံၣ်စ့ဘၢၣ် (၂)သီအနံၤ ဖဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤထီၣ်ခး၀ဲမူ၀့ၢ်ပယီၤသုး ခီၣ်ချ့သုးရ့ၣ် (ခမရ-၅၉၀ႇ ခမရ-၅၉၉)တဖၣ်အံၤအဆၢကတီၢ်ဘၣ်တၢ်ဖီၣ်န့ၢ်အ၀ဲသ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးဟံၣ်ဖိဃီဖိသ့ၣ်တဖၣ်အံၤတၢ်ဖီၣ်ဃာ်အ၀ဲသ့ၣ်ထီၣ်ဘးလၢ(၃)လါဘျဲၣ်ဒီးခီဖျိဒူၣ်ဖိထၢၣ်ဖိသ့ၣ်တဖၣ်အံၤ ပာ်ဖျါထီၣ်၀ဲလၢအဲၣ်ဒိးက့ၤအိၣ်လၢအနီၢ်ကစၢ်ဟံၣ်ဃီအဃိ ဟီၣ်က၀ီၤခိၣ်နၢ်ၦၤဘၣ်မူဘၣ်ဒါ ရဲၣ်ကျဲၤပျၢ်လီၤက့ၤ၀ဲ အဂ့ၢ်န့ၣ် မူကီၢ်ဆၣ် ၦၤဘၣ်မူဘၣ်ဒါစံး၀ဲန့ၣ်လီၤႉ

ဘၣ်ဃးတၢ်ပျၢ်လီၤက့ၤသုးကီၣ်ကးအဟံၣ်ဖိဃီဖိတၢ်ဂ့ၢ်အံၤန့ၣ် မူကီၢ်ဆၣ် ၦၤကတိၤတၢ်ပၢ ပဒိၣ်စီၤဟဲဂ့ၤ စံး၀ဲလၢ “တၢ်ပျၢ်လီၤအ၀ဲသ့ၣ်အံၤန့ၣ်ဖဲတၢ်ဒုးပျီပူၤအံၤန့ၣ်ပဖီၣ်န့ၢ်အီၤလီၤႉ ပဖီၣ်န့ၢ်အ၀ဲသ့ၣ်၀ံၤအလီၢ်ခံန့ၣ် ပသမံသမိး၀ဲတၢ်အိၣ်သးမီၤနီၤႉ မ့ၢ်၀ံၤန့ၣ်အ၀ဲသ့ၣ်ပာ်ဖျါထီၣ်ဃ့ထီၣ်၀ဲလၢအဲၣ်ဒိးက့ၤလၢအဟံၣ်အဃီ လၢအမိၢ်အပၢ်အိၣ်န့ၣ်လီၤႉ အဃိသတးဒီးလၢတၢ်ပာ်ဖျါထီၣ်အဖီခိၣ်န့ၣ်ပရဲၣ်ကျဲၤဒီးပပျဲက့ၤအ၀ဲသ့ၣ်လီၤႉ အ၀ဲသ့ၣ်အတၢ်က့ၤအံၤန့ၣ်တမ့ၢ်က့ၤ၀ဲလၢ သုးရ့ၣ်၀ဲၤလီၢ်လၢမူဘၣ်ႉ အ၀ဲသ့ၣ်ကက့ၤ၀ဲဒၣ်လၢအမိၢ်အပၢ် အိၣ်တၢ်အလီၢ်အပုၢ်အ၀ဲၢ်အိၣ်တၢ်လီၢ်လီၤႉ တၢ်သ့ၣ်တဖၣ်န့ၣ်မ့ၢ်အ၀ဲသ့ၣ်အတၢ်ပာ်သးအိၣ်ဒ်န့ၣ်မီၤနီၤႉ ပဆှၢက့ၤအ၀ဲသ့ၣ်ဂ့ၤဂ့ၤဘၣ်ဘၣ်ပကျဲၤန့ၣ်အ၀ဲသ့ၣ်သိလ့ၣ် တၢ်လဲၤတၢ်က့ၤဒီးပဆှၢက့ၤအ၀ဲသ့ၣ်၀ံၤလံ” အဂ့ၢ်န့ၣ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤပယီၤသုးအဟံၣ်ဖိဃီဖိလၢတၢ်ပျၢ်လီၤက့ၤ၀ဲသ့ၣ်တဖၣ်အံၤက့ၤတုၤ၀ဲလၢ အတၢ်အိၣ်တၢ်ဆိးလီၢ်လံဒီးဒ်န့ၣ်အသိးဟံၣ်ဒူၣ်လၢအက့ၤတဖၣ်အကျါတနီၤန့ၣ် ချၢၣ်လွံၢ်ထူၣ် သုးကီၣ်ကး(ခမရ-၂၀)သမံသမိးအ၀ဲသ့ၣ်အိၣ်၀ဲအဂ့ၢ်န့ၣ် ပဒိၣ်စီၤဟဲဂ့ၤ စံးအါထီၣ်၀ဲန့ၣ်လီၤႉ

ဒ်န့ၣ်အသိးအပူၤကွံာ်လါမးရှး ၄ သီ တုၤ ၁၀ သီ လၢနွံသီအတီၢ်ပူၤ ခီဖျိပယီၤသုးခးလီၤကျိဖးဒိၣ်ႇ ကဘီယူၤဟဲခးလီၤတၢ်လၢမူကီၢ်ဆၣ်ပူၤအဃိ ကမျၢၢ်သံ ၇ ဂၤဒီး ဘၣ်ဒိ၀ဲဒၣ် ၁၅ ဂၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ