လါမးရှး ၂၂ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) လူၤသီကီၢ်ဆၣ်အပူၤ ခီဖျိပယီၤသုး ကဘီယူၤဒုးသုးဟဲတ့ၢ်လီၤမ့ၣ်ပိၢ်လၢ ဘီသ့ၣ်ထၣ်ကရူၢ် ပနီကျဲသ၀ီပူၤအဃိ ကမျၢၢ်ဟံၣ်ဟးဂီၤ၀ဲဒၣ်(၇)ဖျၢၣ်ဒီး ဆၣ်ဖိကီၢ်ဖိသံ၀ဲဒၣ်အိၣ်အဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါမးရှး ၂၁ သီအနံၤန့ၣ်လီၤႉ
လၢ(သုးက့ ၅) လူၤသီကီၢ်ဆၣ်အပူၤ ဖဲလါမးရှး ၂၁ သီ ဂီၤခီ ၁ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိပယီၤသုးကဘီယူၤ ဟဲတ့ၢ်လီၤမ့ၣ်ပိၢ်လၢ ပနီကျဲသ၀ီပူၤ(၂)ဖျၢၣ်အဃိ ကမျၢၢ်အဟံၣ်အဃီဟးဂီၤတကးဒံးဘၣ် ဘၣ်သံစ့ၢ်ကီး၀ဲထိး (၈)ဒုႇ မဲးတဲးလဲး(၆)ဒုအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဘၣ်ဃးကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤန့ၣ်(သုးက့ ၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲလၢ “ဖဲမဂီၤ ၁၂း၄၀ မံးနံး အခါန့ၣ် ကဘီယူၤဒုးသုးဟဲကဒီးခံဘ့ၣ်ႉဟဲခးလီၤတၢ်လၢဘီသ့ၣ်ထၣ်ဆၢခိၣ် ဖဲပနီကျဲသ၀ီပူၤန့ၣ်ႉ သ၀ီဖိဟံၣ် ဟးဂီၤ၀ဲ(၇)ဖျၢၣ်သံဃုာ်ထိးႇဆီႇမဲးတဲးလဲးႇကျီၢ်ႇပနၢ်နါက့ဘၣ်ဒိအိၣ်စ့ၢ်ႉမ့မ့ၢ်ဒူဖိသ၀ီဖိၦၤကညီခီဒု တၢ်ဘၣ်ဒိဘၣ်ထံး တၢ်သံတၢ်ၦၢ်တအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါမးရှး ၂၁ သီ အနံၤန့ၣ်လီၤႉ
တကးဒံးဘၣ်လၢန့ၣ်အမဲာ်ညါဖဲတၢ်တနံၤဃီ၀ဲန့ၣ် ပယီၤသုးကဘီယူၤဟဲတ့ၢ်လီၤကဒီး၀ဲဒၣ်မ့ၣ်ပိၢ်လၢ(သုးက့ ၅) ဒွဲၣ်လိသ၀ီပူၤတဖျၢၣ်ဒီးဒ်န့ၣ်အသိးဖဲဟါခီ ၁၂ နၣ်ရံၣ် တုၤလၢ ၂ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးကဘီယူၤ ဟဲတ့ၢ်လီၤကဒီး၀ဲမ့ၣ်ပိၢ်(၄၃)ဖျၢၣ်လၢလူၤသီကီၢ်ဆၣ် ဘီသ့ၣ်ထၣ်ကရူၢ် ထူၣ်မီဒၢႇ နံဒိးထၣ်ဒီးတၤဒိၣ်ထၣ်သ၀ီပူၤ အဂ့ၢ်န့ၣ် မုၢ်တြီၢ်တၢ်ကစီၣ်စံး၀ဲန့ၣ်လီၤႉ
တကတီၢ်ဃီဖဲမဟါလါမးရှး ၂၁ သီ ဟါခီ ၃ နၣ်ရံၣ်အဆၢကတီၢ်န့ၣ် ခ့ၣ်အဲၣ်ယူၣ်(သုးက့ ၅)အၦၤ ဒြိကရူၢ် လဲၤတ့ၢ်လီၤ ၀ဲဒၣ် ဒြိမ့ၣ်ပိၢ်တဖျၢၣ်လၢဖၣ်ပူၣ် ပယီၤသုးခီၣ်သုးရ့ၣ်(ခလရ-၁၉)သုးကလၢၤအဃိ ပယီၤသုးသံ၀ဲဒၣ်(၁)ဂၤဒီး ဖဲန့ၣ်၀ံၤလီၢ်ခံပယီၤသုးက့ၤတ့ၢ်လီၤကဒါဒြိမ့ၣ်ပိၢ်(၂၀)ဖျၢၣ်လၢဘုသိၣ်ကီၢ်ဆၣ် မဲးကျီကရူၢ် ဘီးထၣ်သ၀ီအခိၣ်အဃၢၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါမးရှး ၁၉ သီ အနံၤန့ၣ်စ့ၢ်ကီး ခီဖျိ(သုးက့ ၅)အၦၤ ဒြိကရူၢ်လဲၤခး၀ဲ ဖၣ်ပူၣ်ပယီၤသုး ကလၢၤသုးရ့ၣ်တၢ်သ့ၣ်တဖၣ်လၢဒြိမ့ၣ်ပိၢ်အဃိ ပယီၤသုးသံ(၁)ဂၤႇဘၣ်ဒိ(၅)ဂၤဒီး မုၢ်ဆ့ၣ်ထီၣ်လါမးရှး ၂၀ သီအနံၤ တၢ်ပၢၢ်ဆၢဒြိကရူၢ်လဲၤခးကဒီး၀ဲဖၣ်ပူၣ်သုးကလၢၤ(ခလရ-၁၉) သုးရ့ၣ်လၢ စနဲးဖၢးအဃိပယီၤသုးသံ၀ဲ(၂)ဂၤႇ ဘၣ်ဒိစ့ၢ်ကီး၀ဲဒၣ်(၃)ဂၤအဂ့ၢ်န့ၣ် မုၢ်တြီၢ်တၢ်ကစီၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ
မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ တကီၢ်ခါခဲအံၤခီဖျိပယီၤသုးအဂံၢ်အဘါတအိၣ်လၢၤဘၣ် ပျံၤ၀ဲလၢ တၢ်ပၢၢ်ဆၢကရူၢ်ကလဲၤခးအ၀ဲသ့ၣ်ဒီးဟးထီၣ်လၢတၢ်ချၢတဘူၣ်လၢၤဘၣ်အဃိ ပယီၤသုးအံၤသူက့ၤဒြိမ့ၣ်ပိၢ်ႇ ကဘီယူၤဒုးသုး၀ံၤဟးခးလီၤနါစိၤတၢ်လၢကမျၢၢ်ဒူသ၀ီတၢ်လ့ၢ်ထီၣ်လ့ၢ်လိၤကျဲဒီးတၢ်ဖံးအီၣ်မၤအီၣ်လီၢ်ကျဲအပူၤ ခဲအံၤခဲအံၤလၢတၢ်လီၢ်သကုၤဆးဒးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
