လါမးရှး ၁၂ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် လၢ(၇)သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ႇ ဟဲတ့ၢ်လီၤဒြိမ့ၣ်ပိၢ်ႇ ကဘီယူၤဟဲခးလီၤတၢ်အဃိ ကမျၢၢ်သံ(၇)ဂၤ ဘၣ်ဒိ(၁၅)ဂၤအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါမးရှး(၉)သီအနံၤန့ၣ်လီၤႉ
စးထီၣ်လါမးရှး(၄)သီတုၤ(၁၀)သီ လၢ(၇)သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ဟဲတ့ၢ်လီၤဒြိမ့ၣ်ပိၢ်လၢဒူသ၀ီ ကမျၢၢ်တၢ်အိၣ်တၢ်ဆိးလီၢ်အဃိ ၦၤကမျၢၢ်သံဘၣ်ဒိဘၣ်ထံးဘၣ်ကဲထီၣ်သးတကးဒံးဘၣ် ၦၤကမျၢၢ်အဟံၣ်အဃီ ဟးဂီၤ၀ဲအါမးဒီးကၠိတၢ်သူၣ်ထီၣ်စ့ၢ်ကီးဟးဂီၤ၀ဲဒၣ်(၁)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါမူကီၢ်ဆၣ်ဒူသ၀ီတဖၣ်အပူၤမ့ၢ်လၢပယီၤသုးနုာ်လီၤလၢကမျၢၢ်ဒူသ၀ီပူၤႇ ခးလီၤကျိဖးဒိၣ် ဟဲတ့ၢ်လီၤဒြိမ့ၢ်ပိၢ်ကိးနံၤဒဲးဃၣ်ဃၣ်အဃိတုၤလၢခဲအံၤသ၀ီ(၂၅)ဖျၢၣ် ၦၤနီၣ်ဂံၢ်(၁၀၀၀၀)ဘျဲၣ်ဘၣ်ဃ့ၢ်ထီၣ်၀ဲ အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ သ့ၣ်ညါဘၣ်န့ၣ်လီၤႉ
ဒ်ခ့ၣ်အဲၣ်ယူၣ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ်ဒူသ၀ီလၢအဘၣ်ဃ့ၢ်ထီၣ်တဖၣ်န့ၣ်မ့ၢ်၀ဲ သပၠ့ၤကိႇ ယ့ၤတွ့ကိကၠံႇ ယ့ၤတွ့ကိလ့ႇ အိပ့ၤစူၣ်ႇ အူၣ်ရှ့ၣ်ကိႇ ၀ဲၣ်တူႇ အညၤစူၣ်ႇ ငနွါဆ့ၣ်ႇ ယ့တဲၣ်ကိႇ နီကိႇ ယ့လဲကယ့ၤႇ ယ့လဲဘမၤႇ ထွ့နံၤကိႇ ယၢၤမၠိအီၤႇ တမၤခီႇ တီၤစူၣ်(မုၢ်ထီၣ်)ႇ တီၤစူၣ်(မုၢ်နုာ်) ႇ တမီမၣ်ႇ ယွၤကၠံအ့ၤႇ ကၠူကိႇ မယၢစ့ၤကၠံႇ မယၢစ့ၤလ့ႇ ယ့လဲ(မုၢ်နုာ်)ႇ ၀ဲၣ်တူ(မုၢ်နုာ်)ဒီးသ့ၤကၢပ့ၤသ၀ီသ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးခီဖျိပယီၤသုးကီၣ်ကးအတၢ်ဟူးတၢ်ဂဲၤသ့ၣ်တဖၣ်အံၤအဖီခိၣ် ကဲထီၣ်စ့ၢ်ကီး၀ဲတၢ်ကီတၢ်ခဲလၢ ကမျၢၢ်တၢ်အိၣ်မူတၢ်ဘံၣ်တၢ်ဘၢအဂီၢ်အဂ့ၢ်န့ၣ် ကီၢ်ဆၣ် ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါတၢ်ဆၢကတီၢ်ဘၣ်၀ဲလၢၦၤကမျၢၢ်တဖၣ်ကဘၣ်ထုးဖှိၣ်ပာ်ဖှိၣ်က့ၤတၢ်ချံတၢ်သၣ်လံဒီး ဘၣ်ဆၣ်ခီဖျိအ၀ဲသ့ၣ်ဘၣ်ဃ့ၢ်မှံဟးဖျိးဒ်အံၤအဃိဘၣ်ကွၢ်ဆၢၣ်မဲာ်၀ဲတၢ်အီၣ်တၢ်အီတၢ်ဃံးတၢ်စ့ၤဒီးဆူၣ်ချ့တၢ်ကီ တၢ်ခဲအကလုာ်ကလုာ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးပာ်ဖျါ၀ဲဒၣ်န့ၣ်လီၤႉ
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်အပူၤ သုးဟံးန့ၢ်တၢ်စိိတၢ်ကမီၤသၢနံၣ်ဘျဲၣ် အတီၢ်ပူၤအံၤ ကမျၢၢ်ၦၤဃ့ၢ်မှံဟးဖျိးအိၣ်၀ဲ(ခံကလီၢ်)ဘျဲၣ်ဒီး ဒ်န့ၣ်အသိးကီၢ်ရ့ၣ်အံၤမ့ၢ်ကီၢ်ရ့ၣ်တဘ့ၣ်လၢ ၦၤဃ့ၢ်မှံဟးဖျိးနီၣ်ဂံၢ်အါကတၢၢ်အဂ့ၢ်န့ၣ် ခ့ၣ်အဲၣ်ယူၣ်ဒီးဂံၢ်ခီၣ်ထံးကညီတၢ်ကရၢကရိအတၢ်မၤနီၣ်စရီအသိး သ့ၣ်ညါဘၣ်န့ၣ်လီၤႉ
