ဖၣ်အၣ်၀့ၢ်ပူၤတၢ်မၤဃံးထီၣ်တမှံၤတရီအဃိၦၤလၢဟဲနုာ်အိၣ်ပတုာ်တစိၢ်တလီၢ်တဖၣ်အိၣ်ဒီးတၢ်ဘၣ်ယိၣ်

လါမးရှး ၅ သီႇ ၂၀၂၄ နံၣ်ႇ ခ့ၣ်အဲးစံၣ်ႇ

လၢကညီကီၢ်စဲၣ် ဖၣ်အၣ်၀့ၢ်က၀ီၤဒ့တဖၣ်အပူၤ ခီဖျိတၢ်မၤဃံးထီၣ်၀ဲၦၤတမှံၤတရီအဃိ ၦၤလၢအဟဲနုာ်လီၤအိၣ်ပတုာ် တစိၢ်တလီၢ်တဖၣ်အိၣ်၀ဲဒီးတၢ်ဘၣ်ယိၣ်ဘၣ်ဘှီအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ် စံး၀ဲန့ၣ်လီၤႉ

စှၤသီအတီၢ်ပူၤဖၣ်အၣ်၀့ၢ်က၀ီၤဒ့တဖၣ်အပူၤၦၤအိၣ်လၢတၢ်ချၢလၢအဟဲအိၣ်ပတုာ်တစိၢ်တလီၢ်တဖၣ်အံၤ ကဘၣ်လဲၤတီၣ်ထီၣ်တမှံၤစရီဒီးတီၣ်ထီၣ်၀ဲဒ်တၢ်နဲၣ်လီၤအိၣ်အသိးဘၣ်ဆၣ်ခီဖျိတၢ်ဘံၣ်တၢ်ဘၢတအိၣ်ဘၣ်အဃိ ဘၣ်ယိၣ်၀ဲလၢသုးကီၣ်ကးအၦၤကဖီၣ်ချူးအ၀ဲသ့ၣ်ဒီးဒ်န့ၣ်အသိးဟံၣ်ကစၢ်လၢအတူၢ်လိာ်တၢ်တဖၣ်စ့ၢ်ကီး ဘၣ်ယိၣ်တၢ်လၢခံခီယၢ်ပၤအဂ့ၢ်န့ၣ်ဖၣ်အၣ်ကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ပငါအိၣ်ဟံၣ်န့ၣ်ပဘၣ်လဲၤတီၣ်ထီၣ်တမှံၤစရီ၊ပဘၣ်လဲၤစိာ်ဒီးပတၢ်ဂီၤ(မၣ်ပိၤတ့ၤ)မီၤနီၤ အဃိန့ၣ်ၦၤမ့ဟဲအိၣ်ပတုာ်ဖဲပအိၣ်န့ၣ်ပတၢ်ကိၢ်တၢ်ဂီၤအိၣ်မီၤႉဘၣ်မနုၤအဃိလဲၣ်န့ၣ်ပသကိးဟဲအိၣ်ပတုာ်ဖဲပအိၣ်န့ၣ်အ၀ဲသ့ၣ်ကဲတမှံၤအဃိဘၣ်ပျံၤဘၣ်ဖုးလၢၦၤကမၤကီမၤခဲအီၤဒီးတလဲၤတ့ၣ်ထီၣ်၀ဲတမှံၤစရီဘၣ်မီၤႇအမ့လဲၤတ့ၣ်တီၣ်၀ဲနါက့တၢ်ဘံၣ်တၢ်ဘၢတအိၣ်လၢအ၀ဲသ့ၣ်ဂီၢ်စ့ၢ်ကီးဘၣ်မီၤႉအဃိန့ၣ်ဖဲအ၀ဲသ့ၣ်အိၣ်ပတုာ်၀ဲတသီခံသီအတီၢ်ပူၤဒု ပဘၣ်ကိၢ်တၢ်လၢအ၀ဲသ့ၣ်အဂီၢ်ဒီးအ၀ဲသ့ၣ်နာ်က့ဘၣ်ကိၢ်က့ၤတၢ်လၢပဂီၢ်စ့ၢ်ကီးအိၣ်၀ဲမီၤႉပဘၣ်ယိၣ်လၢတၢ်ကသမံသမိးချူးၦၤမီၤနီၤႉ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါဖၣ်အၣ်၀့ၢ်ပူၤက၀ီၤဒ့ၦၤဘၣ်မူဘၣ်ဒါသးၦၢ်လၢအသမံသမိးတမှံၤစရီတဖၣ်အံၤ မ့ဖီၣ်ချုးၦၤတဂၤလၢ်လၢ်လၢတတီၣ်ထီၣ်တမှံၤစရီဘၣ်အခါန့ၣ်ဟံကွံာ်၀ဲအတၢ်ဂီၤ(မၣ်ပိၤတ့ၤ)ဒီးမၢ၀ဲတၢ်လဲၤ ရ့ထီၣ်က့ၤလၢစ့အိၣ်၀ဲအဂ့ၢ်န့ၣ် ကမျၢၢ်တဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ

တကးဒံးဘၣ်ဖၣ်အၣ်၀့ၢ်ပူၤက၀ီၤဒ့ခိၣ်ဒီးသးၦၢ်လၢအသမံသမိးၦၤတမှံၤတရီတဖၣ်အံၤဖဲအဟးသမံသမိးတၢ်လၢ က၀ီၤဒ့ပူၤအခါန့ၣ်ပၣ်ဃုာ်၀ဲပယီၤသုးပၢၤကီၢ်သုးသ့ၣ်တဖၣ်ဒီးဒ်န့ၣ်အသိးသံကွၢ်သံဒိး၀ဲတၢ်အါမံၤအဂ့ၢ်န့ၣ် ဖၣ်အၣ်လီၢ်က၀ီၤဖိလၢအဂၤတဂၤ စံးစ့ၢ်ကီး၀ဲဒ်အံၤန့ၣ်လီၤႉ

“ဖဲတသီခံသီအတီၢ်ပူၤအံၤၦၤဟဲသမံသမိးတမှံၤစရီဆဲးတဲးလီၤႉနုာ်လီၤဟးထီၣ်ဟံၣ်တဖျၢၣ်၀ံၤ တဖျၢၣ်လီၤမီၤႉၦၤတနီၤန့ၣ်တၢ်သမံသမိး၀ဲအလီတဲစိအိၣ်စ့ၢ်ႉစရီပူၤၦၤလၢအမံၤအိၣ်ဒီးအနီၢ်ကစၢ်တအိၣ်ဘၣ်တဖၣ် န့ၣ်သံကွၢ်၀ဲလၢမ့ၢ်အလဲၤဖဲလဲၣ်က့ၤဖဲလဲၣ်ဒ်န့ၣ်အိၣ်၀ဲ” အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးကမျၢၢ်လၢအဟဲအိၣ်ဆိးဖၣ်အၣ်၀့ၢ်ပူၤတဖၣ်အံၤဘၣ်တီၣ်ထီၣ်၀ဲတမှံၤစရီကိးဂၤဒဲးဒီးဒ်န့ၣ်အသိး ၦၤလၢအအိၣ်အခီပတာ်တလၢက၀ီၤဒ့သ့ၣ်တဖၣ်ဘၣ်တီၣ်ထီၣ်၀ဲတမှံၤစရီကိးလါဒဲးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

သုးကီၣ်ကးထုးထီၣ်၀ဲတၢ်ကဘၣ်ကဲသုးသဲစး၀ံၤလီၢ်ခံလၢဖၣ်အၣ်၀့ၢ်က၀ီၤဒ့တဖၣ်အပူၤ ခီဖျိတၢ်သမံသမိးတမှံၤတရီအါထီၣ်၀ဲအဃိသူၣ်ဘီၣ်သးစၢ်တဖၣ်တနီၤန့ၣ်ဘၣ်ယိၣ်ဘၣ်ဘှီတၢ်လဲၤထီၣ်စံၣ်အိၣ်လၢ ကီၢ်ကၠီၣ်တဲၣ်ပူၤအိၣ်၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ