လါမးရှး ၅ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ သုးကီၣ်ကးဘှီဂ့ၤ ထီၣ်က့ၤ (နၣ်သၤကွ့) တိၤ၀ံၤအလီၢ်ခံအ၀ဲသ့ၣ်ခးလီၤကျိဖးဒိၣ်ဟဲအါထီၣ်ဒိၣ်န့ၢ်အပူၤကွံာ်လၢညါအဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ
သုးကီၣ်ကးဟဲဘှီဂ့ၤထီၣ်က့ၤ (နၣ်သၤကွ့) တိၤအံၤမ့ၢ်ဒ်သိးအ၀ဲသ့ၣ်ကစိးကါ၀ဲလၢဒုးယၤတၢ်ဟူးတၢ်ဂဲၤ အဂီၢ်ဒီး လၢန့ၣ်အမဲာ်ညါတိၤအံၤအရ့ဒိၣ်၀ဲလၢသုးကီၣ်ကးသ့ၣ်တဖၣ်အဂီၢ်အဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံး၀ဲဒ်အံၤန့ၣ်လီၤႉ
“ပကွၢ်က့ၤဖဲလါယနူၤအါရံၤထီၣ်(၂၀၂၄)နံၣ်ဒီးတုၤလၢလါဖ့ၤဘြူၤအါရံၤန့ၣ်အ၀ဲသ့ၣ်ဘှီ၀ဲဒၣ်တိၤတဘိန့ၣ်ဒီး မၤအါထီၣ်အဂံၢ်အဘါဖဲန့ၣ်မီၤနီၤႉ ပကွၢ်ကဒါက့ၤ (နၣ်သၤကွ့) တိၤအံၤန့ၣ် လၢဒုၣ်ဒါအဂီၢ်န့ၣ်မ့ၢ်တိာ်လၢအ ကါဒိၣ် တဘိလၢဒုးယာ်တၢ်ရဲၣ်တၢ်ကျဲၤအဂီၢ်လီၤႉ ဒ်န့ၣ်အသိးတၢ်လ့ၢ်လိၤလ့ၢ်ထီၣ်နါက့န့ၣ်ဘူးဒီးလူၤတၢ် ခံချုးကတၢၢ်န့ၣ်မ့ၢ်၀ဲတိၤတဘိအံၤလီၤႉ ဒ်လဲၣ်ဒ်လဲၣ်ဂ့ၤန့ၣ်ကတူၢ်သံတူၢ်ဟါမၢ်အသးဒီးကဘှီ၀ဲကမၤဂ့ၤထီၣ် ၀ဲလၢအ၀ဲသ့ၣ်ဒုးယၤတၢ်ရဲၣ်တၢ်ကျဲၤအဂီၢ်လီၤ အဃိမ့ၢ်တိၤလၢအရ့ဒိၣ်၀ဲလၢအ၀ဲသ့ၣ်အဂီၢ်ဒီးဘှီထီၣ်၀ဲလၢ ကစိးကါ၀ဲအဂီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
(နၣ်သၤကွ့ၤ) တိၤအံၤအိၣ်၀ဲဒၣ်လၢနၣ်သၤကွ့၀့ၢ်-လၢၢ်ဒိၣ်၀့ၢ်အဘၢၣ်စၢၤဒီးတိၤအံၤဖဲပူၤကွံာ် (၂၀၂၃) လါယူၤ (၆)သီ အနံၤန့ၣ်တၢ်ပၢၢ်ဆၢသုးပာ်ဖှိၣ်ကရူၢ်လဲၤမၤပိၢ်ဖးထီၣ်၀ဲ၀ံၤလီၢ်ခံဖဲတနံၣ်အံၤ(၂၀၂၄)နံၣ်လါယနူၤအါရံၤ ထီၣ်တ၀ာ်ဃၣ်ဃၣ်အခါန့ၣ်သုးကီၣ်ကးစးထီၣ်ဟဲဘှီဂ့ၤထီၣ်က့ၤ၀ဲဒၣ်တိၤအံၤအဂ့ၢ်န့ၣ် လီၢ်က၀ီၤၦၤဘၣ်မူ ဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါ ဘၣ်ဃးသုးကီၣ်ကးဟူးဂဲၤအါထီၣ်လၢ ဟီၣ်က၀ီၤပူၤတၢ်အိၣ်သးအဂ့ၢ်အံၤန့ၣ် လၢၢ်ဒိၣ် ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံးအါထီၣ်၀ဲလၢ “ဘၣ်ထွဲဒီးတိၤလၢ (နၣ်သၤကွ့) ပယီၤသုးတ့၀ဲ၀ံၤ အလီၢ်ခံန့ၣ် ဖဲလါဖ့ၤဘြူၤအါရံၤ(၂၈)သီအနံၤန့ၣ်အ၀ဲသ့ၣ်အတၢ်ဟူးတၢ်ဂဲၤ အိၣ်၀ဲဒၣ်တ၀ီလၢကလဲၤထီၣ် ၀ဲဒၣ်ဆူလၢၢ်ဒိၣ်ဒီး ဟူးဂဲၤ၀ဲဒၣ်လၢမူကီၢ်ဆၣ်ဒီးလၢၢ်ဒိၣ်ကီၢ်ဆၣ်အဆၢဖဲန့ၣ်မီၤနီၤႉ အ၀ဲသ့ၣ်တၢ်ဟူးတၢ်ဂဲၤ အဖီခိၣ်တၢ်ဘၣ်ဂံာ်ဂူာ်ခးလိာ်သးအိၣ်ထီၣ်၀ဲစ့ၢ်ကီးန့ၣ်လီၤႉ အ၀ဲသ့ၣ်အတၢ်ဟူးဂဲၤ၀ံၤအလီၢ်ခံန့ၣ်တၢ်ခးလီၤ ကျိဖးဒိၣ်ဆူဒူသ၀ီပူၤန့ၣ်မၤ၀ဲအါထီၣ်န့ၢ် ဒံးလၢအပူၤကွံာ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
ဒ်န့ၣ်အသိးဖဲပူၤကွံာ်(၂၀၂၃)လါဒံၣ်စဲဘၢၣ်အခါန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးပာ်ဖှိၣ် နုာ်လီၤခး (နၣ်သၤကွ့) ပၢၤကီၢ်၀ဲၤလီၢ် ကဲထီၣ်၀ံၤအလီၢ်ခံခီဖျိပယီၤသုးခးလီၤကျိဖးဒိၣ်ကိးနံၤဒဲးဃၣ်ဃၣ် အဃိ ကမျၢၢ်တဖၣ်ဃ့ၢ်ထီၣ်၀ဲဒီးတုၤလၢခဲအံၤကမျၢၢ်တဖၣ်က့ၤအိၣ်လၢအဟံၣ်အဃီတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါသ့ၣ်တဖၣ်အအိၣ်န့ၣ်လီၤႉ
