လၢၢ်ဒိၣ်ကီၢ်ဆၣ်(၂)လါဘျဲၣ်အတီၢ်ပူၤ သုးကီၣ်ကးအတၢ်မၤကမၣ်ၦၤဂ့ၢ်၀ီခွဲးယာ်အဃိ ကမျၢၢ်သံ(၁၃)ဂၤႇဘၣ်ဒိ(၄၁)ဂၤ

လါမးရှး ၁၉ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ခီဖျိသုးကီၣ်ကး အတၢ်မၤကမၣ်ၦၤဂ့ၢ်၀ီခွဲးယာ်အကလုာ်ကလုာ်အဃိ(၂)လါဘျဲၣ်အတီၢ်ပူၤန့ၣ် ၦၤကမျၢၢ်သံ၀ဲ(၁၃)ဂၤဒီး ဘၣ်ဒိ၀ဲဒၣ် (၄၁)ဂၤအဂ့ၢ်န့ၣ် ကညီဂ့ၢ်ဂီၢ်အူတၢ်ဆီၣ်ထွဲမၤစၢၤကမံးတံာ်ကရူၢ် ထုးထီၣ်ပာ်ဖျါ၀ဲဖဲလါမးရှး ၁၆ သီ အနံၤ န့ၣ်လီၤႉ

တနံၣ်အံၤ(၂၀၂၄)စးထီၣ်လါယနူၤအါရံၤ ၁ သီ တုၤလၢလါမးရှး ၁၅ သီ လၢခံလါဘျဲၣ်အတီၢ်ပူၤ ခီဖျိပယီၤသုးခးလီၤ ကျိဖးဒိၣ်ႇကဘီယူၤဟဲခးလီၤတၢ်ႇခးလီၤတၢ်ဒီးကဘီယူၤဒြိအဃိ လီၢ်က၀ီၤၦၤကမျၢၢ်ဘၣ်သံႇ ဘၣ်ဒိဘၣ်ထံး၀ဲဒၣ်ဒ်အံၤလီၤ အဂ့ၢ်န့ၣ် ကညီဂ့ၢ်ဂီၢ်အူတၢ်ဆီၣ်ထွဲမၤစၢၤကမံးတံာ်ကရူၢ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဘၣ်ဃးဒီးတၢ်ဂ့ၢ်ကဲထီၣ်သးအံၤန့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံး၀ဲလၢ“ပမ့က့ၤကွၢ်က့ၤလၢ ခံလါဘျဲၣ်အတီၢ်ပူၤအံၤဒုးဒါအတၢ်ဟူးတၢ်ဂဲၤန့ၣ်လၢခီၣ်ကျဲဒုကဟဲဟူးဂဲၤန့ၣ်တအိၣ်ဘၣ်ႉ အိၣ်ဒၣ်လၢအ၀ဲသ့ၣ် အိၣ်လၢသုးကလၢၤဒီးခးစိကျိဖးဒိၣ်လၢဒူသ၀ီပူၤလီၤႉဒ်န့ၣ်အသိးလၢကလံၤကျါမ့ၢ်ဂ့ၤႇကွၢ်လၢအ၀ဲသ့ၣ်အဲၣ်ဒိးခး၀ဲ န့ၣ်ခး၀ဲလီၤႉတပာ်ပညိၣ်၀ဲလၢၦၤသုးဖိအိၣ်အလီၢ်လၢၤဘၣ်ႉအဃိကတီၢ်ခဲအံၤၦၤကမျၢၢ်ဒုဘၣ်အိၣ်မူအိၣ်ဂဲၤမၤက့ၤ သကိးလၢတၢ်ပျံၤတၢ်ဖုးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါခီဖျိလၢၢ်ဒိၣ်ကီၢ်ဆၣ်ဒူသ၀ီတဖၣ်ဘၣ်ကွၢ်ဆၢၣ်မဲာ်၀ဲတၢ်ဂ့ၢ်သ့ၣ်တဖၣ်အံၤအဃိ အလီၢ်အိၣ်လၢကရူၢ်ကရၢ လၢအဟူးဂဲၤၦၤဂ့ၢ်၀ီခွဲးယာ်တဖၣ်ကဟ့ၣ်၀ဲတၢ်ဆီၣ်သနံးဒီးဒ်န့ၣ်အသိးကမျၢၢ်ထံဖိကီၢ်ဖိကဒဲကဒဲကဘၣ်ပာ်ဖှိၣ်ဆီၣ်ထွဲမၤစၢၤလိာ်သးအဂ့ၢ်န့ၣ် ပဒိၣ်စီၤ၀ါမုၢ် စံးအါထီၣ်၀ဲဒၣ်န့ၣ်လီၤႉ

အ၀ဲစံး၀ဲလၢ“တၢ်ကဲထီၣ်သးဒ်အံၤသ့ၣ်တဖၣ်န့ၣ်မ့ၢ်၀ဲဒၣ်တၢ်ပာ်ပနီၣ်၀ဲကမျၢၢ်လိၤလိၤဒီးမ့ၢ်၀ဲဒၣ်တၢ်မၤပယွဲမၤဟးဂူာ်ဟးဂီၤႇမၤအၢမၤသီကမျၢၢ်လီၤႉအဃိတၢ်ဒ်အံၤသ့ၣ်တဖၣ်အလီၢ်အိၣ်လၢၦၤလၢအဒိသူၣ်ဒိသးလၢၦၤဂ့ၢ်၀ီတၢ်ဖံးတၢ်မၤတဖၣ်မ့ၢ်ဂ့ၤႇၦၤလၢအဟူးဂဲၤလၢၦၤဂ့ၢ်၀ီတၢ်ဖံးတၢ်မၤတဖၣ်အလီၢ်အိၣ်လၢကဘၣ်ဆီၣ်သနံးစၢၤ၀ဲႉပမ့ကွၢ်က့ၤပလၢၢ်ဒိၣ်ကီၢ်ဆၣ်ဒူသ၀ီကမျၢၢ်ခဲအံၤန့ၣ်ဘၣ်ကွၢ်ဆၢၣ်မဲာ်၀ဲတၢ်ဒ်အံၤသ့ၣ်တဖၣ်န့ၣ်တုၤလၢမုၢ်မဆါတနံၤအံၤလီၤႉတၢ်ဘၣ်ကွၢ်ဆၢၣ်မဲာ်ဒ်အံၤသ့ၣ်တဖၣ်န့ၣ်အလီၢ်အိၣ်စ့ၢ်ကီးလၢကမျၢၢ်ကဒဲကဒဲကြၢးတိစၢၤမၤစၢၤအံးထွဲကွၢ်ထွဲလိာ်သးလၢတၢ်ဘၣ်ကွၢ်ဆၢၣ်မဲာ်တၢ်ကီတၢ်ခဲဒ်အံၤတကတီၢ်အဖီခိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢၢ်ဒိၣ်ကီၢ်ဆၣ်ခံလါဘျဲၣ်အတီၢ်ပူၤအံၤ ကျိဖးဒိၣ်သုးဒီးခိသုးႇကလံၤသုးခးလီၤကျိဖးဒိၣ်လၢဟီၣ်က၀ီၤဒူသ၀ီပူၤ အိၣ်၀ဲ(၆၀၉)ဖျၢၣ်ႇကဘီယူၤဟဲတ့ၢ်လီၤ၀ဲမ့ၣ်ပိၢ်(၄)ဖျၢၣ်ဒီးခးလီၤ၀ဲအီးလံၤကၢး(၄၃)ဘျီန့ၣ်လီၤႉခီဖျိလၢတၢ်ဂ့ၢ်အံၤ အဃိၦၤကမျၢၢ်ဟံၣ်(၅၄)ဖျၢၣ်ႇသီခါတၢ်ဆါဟံၣ်(၁)ဖျၢၣ်ႇကမျၢၢ်တၢ်ဆါဟံၣ်(၁)ဖျၢၣ်ႇသိလ့ၣ်(၁)ခိၣ်စဲးကၢး(၁)ခိၣ်ဟးဂီၤ၀ဲဒၣ်ဒီးတကးဒံးဘၣ်ၦၤကမျၢၢ်အကျီၢ်သံ၀ဲဒၣ်(၁၆)ဒုအဂ့ၢ်န့ၣ် ကညီဂ့ၢ်ဂီၢ်အူတၢ်ဆီၣ်ထွဲမၤစၢၤကမံးတံာ် ကရူၢ် စံး၀ဲန့ၣ်လီၤႉ

ခီဖိလျၢသုးကီၣ်ကးအတၢ်မၤကမၣ်ၦၤဂ့ၢ်၀ီခွဲးယာ်ဒ်အံၤအဖီခိၣ် ကညီဂ့ၢ်ဂီၢ်အူတၢ်ဆီၣ်ထွဲမၤစၢၤကမံးတံာ်ကရူၢ် ဃ့ထီၣ်ဃုာ်စ့ၢ်ကီး၀ဲတၢ်ဂ့ၢ်(၃)ထံၣ်ဆူကရူၢ်ကရၢဘၣ်ထွဲတဖၣ်လၢ ကပတုာ်ကွံာ်တၢ်ဟ့ၣ်ဂံၢ်ဟ့ၣ်ဘါတၢ်စုဆူၣ် ခီၣ်တကး တၢ်ဖံးတၢ်တၢ်မၤႇကဟ့ၣ်တၢ်ဆီၣ်ထွဲမၤစၢၤလၢကမျၢၢ်ၦၤလီၢ်အိၣ်ကမှံဖိအဂီၢ်လၢတၢ်ဘံၣ်တၢ်ဘၢႇ အီၣ်အီအိၣ်ဆိးႇ ဆူၣ်ချ့ႇ တၢ်ကူၣ်ဘၣ်ကူၣ်သ့ဒီးလၢန့ၣ်အမဲာ်ညါ ကဟ့ၣ်အါထီၣ်တၢ်ဆီၣ်သနံးဆူသုးကီၣ်ကးအအိၣ်ဒီး ဟံးထီၣ်ဖီၣ်ထီၣ်အရ့ တုၤလီၤတီၤလီၤအဂ့ၢ်န့ၣ် ဃ့ထီၣ်၀ဲဒၣ်န့ၣ်လီၤႉ

လၢန့ၣ်အမဲာ်ညါသုးကီၣ်ကးအံၤတုၤလၢခဲအံၤမၤကမၣ်၀ဲၦၤဂ့ၢ်၀ီခွဲးယာ်ဒ်အမ့ၢ်ခးလီၤကျိဖးဒိၣ်ႇဟဲခးလီၤတၢ်ဒီးကဘီယူၤႇဟဲတ့ၢ်လီၤတၢ်ဒီးဒြိမ့ၣ်ပိၢ်ႇဖီၣ်ၦၤကမျၢၢ်ႇထၢနုာ်လီၤ၀ဲလၢဃိာ်ပူၤႇဃ့အီၣ်စ့ႇဖီၣ်တီၢ်မၤဒၢၣ်ကမျၢၢ်နုာ်လီၤဒွဲၣ်အူ အီၣ်ၦၤဟံၣ်ႇ နုာ်လီၤဟုၣ်ၦၤကမျၢၢ်တၢ်ဖိတၢ်လံၤဒီးမၢဆူၣ်ၦၤကမျၢၢ်ကဲသုးတၢ်သ့ၣ်တဖၣ်အံၤမၤ၀ဲကိးမုၢ်နံၤဒဲးအဂ့ၢ်န့ၣ် ကညီဂ့ၢ်ဂီၢ်အူ တၢ်ဆီၣ်ထွဲမၤစၢၤကမံးတံာ်ကရူၢ် စံး၀ဲန့ၣ်လီၤႉ

စးထီၣ်(၂၀၂၁)သုးဟံးန့ၢ်တၢ်စိတၢ်ကမီၤတုၤလၢ(၂၀၂၃)န့ၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်ဒီတဘ့ၣ်အပူၤ ခီဖျိဒုးယၤတၢ်သဘံၣ်သဘုၣ်အဃိကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲ(၂၄၈ႇ၁၆၀)ဂၤဒီး ဒ်န့ၣ်အသိးကီၢ်ရ့ၣ်အံၤ လၢကီၢ်ရ့ၣ်ခဲလၢာ်အကျါၦၤဃ့ၢ်မှံဟးဖျိးအနီၣ်ဂံၢ်အါကတၢၢ်လီၤအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲ ဖဲအပူၤကွံာ်လါယနူၤအါရံၤ ၂၁ သီအနံၤန့ၣ်လီၤႉ