ဟီၣ်က၀ီၤတၢ်ပၢတၢ်ပြးကဂ့ၤထီၣ်အဂီၢ်ႇခ့ၣ်အဲၣ်ယူၣ်ပာ်လီၤ၀ဲတၢ်မၤရဲၣ်ကျဲၤ(၅)ထံၣ်

လါမ့ၤ ၁၄သီႇ ၂၀၂၄နံၣ်ႇ ခ့ၣ်အဲးစံၣ်ႇ

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤႇကီၢ်ရ့ၣ်(၇)ဘ့ၣ်ႇကီၢ်ဆၣ်(၂၇)ကီၢ်ဆၣ်အပူၤႇဟီၣ်က၀ီၤတၢ်ပၢတၢ်ပြးကဂ့ၤထီၣ်အဂီၢ်ႇခ့ၣ်အဲၣ်ယူၣ်ပာ်လီၤ၀ဲတၢ်မၤရဲၣ်ကျဲၤ(၅)ထံၣ်အဂ့ၢ်ႇခ့ၣ်အဲၣ်ယူၣ်တၢ်ကစီၣ်ဘိးဘၣ်ရၤလီၤ၀ဲဖဲမဟါလါမ့ၤ(၁၃)သီအနံၤန့ၣ်လီၤႉ

ဒ်သိးခ့ၣ်အဲၣ်ယူၣ်တၢ်ပၢဟီၣ်က၀ီၤႇကီၢ်ဆၣ်(၂၇)ဘ့ၣ်အပူၤႇတၢ်ပၢတၢ်ပြးဒီးတၢ်ရဲၣ်သဲကတီၤကမျၢၢ်ဂ့ၢ်၀ီအတၢ်ဖံးတၢ်မၤကဂ့ၤထီၣ်အဂီၢ်ႇအပူၤကွံာ်လါမ့ၤ(၇)သီတုၤလၢ(၁၁)သီအနံၤအပူၤႇကီၢ်ဆၣ်ခိၣ်နၢ်ၦၤဘၣ်မူဘၣ်ဒါဒီးကီၢ်ဆၣ်နဲၣ်ရွဲၣ်တဖၣ်မၤ၀ဲတၢ်ကူၣ်လိာ်တၢၣ်ပီၣ်တၢ်အိၣ်ဖှိၣ်အဆိကတၢၢ်တဘျီဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(လီၢ်ခၢၣ်သး)ဒီးပာ်လီၤ၀ဲမဲး၀ါကျိတၢ်အၢၣ်လီၤ(၅)ထံၣ်လၢတၢ်သးတဖျၢၣ်ဃီအပူၤလၢကမၤဖျါထီၣ်၀ဲအမိၢ်လံၤမိၢ်ၦၢ်အဂ့ၢ်ႇဘိးဘၣ်ရၤလီၤပာ်ဖျါ၀ဲလၢခ့ၣ်အဲၣ်ယူၣ်တၢ်ကစီၣ်အပူၤန့ၣ်လီၤႉ

တၢ်မၤရဲၣ်ကျဲၤတၢ်ဆၢတဲာ်(၅)ထံၣ်လၢကီၢ်ဆၣ်ခိၣ်နၢ်ဒီးကီၢ်ဆၣ်နဲၣ်ရွဲၣ်သ့ၣ်တဖၣ်ပာ်လီၤ၀ဲန့ၣ်မ့ၢ်၀ဲ“တၢ်လူၤပိာ်မၤထွဲတၢ်ပၢတၢ်ပြးလၢအဂ့ၤႇတၢ်တြီဆၢဒီသဒၢန့ၣ်ထံဖိကီၢ်ဖိကမျၢၢ်ခွဲးယာ်ႇတၢ်ရူၢ်ကျဲးစၢးပာ်ဖှိၣ်မၤသကိးတၢ်သ့ၣ်တဖၣ်ႇတၢ်ဂုၢ်ထီၣ်ပသီထီၣ်လၢအယူာ်ကၢ(တူၢ်ယံာ်ခိးကျၢၤတၢ်ဂုၢ်ထီၣ်ပသီထီၣ်)ႇဃုာ်ဒီးတၢ်လဲၤထီၣ်လဲၤထီၣ်လၢအယူာ်ကၢ(တၢ်လဲၤထီၣ်လဲၤထီၣ်လၢအဆဲးလဲၤအသး)သ့ၣ်တဖၣ်န့ၣ်လီၤႉ

လၢန့ၣ်အမဲာ်ညါႇကီၢ်ဆၣ်ခိၣ်နၢ်လၢဟဲထီၣ်တၢ်ကူၣ်လိာ်တဲသကိးတၢ်အိၣ်ဖှိၣ်တဖၣ်အံၤႇတူၢ်လိာ်၀ဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇအဂံၢ်ခီၣ်ထံးအတၢ်ဘျၢသဲးစးအပူၤခီၣ်တဃာ်ပၢပြးသနူတၢ်ပာ်လုၢ်ပာ်ၦ့ၤလၢအပၣ်ဃုာ်သ့ၣ်တဖၣ်အသိးပာ်ပနီၣ်၀ဲဂံၢ်ခီၣ်ထံးတၢ်ဘျၢသဲစးခိၣ်သ့ၣ်လၢအမ့ၢ်တၢ်ရ့ဒိၣ်အမဲာ်ညါႇပၢပြးကျဲသနူတဒ်၀့ၤဒ်၀ီၤကအိၣ်ဂၢၢ်အိၣ်ကျၢၤခၢၣ်သနၢၣ်အဂီၢ်ႇအၢၣ်လီၤ၀ဲအသးလၢကလူၤပိာ်ထွဲမၤထွဲ၀ဲတၢ်လၢပာ်လီၤ၀ဲသ့ၣ်တဖၣ်အဂ့ၢ်ႇခ့ၣ်အဲၣ်ယူၣ်တၢ်ကစီၣ်အပူၤပာ်ဖျါ၀ဲန့ၣ်လီၤႉ

တကးဒံးဘၣ်ႇကီၢ်ဆၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်အံၤႇကဖီၣ်ဂၢၢ်ကျၢၤ၀ဲခီၣ်တဃာ်ကျဲသနူလၢစၢၤသွဲၣ်သီသ့ၣ်တဖၣ်အဂီၢ်အသိးႇဒ်သိးတၢ်သူၣ်ထီၣ်ကီၢ်သူလ့ၤလၢအယူာ်ကၢကအိၣ်အဂီၢ်ႇကအိၣ်ဆၢထၢၣ်၀ဲဂၢၢ်ဂၢၢ်ကျၢၤကျၢၤအဂ့ၢ်ႇပာ်ဖျါ၀ဲလၢမဲး၀ါကျိအတၢ်အၢၣ်လီၤလံာ်ဘိးဘၣ်ရၤလီၤအပူၤစ့ၢ်ကီးန့ၣ်လီၤႉ

ဘၣ်ဃးဒီးတၢ်မၤ၀ဲကီၢ်ဆၣ်ခိၣ်နၢ်ဒီးကီၢ်ဆၣ်နဲၣ်ရွဲၣ်တၢ်ကူၣ်လိာ်တဲသကိးတၢ်အိၣ်ဖှိၣ်ဘျီအံၤန့ၣ်ႇအတၢ်ပညိၣ်မ့ၢ်၀ဲဒ်သိးတၢ်ကဟံထီၣ်ဘှါရှဲ၀ဲကီၢ်ဆၣ်ခိၣ်နၢ်တဖၣ်အတၢ်တၤတၢ်လၢအကါဒိၣ်ႇလၢတၢ်ပၢတၢ်ပြးတၢ်ဖံးတၢ်မၤအပူၤအဂီၢ်ဒီးႇဒ်သိးကမျၢၢ်တၢ်ပၢတၢ်ပြးႇတၢ်ရ့လိာ်ဘၣ်ထွဲတၢ်ဂ့ၢ်သ့ၣ်တဖၣ်ကဂ့ၤဒိၣ်ထီၣ်အဂီၢ်ႇတၢ်မၤ၀ဲတၢ်ကူၣ်လိာ်တဲသကိးအတၢ်တိာ်ကျဲၤကူၣ်တရံးလၢအသီလီၤအဂ့ၢ်ခ့ၣ်အဲၣ်ယူၣ်တၢ်ကပာ်ဖျါအပူၤပာ်ဖျါ၀ဲန့ၣ်လီၤႉ

တကတီၢ်ဃီႇတၢ်ကူၣ်လိာ်တဲသကိးအတၢ်အိၣ်ဖှိၣ်အံၤန့ၣ်ႇမ့ၢ်၀ဲတၢ်ခွဲးတၢ်ယာ်အဒိၣ်အမုၢ်လၢကီၢ်ဆၣ်ခိၣ်လၢအဟဲထီၣ်တဖၣ်ကသူၣ်ထီၣ်၀ဲတၢ်ရ့လိာ်ႇတၢ်ဆဲးကျိးလိာ်သးလၢကဒဲကဒဲအဘၢၣ်စၢၤဒ်သိးကကဲထီၣ်၀ဲတၢ်ပာ်ဖှိၣ်မၤသကိးတၢ်လၢကတီၢ်ယံာ်လၢအဘျူးအဖှိၣ်အိၣ်၀ဲလၢကမျၢၢ်တၢ်ပၢတၢ်ပြးတၢ်ဖံးတၢ်မၤအပူၤအဂီၢ်အဂ့ၢ်ႇမ့ၢ်တၢ်ပညိၣ်ကွၢ်စိ၀ဲစ့ၢ်ကီးအဂ့ၢ်ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ

ဒ်န့ၣ်အသိးႇဖဲတၢ်မၤ၀ဲတၢ်ကူၣ်လိာ်တဲသကိးတၢ်အိၣ်ဖှိၣ်လၢသၢသီတီၢ်ပူၤဘျီ၀ဲအံၤန့ၣ်ႇကီၢ်ဆၣ်ခိၣ်နၢ်ဃုာ်ဒီးကီၢ်ဆၣ်နဲၣ်ရွဲၣ်ပၢဆှၢရဲၣ်ၦၤဘၣ်မူဘၣ်ဒါတဖၣ်ဟဲထီၣ်၀ဲခဲလၢာ်အိၣ်၀ဲ(၅၄)ဂၤအိၣ်၀ဲအဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်တၢ်ပာ်ဖျါအိၣ်၀ဲအသိးန့ၣ်လီၤႉ