ကၠဲးထိၣ်ကီၢ်ဆၣ် တၢ်ဒုးကဲထီၣ်တအိၣ်ပယီၤသုးခးလီၤကျိဖးဒိၣ်အဃိ ကမျၢၢ်သံ(၁)ဂၤႇဘၣ်ဒိ(၂)ဂၤ

လါယူၤ ၂၇ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ သုးကီၣ်ကး အမျိာ်သုး(၃၁၀)ခးလီၤကျိဖးဒိၣ်အဃိ ဘၣ်သံ၀ဲကမျၢၢ်ပိာ်မုၣ်သးစၢ်တဂၤဒီးဘၣ်ဒိ၀ဲဒၣ်(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကၠဲးထိၣ်ကီၢ်ဆၣ်ပူၤ သုးကီၣ်ကးအမျိာ်သုး(၃၁၀)လၢအိၣ်သ့ၤစယၣ်အံၤ ဖဲလါယူၤ ၂၅ သီ ဟါခီ ၈း၃၀ ဃၣ်ဃၣ် အဆၢကတီၢ် ခီဖျိအ၀ဲသ့ၣ်ခးလီၤကျိဖးဒိၣ်လီၤတဲာ်ပိၢ်ဖးထီၣ်၀ဲဒၣ်လၢ(အခဲၤ)သ၀ီပူၤ အူဆါ၀့အဟံၣ်မဲာ်ညါအဃိ မၣ်လၣ်ယမ့(၂၀)နံၣ်အံၤသံ၀ဲဒၣ်ဒီးဘၣ်ဒိ၀ဲဒၣ်မီၤ၀့ဆါ(၃၅)နံၣ်ႇဖိသၣ်မုၣ်မၣ်ဖၠူၤစ့ၤမိ(၉)နံၣ်သ့ၣ်တဖၣ်အံၤ အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ်အမျိာ်သုး(၃၁၀)သုးရ့ၣ်ဒီး(ခမရ-၂၀၇)သ့ၣ်တဖၣ်အံၤတၢ်ဒုးကဲထီၣ် အိၣ်ဂ့ၤ၊တအိၣ်ဂ့ၤညီနုၢ်အ၀ဲသ့ၣ်ခးလီၤ၀ဲကျိဖးဒိၣ်ဆူလီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်အိၣ်၀ဲတလီၢ်လီၢ်အဃိ ၦၤကမျၢၢ်သံဘၣ်ဒိဘၣ်ထံးႇဟံၣ်ဃီတၢ်သူူၣ်ထီၣ်ဒီးတၢ်ဖံးအီၣ်မၤအီၣ်လီၢ်ကျဲသ့ၣ်တဖၣ်ဟးဂီၤကဲထီၣ်၀ဲဒၣ်တလီၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကတီၢ်ဃီဖဲအပူၤကွံာ်လါယူၤ ၁၄ သီအနံၤန့ၣ် သုးကီၣ်ကးအမျိာ်(၃၁၀)သုးရ့ၣ်တဒူၣ်ဃီအံၤ ခးလီၤကျိဖးဒိၣ်အဃိ ဘၣ်သံ၀ဲဒၣ်(အခဲၤ)သ၀ီဃၢၤ ၀ါဒၣ်ကွ့သ၀ီ ဖိသၣ်မုၣ်(၁၄)နံၣ်ဒီးအဒ့မုၣ်(၁)နံၣ်ဘျဲၣ် ခံဂၤအံၤအဂ့ၢ်န့ၣ် သ့ၣ်ညါဘၣ်န့ၣ် လီၤႉ

ဒ်န့ၣ်အသိးဖဲအပူၤကွံာ်လါယူၤ ၂၀ သီအနံၤစ့ၢ်ကီး လၢ(အခဲၤ)သ၀ီဃၢၤ ပယီၤသုးဖီၣ်ချုးန့ၢ်၀ဲဒၣ် ဟီၣ်က၀ီၤတၢ်ဒီသဒၢကမျၢၢ်သုး(PDF) ၂ ဂၤ ဒီးဖဲန့ၣ်ခးသံကွံာ်၀ဲတဂၤႇကူာ်သံကွံာ်၀ဲဒၣ်အကိာ်တဂၤ ကဲထီၣ်တ့ၢ်အသးဒံး အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံးဘၣ်တ့ၢ်ဃာ်ခ့ၣ်အဲးစံၣ်-ကညီတၢ်ကစီၣ်အိၣ်န့ၣ်လီၤႉ

ကၠဲးထိၣ်ကီၢ်ဆၣ်ပူၤ စးထီၣ်ဖဲတလါအံၤလါယူၤထီၣ်န့ၣ် ပယီၤသုးနုာ်လီၤဟူးဂဲၤဟဲအါထီၣ်၀ဲဒၣ်လၢဖွ့ဖူကၢ်ႇ ခရၢၢ်ဒီး ၀ီၢ်ကျီၢ်ကရူၢ်သ့ၣ်တဖၣ်အံၤအပူၤဒီးတကးဒံးဘၣ်အမဲာ်ညါခီဖျိအ၀ဲသ့ၣ်ခးလီၤ၀ဲဒၣ်ကျိဖးဒိၣ် အဃိတလီၢ်လီၢ်အဃိ ကရူၢ်သၢဘ့ၣ်အံၤအပူၤၦၤကမျၢၢ်သ့ၣ်တဖၣ်ပျံၤတၢ်ဖုးတၢ်ဘၣ်ဃ့ၢ်ထီၣ်ဒံး၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ