လါယူၤ ၂၃ သီ, ၂၀၂၄ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆) ကီးတရံးကီၢ်ဆၣ်အပူၤ ဖဲလါယူၤ ၂၁ သီအနံၤ န့ၣ် (KNLA)သုးပာ်ဖှိၣ်ထီၣ်မၤန့ၢ်၀ဲစူးကလံပယီၤသုးကလၢၤတၢ်လီၢ်ခဲလၢာ်လံဒီး ဖဲန့ၣ်တၢ်ဖီၣ်န့ၢ်၀ဲ ပယီၤသုး(၂၁)ဂၤဒီး တၢ်မၤန့ၢ်ဃုာ်၀ဲကျိချံၦာ်သၣ်အါအါဂီၢ်ဂီၢ်အဂ့ၢ်န့ၣ် ဒူပျာ်ယာ်ကီၢ်ရ့ၣ်တၢ်ကစီၣ်ထုးထီၣ် ပာ်ဖျါ၀ဲဖဲမဟါလါယူၤ ၂၂ သီအနံၤ န့ၣ်လီၤႉ
ကီးတရံးကီၢ်ဆၣ် ပယီၤသုးခီၣ်ချ့သုးရ့ၣ်(ခမရ-၅၆၀)စူးကလံသုးကလၢၤအံၤ စးထီၣ်ဖဲအပူၤကွံာ်လါယူၤ ၁၇ သီအနံၤ န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်စးထီၣ်နုာ်လီၤခး၀ဲဒီးဖဲလါယူၤ ၂၁ သီ လၢလွံၢ်သီအတီၢ်ပူၤ ဘၣ်တၢ်မၤန့ၢ်၀ဲသုးကလၢၤတၢ်လီၢ်ဒီတဖျၢၣ်ညါဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
တၢ်ထီၣ်န့ၢ်စူးကလံပယီၤသုးကလၢၤတၢ်ဒုးဘျီ၀ဲအံၤအပူၤန့ၣ်တၢ်ဖီၣ်န့ၢ်၀ဲဒုၣ်ဒါ(၂၁)အကျါန့ၣ်ပၣ်ဃုာ်၀ဲ သုးဒ့ခိၣ် သုးခိၣ်ဒိၣ်စိ ၀နၣ်တိ တကးဒံးဘၣ်ပယီၤသုးတကပၤသံ၀ဲဒၣ်(၆)ဂၤႇဘၣ်ဒိဘၣ်ထံး၀ဲဒၣ်အါမးအဂ့ၢ်န့ၣ် ဒူပျာ်ယာ်ကီၢ်ရ့ၣ် တၢ်ကစီၣ် စံး၀ဲန့ၣ်လီၤႉ
ဒ်န့ၣ်အသိးတၢ်ဒုးဘျီ၀ဲအံၤအပူၤစ့ၢ်ကီးမ့မ့ၢ်လၢ(KNLA)တၢ်ပၢဆၢသုးပာ်ဖှိၣ်တကပၤန့ၣ် ဘၣ်ဒိဘၣ်ထံး၀ဲ ခဲလၢာ်(၁၅)ဂၤ ဒီးလၢန့ၣ်အမဲာ်ညါတၢ်မၤန့ၢ်ဃုာ်၀ဲကျိချံၦာ်သၣ်လၢဒုၣ်ဒါအအိၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကျိချံၦာ်သၣ်လၢတၢ်ပၢၢ်ဆၢသုးပာ်ဖှိၣ်မၤန့ၢ်၀ဲသ့ၣ်တဖၣ်န့ၣ်မ့ၢ်၀ဲ(၆၀ မမ) ၂ ခိၣ်ႇ (RPG) ၁ ခိၣ်ႇ (MA-1) ၁၂ ခိၣ်ႇ (MA-2) ၁၅ ခိၣ်ႇ (MA-3) ၄ ခိၣ်ႇ (MA-79) ၂ ခိၣ်ႇ စဲးလးတခိၣ်ႇ (၈၁ မမ)အချံ ၃၇ ဖျၢၣ်ႇ (၆၀ မမ)အချံ ၃၉ ဖျၢၣ်ႇ မ့ၣ်ပိၢ်အဖးဒိၣ်အဆံးခဲလၢာ်(၃၀)ဖျၢၣ်ႇ ဟီၣ်လာ်မ့ၣ်ပိၢ်ဃုာ်ဒီးမ့ၣ်ပိၢ်လၢတၢ်တ့၀ဲဒီးစုခဲလၢာ် ပာ်ဖှိၣ်(၄၃)ဖျၢၣ်ႇ စဲးကတိၤတၢ်(၂)ဖျၢၣ်ႇ (MA-1,2,3,4)အဒၢ ၇၀ ဒၢႇ (MA-1,2,3,4)အချံ ၆၅၀၁ ဖျၢၣ်ႇ စဲးလးအချံ(၇၉၂၃)ဖျၢၣ်ႇ(RPG-7) အချံ ၇၇ ဖျၢၣ်ႇ ဘျါအ့ၣ်(၅၄)ကုးႇ စဲးမၤဆှဲဟီၣ်လာ်မ့ၣ်ပိၢ်)တခါႇ ဒြိဖိဆံး(၁)ဘ့ၣ်ဃုာ်ဒီးသုးတၢ်ပီးတၢ်လီလၢ အဂၤ သ့ၣ်တဖၣ် တၢ်မၤန့ၢ်၀ဲဒၣ် အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တချုးတၢ်လဲၤထီၣ်ခးစူးကလံပယီၤသုးကလၢၤအံၤဒံးဘၣ်အခါဖဲအပူၤကွံာ်(၂၀၂၄)လါမးရှး ၂၅ တုၤလၢ ၃၀ သီ အနံၤန့ၣ် (KNLA)တၢ်ပၢၢ်ဆၢသုးပာ်ဖှိၣ်ဒုးသ့ၣ်ညါ၀ဲဒၣ်လံာ်တဆီဆူပယီၤသုးသ့ၣ်တဖၣ်အအံၤအအိၣ်လၢ ကပာ်လီၤစုက၀ဲၤ ဘၣ်ဆၣ် ခီဖျိအ၀ဲသ့ၣ်တလူၤပိာ်မၤထွဲ၀ဲဘၣ်အဃိစးထီၣ်ဖဲလါမးရှး ၃၀ တုၤလါယူၤ ၁၆ သီန့ၣ် (KNDO)ဒီး (KNLA) တီခိၣ်ရိၣ်မဲတၢ်ပၢၢ်ဆၢသုးကရူၢ်တဖၣ် စးထီၣ်လဲၤခးစဲးပြဲးအ၀ဲသ့ၣ်လၢဒြိႇကျိဖးဒိၣ်သ့ၣ် တဖၣ်ပၢၢ်တုၤလၢတၢ်မၤန့ၢ်၀ဲသုး ကလၢၤအံၤတစုအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
