တနံၤဃီအတီၢ်ပူၤပယီၤသုးကီၣ်ကးပညိၣ်ခးလီၤကျိဖးဒိၣ်ဆူဒူသ၀ီပူၤအဃိဘၣ်ဒိကမျၢၢ်(၄)ဂၤ

လါယူၤ ၂၅ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်မူကီၢ်ဆၣ်ဟီၣ်က၀ီၤအပူၤဖဲပူၤကွံာ်လါယူၤ(၂၃)သီလၢ တနံၤဃီအတီၢ်ပူၤခီဖျိပယီၤသုးကီၣ်ကးပညိၣ်ခးလီၤ၀ဲကျိဖးဒိၣ်လိၤလိၤဆူကမျၢၢ်ဒူသ၀ီအပူၤအဃိဘၣ်ဒိ၀ဲကမျၢၢ်(၄)ဂၤအဂ့ၢ်မူကီၢ်ဆၣ်ၦၤဘၣ်မူဘၣ်ဒါစံးဒၣ်န့ၣ်လီၤႉ

ပယီၤသုးကီၣ်ကးလၢပညိၣ်ခးလီၤကျိဖးဒိၣ်လိၤလိၤဆူကမျၢၢ်ဒူသ၀ီအပူၤအံၤန့ၣ်မ့ၢ်၀ဲ(စွ့ၤ၀ါ)ခီၣ်သုးရ့ၣ်(ခလရ-၃၀၇)သုးရ့ၣ်ဒီးလၢန့ၣ်အမဲာ်ညါပယီၤသုးအံၤတၢ်ဒုးတၢ်ယၤကဲထီၣ်အသးတအိၣ်ဘၣ်ဘၣ်ဆၣ်ခးလီၤ၀ဲ ကျိဖးဒိၣ်ဒ်အံၤအဃိန့ၣ်တၢ်သံတၢ်ၦၢ်တၢ်ဘၣ်ဒိဘၣ်ထံးအိၣ်၀ဲကိးနံၤဒဲးအဂ့ၢ်မူကီၢ်ဆၣ်အၦၤကတိၤတၢ်ပၢသရၣ်စီၤစံးပတြၢၤစံး၀ဲဒ်အံၤန့ၣ်လီၤႉ

“အ၀ဲသ့ၣ်ခးလီၤ၀ဲဒၣ်ကျိဖးဒိၣ်န့ၣ်အဘၣ်၀ဲဒၣ်(သံဖၠူၤဆ့ၣ်)န့ၣ်သၢဂၤဒီး(ငတိက့ၣ်)သ၀ီန့ၣ်တဂၤမီၤနီၤႉ အ၀ဲသ့ၣ်ခးလီၤကျိဖးဒိၣ်န့ၣ်တမ့ၢ်လၢတၢ်ဒုးကဲထီၣ်ဘၣ်ႉ စးထီၣ်လၢလါအ့ဖြ့ၣ်တုၤလၢခဲအံၤန့ၣ်ပညိၣ်ခးလီၤ ၀ဲကျိဖးဒိၣ်လၢဒူသ၀ီအပူၤတီတီလီၤႉ တၢ်သံတၢ်ၦာ်တၢ်ဘၣ်ဒိဘၣ်ထံးအိၣ်၀ဲကိးမုၢ်နံၤဒဲးလီၤႉ“ အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါပယီၤသုးကီၣ်ကးအံၤအခီၣ်သုးလၢကဟဲထီၣ်ဟူးဂဲၤ၀ဲတၢ်ခီန့ၣ်တအိၣ်ဘၣ်သနါက့ပယီၤသုးကလၢၤဒ်အမ့ၢ်(စွ့ၤ၀ါ)(ခလရ-၃၀၇)သုးရ့ၣ်ဒီး(ခမရ-၄၃၉)သုးရ့ၣ်သ့ၣ်တဖၣ်ခးလီၤ၀ဲကျိဖးဒိၣ်ဆူကမျၢၢ် ဒူသ၀ီအပူၤဒ်အံၤန့ၣ်အိၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်ကီၢ်ဆၣ်အၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ကမျၢၢ်ၦၤဒူသ၀ီဖိလၢသုးကီၣ်ကးခးလီၤကျိဖးဒိၣ်ဘၣ်ဒိ၀ဲ(၄)ဂၤအံၤန့ၣ်အကျါပာ်ဃုာ်ပိာ်မုၣ်(၂)ဂၤဒီးၦၤသ့ၣ်တဖၣ်အံၤန့ၣ်မ့ၢ်ၦၤသးနံၣ်(၅၀)ဆူအဖီခိၣ်လီၤအဂ့ၢ်ႇ ၦၤလၢဘၣ်ဒိသ့ၣ်တဖၣ်အကျါတနီၤန့ၣ်တၢ်ဘၣ်ယိၣ်အိၣ်၀ဲဒၣ်ဒီးဒ်န့ၣ်အသိးမူကီၢ်ဆၣ်ဆူၣ်ချ့မၤစၢၤ၀ဲၤကျိၤကူဆါယါဘျါန့ၢ်စ့ၢ်ကီး၀ဲအဂ့ၢ်သ့ၣ်ညါဘၣ်န့ၣ်လီၤႉ

ဒ်န့ၣ်အသိးစးထီၣ်လၢသုးဟံးန့ၢ်တၢ်စိတၢ်ကမီၤတုၤလီၤလၢ(၂၀၂၄)နံၣ်လါမ့ၤအတီၢ်ပူၤအံၤချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၄၉၄ ၅၉၀)ဂၤဒီးခ့ၣ်အဲၣ်ယူၣ်ကီၢ်ရ့ၣ်(၇)ဘ့ၣ်လၢၤအပူၤ ချၢၣ်လွံၢ်ထူၣ်မ့ၢ်ကီၢ်ရ့ၣ်တဘ့ၣ်လၢၦၤဃ့ၢ်မှံဟးဖျိးအနီၣ်ဂံၢ်အါကတၢၢ်လီၤအဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်တၢ်ပာ်ဖျါပူၤအသိးန့ၣ်လီၤႉ