ကၠဲးထိၣ်ကီၢ်ဆၣ် တနံၤဃီပယီၤသုးခးလီၤကျိဖးဒိၣ်(၂၀)ဃၣ်ဃၣ် ကမျၢၢ်သံ ၁ ဂၤ

လါအီကူာ် ၂၅ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ပူၤ တနံၤဃီအတီၢ်ပူၤပယီၤသုးပညိၣ်ခးလီၤကျိဖးဒိၣ်အဖျၢၣ်(၂၀) ဃၣ်ဃၣ်ဆူလီၢ်က၀ီၤဒူသ၀ီပူၤအဃိ ဘၣ်သံ၀ဲကမျၢၢ် ၁ ဂၤ အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ

ဖဲမဟါလါအီကူာ် ၂၄ သီ ဂီၤခီ ၇း၀၀ အဆၢကတီၢ် သုးကီၣ်ကးအမျိာ်သုး(၃၁၀)သုးရ့ၣ်လၢအိၣ်သ့ၣ်စ့ၣ်ယးအံၤ တၢ်ပၢၢ်ဆၢသုးပာ်ဖှိၣ်ကရူၢ်ကွံာ်စိအ၀ဲသ့ၣ်လၢ(၆၀ မမ)ကျိဖးဒိၣ်၀ံၤတကတီၢ်ဃီ ဖဲဂီၤခီ ၁၀း၂၀ အဆၢကတီၢ်န့ၣ် ပယီၤသုး၀ဲန့ၣ်က့ၤခးလီၤကဒါကျိဖးဒိၣ်တစှၤန့ၢ်အဖျၢၣ်(၂၀)ဃၣ်ဃၣ်လီၤတဲာ်ပိၢ်ဖးထီၣ်၀ဲလၢ၀ါဒၣ်ကွ့သ၀ီႇအခဲၤႇ သိခွၣ်ႇယ့ၤကၠီၤသ၀ီသ့ၣ်တဖၣ်အံၤအခိၣ်အဃၢၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

ခီဖျိကျိဖးဒိၣ်အံၤအဃိ ဘၣ်သံ၀ဲ၀ါဒၣ်ကွ့သ၀ီဖိ ကိၤခၠါမ့ၣ်အီၤ အံၤဒီး တကးဒံးဘၣ်လၢန့ၣ်အမဲာ်ညါ ၦၤကမျၢၢ်အတၢ်ထူၣ်တၢ်ဘိလၢအိၣ်သ၀ီချၢသ့ၣ်တဖၣ်စ့ၢ်ကီးဘၣ်ဒိဘၣ်ထံးဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ် န့ၣ်လီၤႉ

ကၠဲးထိၣ်ကီၢ်ဆၣ်ပူၤ အပူၤကွံာ်လါယူၤလံတလါအတီၢ်ပူၤ ခီဖျိသုးကီၣ်ကးခီၣ်ချ့သုးရ့ၣ်(ခမရ-၂)ဒီး(၃၁၀) အမျိာ်သုးရ့ၣ် သ့ၣ်တဖၣ်အံၤခးလီၤကျိဖးဒိၣ်ဆူဒူသ၀ီပူၤအဃိ ဘၣ်သံ၀ဲကမျၢၢ်(၁)ဂၤႇ ဘၣ်ဒိ(၉)ဂၤ အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤ အသိး သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါ ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤပယီၤသုးအံၤ ခးလီၤကျိဆူလီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်အိၣ်၀ဲတလီၢ်လီၢ်ဒီး ဒ်န့ၣ်အသိးဒုးယၤတၢ်ဖ့ၣ်စၢစ့ၢ်ကီး ကဲထီၣ်၀ဲလၢခံခီခံကပၤအဘၢၣ်စၢၤခဲအံၤခဲအံၤအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ