လါအီကူာ် ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ အပူၤကွံာ်လါအခါခီဖျိတၢ်စူၤထံဒိၣ် ထီၣ်အဃိ မီၤစကိၤကီၢ်ဆၣ်ဒီးဖၣ်အၣ်ကီၢ်ဆၣ် ကီၢ်ဆၣ်(၂)ဘ့ၣ်ပူၤ ဘုသံဘုဟးဂီၤ၀ဲဒၣ်အအ့ကၢၣ်(၄၀၀၀)ဃၣ်ဃၣ် ဒီး ကမျၢၢ်လီၤအုးသံ၀ဲဒၣ်(၃)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤႉ
ဒူသထူၣ်ကီၢ်ရ့ၣ်ပူၤ စးထီၣ်ဖဲအပူၤကွံာ်လါယူၤလံ ၂၄ သီန့ၣ် ခီဖျိတၢ်စူၤတပယူာ်ဃီဒီးထံဒိၣ်ထီၣ်လၢဒူပူၤသ၀ီပူၤ တကးဒံးဘၣ်ဘုသ့ၣ်တဖၣ်ထံလုၢ်ဘၢအီၤအါအါဂီၢ်ဂီၢ်အဃိ ကီၢ်ဆၣ်(၂)ဘ့ၣ်အံၤအပူၤ ဘုသံဘုဟးဂီၤ၀ဲဒၣ်ခဲလၢာ် (၃၈၉၄)အ့ကၢၣ်ဒီးလီၢ်က၀ီၤကမျၢၢ်ပိာ်ခွါလီၤအုးသံ၀ဲဒၣ်လၢထံ(၃)ဂၤ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ
ခီဖျိတၢ်စူၤထံဒိၣ်ထီၣ်အဃိ လီၢ်က၀ီၤကမျၢၢ်လၢအလီၤအုးသံ(၃)ဂၤန့ၣ်မ့ၢ်၀ဲမီၤစကိၤကီၢ်ဆၣ်ပူၤ မီၤပီၣ်ကၠဲ(၃၈)နံၣ် သံဖဲလါအီကူာ် (၂၆)သီႇ အူအ့၀့စီၣ်(၅၀)နံၣ် သံဖဲလါယူၤလံ ၂၉ သီ ဒီး စီၤကဲၢ်ငဲ(၂၄)နံၣ် သံဖဲလါယူၤလံ(၂၉)သီ အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါဒ်ကီၢ်ရ့ၣ်တၢ်မၤနီၣ်စရီပူၤပာ်ဖျါ၀ဲအသိးန့ၣ် မီၤစကိၤကီၢ်ဆၣ်ပူၤ ဘုသံဘုဟးဂီၤ၀ဲဒၣ်ခဲလၢာ် (၁၁၂၁)အ့ကၢၣ်ႇ ဘုချံဟးဂီၤ၀ဲဒၣ်(၆၄၆)နာ်ဒီး မ့မ့ၢ်လၢဖၣ်အၣ်ကီၢ်ဆၣ်ပူၤန့ၣ်ဘုသံဘုဟးဂီၤ၀ဲဒၣ်ခဲလၢာ်(၂၇၇၃) အ့ကၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒူသ၀ီကရူၢ်လၢဘုသံဘုဟးဂီၤကဲထီၣ်သ့ၣ်တဖၣ်န့ၣ်မ့ၢ်၀ဲ မီၤစကိၤကီၢ်ဆၣ်ပူၤလၢအမ့ၢ် ကနုာ်ကရူၢ်,ကီးရ့ၣ်ကရူၢ်ႇ ပါကိကရူၢ်ပူၤဒူသ၀ီသ့ၣ်တဖၣ်ဒီးဒ်န့ၣ်အသိးမ့မ့ၢ်လၢဖၣ်အၣ်ကီၢ်ဆၣ်န့ၣ် ဘူၣ်ပြၢးကရူၢ်ႇဟးတရဲာ်ကရူၢ်ႇ အံဟဲကရူၢ်, နိၣ်မကွံၢ်ကရူၢ်ႇ၀ဲပၠၣ်ကရူၢ်ႇတကီၤဘိကရူၢ်ႇမဲၢ်ကနးကရူၢ်ႇနီဖးဒိၣ်ကရူၢ်သ့ၣ်တဖၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ
တနံၣ်အံၤခီဖျိတၢ်စူၤထံဒိၣ်ထီၣ်ဘုဟးဂီၤဘုသံအါအဖီခိၣ်နံၣ်လၢကဟဲကမျၢၢ်လၢအဘုသံတဖၣ်အံၤ လၢကအီၣ် ကအီအဂီၢ်သဂၢၢ်ဘၣ်၀ဲတၢ်ကီတၢ်ခဲသ့အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံးဘၣ် ခ့ၣ်အဲးစံၣ်– ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ကမျၢၢ်ဒူဖိသ၀ီဖိသ့ၣ်တဖၣ်ဒုတနံၣ်အဂီၢ်ကလုၢ်အီၣ်အသးသမူဒုကဆၢၣ်မဲာ်ဘၣ်၀ဲအီၣ်တလၢတၦဲၤ ဘၣ် တၢ်ကီတၢ်ခဲအိၣ်၀ဲဒၣ်မီၤနီၤႉတနံၣ်ညါအံၤမ့ဘၣ်ကွၢ်န့ၣ်ထံဒိၣ်အနံၤအါသီအါႇၦၤမၤအီၣ်ဘုတဖၣ်န့ၣ်ထံလုၢ်ဘၢအဘုအဘုသံ၀ဲဒၣ်အိၣ်အါအါဂီၢ်ဂီၢ်လီၤႉမ့ဘၣ်ကွၢ်ထဲမီၤစကိၤကီၢ်ဆၣ်န့ၣ် ထဲကရူၢ်(၃)ဘ့ၣ်လီၤန့ၣ်ဘုသံအိၣ်လၢအ့ကၢၣ်တကထိ ဘျဲၣ်ႉ မ့မ့ၢ်လၢဖၣ်အၣ်ကီၢ်ဆၣ်ခီန့ၣ်ထံလုၢ်ဘၢဘုသံအ့ကၢၣ်အိၣ်(၂၇၇၀)ဘျဲၣ်ညါမီၤႉအဃိခဲမဟိတနံၣ် ကမျၢၢ်သ့ၣ် တဖၣ်ဒုလၢကလုၢ်အီၣ်သးသမူတနံၣ်အဂီၢ်န့ၣ်ကဆၢၣ်မဲာ်ဘၣ်တၢ်အီၣ်တၢ်အီကီကီခဲခဲန့ၣ်ဖျါ၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ
ဒူသထူၣ်ကီၢ်ရ့ၣ် ကီၢ်ဆၣ်(၂)ဘ့ၣ်အံၤအမဲာ်ညါ ကီၢ်ဆၣ်လၢအဂၤသ့ၣ်တဖၣ်စ့ၢ်ကီး ခီဖျိထံဒိၣ်အဃိ ဘုသံဘုဟးဂီၤ ကဲထီၣ်သးအိၣ်ဘၣ်ဆၣ်လၢကသ့ၣ်ညါဘုသံအ့ကၢၣ်နီၣ်ဂံၢ်စရီလီၤတံၢ်လီၤဆဲးအဂီၢ် ကီၢ်ဆၣ်ၦၤဘၣ်မူဘၣ်ဒါ ဃုမၤလီၤတံၢ်၀ဲအဖၢမုၢ်အဃိတဲလီၤတံၢ်နီၣ်ဂံၢ်နီၣ်ဒွးတသ့ဒံးဘၣ်အဂ့ၢ်န့ၣ် ကီၢ်ရ့ၣ်ၦၤကတိၤတၢ်ပၢ ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ
စးထီၣ်ဖဲအပူၤကွံာ်လါယူၤလံ ၂၀ သီဃၣ်ဃၣ်န့ၣ် တၢ်စးထီၣ်စူၤ၀ဲလၢကီၢ်ပယီၤတၢ်လီၢ်သကုၤဆးဒးအဃိ ခူ၀့ၢ်ဃုာ်ဒီး ဒူသ၀ီလၢအိၣ်တၢ်လီၢ်လီၤဖုၣ်သ့ၣ်တဖၣ်ထံထီၣ်ဘၣ်သုးလီၢ်သုးကျဲအိၣ်၀ဲအသိး ဘုသံဘုဟးဂီၤအမဲာ်ညါပၢၢ်တုၤလၢ တၢ်သံတၢ်ဘၣ်ဒိဘၣ်ထံးစ့ၢ်ကီးကဲထီၣ်အိၣ်၀ဲအဂ့ၢ်န့ၣ် လီၢ်က၀ီၤတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ် လီၤႉ
