လါစဲးပထ့ဘၢၣ် ၁၉ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ အပူၤကွံၥ်စှၤသီအခါ ခီဖျိထံဒိၣ်ဃိၣ်ယွၤအဃိ ဒူသ၀ီကရူၢ်(၄)ဘ့ၣ်ဘၣ်သုးလီၢ်သုးကျဲအအိၣ်ဒီးခဲအံၤလၢကက့ၤဆီလီၤက့ၤသးအဂီၢ်လိၣ်ဘၣ်၀ဲဂံၢ်ခီၣ်ထံးတၢ်အီၣ်တၢ်အီ တၢ်ဆီၣ်ထွဲမၤစၢၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
ဖဲလါစဲးပထ့ဘၢၣ်ထီၣ်အခါ ခီဖျိတၢ်စူၤထံဒိၣ်ထီၣ်အဃိ ဖၣ်အၣ်ကီၢ်ဆၣ်ပူၤ ဒူသ၀ီကရူၢ်(၄)ဘ့ၣ် သ၀ီ ၂၃ ဖျၢၣ် ပှၤကမျၢၢ်တဖၣ်ဘၣ်သုးလီၢ်သုးကျဲဒီးတကီၢ်ခါခဲအံၤထံက့ၤလီၤလံဘၣ်ဆၣ်ဖဲထံဒိၣ်ထီၣ်အခါခီဖျိအဟုသး,ဘုဒီးဟံၣ်တၢစီၤသူတၢ်စွဲတၢ်ဖိတၢ်လံၤတဖၣ်လီၤဘျၢလၢထံကျါဟးဂီၤအိၣ်အဃိ တနီၤန့ၣ်လၢကအီၣ်ကအီအဂီၢ်လိၣ်ဘၣ်၀ဲတၢ်ဆီၣ်ထွဲမၤစၢၤအဂ့ၢ်န့ၣ် ဒူသထူၣ်ကီၢ်ရ့ၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤ.
“မဟါထံဒိၣ်လုၢ်ဘၢ၀ဲဒၣ်ဒူသ၀ီသ့ၣ်တဖၣ်ဘၣ်သုးလီၢ်သုးကျဲ.မ့၀ံၤအဟံၣ်ပူၤဃီပူၤဟုသးတဖၣ်န့ၣ်ဘၣ်ဟးဂူၥ်ဟးဂီၤအိၣ်မီၤနီၤ. ခဲအံၤန့ၣ်ထံက့ၤလီၤကဒါဘျီက့ၤမၤပျီလီၤက့ၤအဟံၣ်ပူၤဃီပူၤကပံၥ်တၢ်ဘၣ်အၢဘၣ်သီသ့ၣ်တဖၣ်.ခဲအံၤဒူဖိသ၀ီဖိတဖၣ် ကအီဘၣ်ထံကဆှီအဂီၢ်လိၣ်ဘၣ်၀ဲထံအီ,ဖၣ်ကပူၤဂံၢ်ခီၣ်ထံးတၢ်အီၣ်တၢ်အီတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖၣ်အၣ်ကီၢ်ဆၣ်ပူၤ ဖဲတၢ်စူၤထံဒိၣ်အခါန့ၣ်သ၀ီကရူၢ်(၄)ဘ့ၣ်လၢအဘၣ်သုးလီၢ်သုးကျဲသ့ၣ်တဖၣ်န့ၣ်မ့ၢ်၀ဲ တကီၤဘိကရူၢ်, ၀ဲပၠၣ်ကရူၢ်,နိၣ်မကွံၢ်ကရူၢ်,ဘူၣ်ပြၢးကရူၢ် ဒူသ၀ီပၥ်ဖှိၣ်(၂၃)ဖျၢၣ် ဟံၣ်ဒူၣ်(၂၁၀၀)ဘျဲၣ်ဒီး ပှၤနီၣ်ဂံၢ်ပၥ်ဖှိၣ်အိၣ်၀ဲ(၁၃၀၀၀)ဘျဲၣ် အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါအတၢ်မၤနီၣ်စရီအသိး သ့ၣ်ညါဘၣ်န့ၣ်လီၤ.
ဖဲတၢ်စူၤထံဒိၣ်အခါခီဖျိထံအံၤထီၣ်တုၤလၢဒူသ၀ီဟံၣ်ပူၤဃီပူၤအိၣ်အဃိတၢ်အီၣ်တၢ်အီ,ဟံၣ်တၢ်ပီးတၢ်လီလၢအဂုၤအဂၤ တဖၣ်ဟးဂူၥ်ဟးဂီၤအိၣ်၀ဲဒီးဘၣ်ဆၣ်လၢကသ့ၣ်ညါတၢ်ဟးဂီၤအနီၣ်ဂံၢ်စရီလီၤတံၢ်လီၤဆဲးအဂီၢ်န့ၣ်လီၢ်က၀ီၤပှၤဘၣ်မူဘၣ်ဒါဃိထံသ့ၣ်ညါ၀ဲအဖၢမုၢ်အဃိ တဲလီၤတံၢ်စရီတဘၣ်ဒံးဘၣ်အဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါယူၤလံအခါတၢ်စူၤထံဒိၣ်ဃိၣ်ယွၤအဖီခိၣ်ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်သဂၢၢ်ဘၣ်၀ဲ ဘုသံဘုၢ်ဃၢ်လီၤတၢ်ဂ့ၢ်ကီဒီးတလါအံၤတၢ်က့ၤစူၤကဒါခံ၀ီတ၀ီအဃိဘုသံဘကဟးဂီၤအနီၣ်ဂံၢ်အိၣ်ကအါန့ၢ်ဒံအလီၢ်လီၤတံၢ် အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
ခီဖျိတၢ်စူၤထံဒိၣ်ဃိၣ်ယွၤအံၤအဃိမါတလ့ကီၢ်ခီဒိၣ်,ယိၤဒိၣ်ကီၢ်စဲၣ်,ကရ့ၣ်နံၣ်ကီၢ်စဲၣ်,ခၠီကီၢ်စဲၣ်,ကညီကီၢ်စဲၣ်,ပကိကီၢ်ခီဒိၣ်ဒီး စကဲကီၢ်ခီဒိၣ်,မကွ့ကီၢ်ခီဒိၣ်တၢ်လီၢ်သကုၤဆးဒးထံဒိၣ်ဃိၣ်ယွၤတၢ်သံတၢ်ဘၣ်ဒိဘၣ်ထံး,ဟံၣ်တၢ်သူၣ်ထီၣ်,တၢ်သူၣ်တၢ်ဖျး,ဆၣ်ဖိကီၢ်ဖိသံဘၣ်ဒိဘၣ်ထံးတၢ်ဟးဂူၥ်ဟးဂီၤကဲထီၣ်သးအိၣ်၀ဲအါမးအဂ့ၢ်န့ၣ် (MoHADM/KNU/KNPP/CNF)ထုးထီၣ်ပၥ်ဖျါ ၀ဲဖဲလါစဲးပထ့ဘၢၣ် ၁၇ သီအနံၤန့ၣ်လီၤ.
လၢတၢ်န့ၣ်အဃိလၢထံဖိကီၢ်ဖိကမျၢၢ်လၢအဘၣ်ကွၢ်ဆၢၣ်မဲၥ်ထံဒိၣ်ဃိၣ်ယွၤသ့ၣ်တဖၣ်အံၤလၢကက့ၤအိၣ်သူၣ်ထီၣ်ဆီလီၤက့ၤသးအဂီၢ်လိၣ်ဘၣ်၀ဲတၢ်အီၣ်တၢ်အီ,ထံအီ,တၢ်ခိဒုး,ဆူၣ်ချ့တၢ်အံးထွဲကွၢ်ထွဲတကးဒံးဘၣ်လၢအ၀ဲသ့ၣ်ကက့ၤသူၣ်ထီၣ်ဘှီထီၣ်က့ၤ အဟံၣ်အဃီတၢ်သူၣ်ထီၣ်သ့ၣ်တဖၣ်အံၤအဂီၢ်လိၣ်ဘၣ်၀ဲဒၣ်တၢ်ဆီၣ်ထွဲမၤစၢၤအါမးအဂ့ၢ်န့ၣ် ခ့ၣ်အဲၣ်ယူၣ်လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
