လါအီးကထိဘၢၣ် ၁သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်တၢ်ြကဲၢ်ကီၢ်ဆၣ်ပီသဝီကရူၢ်ဟီၣ်ကဝီၤအပူၤဘၣ်ဃးဒီးတၢ်မၤလၢၢ်မၤလ့အတၢ်ဖံးတၢ်မၤအံၤ,ကီၢ်ရ့ၣ်ဒီးကီၢ်ဆၣ်ပှၤဘၣ်မူဘၣ်ဒါတဖၣ်ကစးထီၣ်မၤဝဲတၢ်သမံသမိးအဂ့ၢ်,ဖၣ်အၣ်ကီၢ်ရ့ၣ်ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တၢ်ြကဲၢ်ကီၢ်ဆၣ်အပူၤကမျၢၢ်တဖၣ်ဃ့ထီၣ်ဝဲလၢတၢ်ကပတုၥ်ကွံၥ်တၢ်မၤလၢၢ်လ့တၢ်မၤအဖီခိၣ်,တၢ်မၤလၢၢ်အတၢ်ဖံးတၢ်မၤအံၤမ့ၢ်တၢ်ဘၣ်ဒိဘၣ်ထံးလၢကမျၢၢ်အဂီၢ်အိၣ်ဝဲထဲလဲၣ်အဂ့ၢ်န့ၣ်,နဲၣ်လီၤဝဲကီၢ်ရ့ၣ်ဒီးကီၢ်ဆၣ်ပှၤဘၣ်မူဘၣ်ဒါတဖၣ်လၢကလဲၤသမံသမိးမၤလီၤတံၢ်တၢ်ဂ့ၢ်တၢ်ကျိၤအဂ့ၢ်,ဖၣ်အၣ်ကီၢ်ရ့ၣ်ခိၣ်ပဒိၣ်အီၣ်မီၣ်အ့စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ဂ့ၢ်ဝဲအံၤပှၤပၥ်ဖျါထီၣ်ဖးယံၥ်လံအဃိန့ၣ်ယတဲကျၢလီၤက့ၤကီၢ်ဆၣ်ပှၤဘၣ်မူဘၣ်ဒါလၢကလဲၤသမံသမိးတၢ်မၤလီၤတံၢ်ဝဲတၢ်လီၢ်တခါန့ၣ်အပူၤတၢ်မၤလၢၢ်အံၤမ့ၢ်အဘၣ်ဒိဘၣ်ထံးကမျၢၢ်တၢ်ဖံးအီၣ်မၤအီၣ်လီၢ်ထဲလဲၣ်န့ၣ်လီၤ.ဒီးဖဲလၢခံကတၢၢ်န့ၣ်ကီၢ်ရ့ၣ်နဲၣ်ရွဲၣ်ဟဲပၥ်ဖျါထီၣ်န့ၢ်ယၤလၢတၢ်ဂ့ၢ်တၢ်ကျိၤ(အကၠါ)န့ၣ်,ကရူၢ်သၢဘ့ၣ်ကကမျၢၢ်တဖၣ်တခီတဆဲးလီၤစုမုၢ်ကျၢၢ်ဘၣ်,တဘၣ်သးဝဲဘၣ်အဃိန့ၣ်ယတဲလီၤကဒါက့ၤအီၤဒ်ယနဲၣ်လီၤပၥ်ဒ်လၢညါအသိးလၢကလဲၤကွၢ်သမံသမိးကဒီးဝဲန့ၣ်လီၤ.ဘၣ်မနုၤကမျၢၢ်တဖၣ်န့ၣ်တအဲၣ်ဝဲတၢ်မၤလၢၢ်အံၤလၢဘၣ်န့ၣ်မ့ၢ်လၢတၢ်ဂ့ၢ်မနုၤအဃိလဲၣ်သ့ၣ်တဖၣ်န့ၣ်လီၤ.ယနဲၣ်လီၤလၢအဝဲသ့ၣ်ကမၤတၢ်သမံသမိးလီၤတံၢ်လီၤဆဲးက့ၤန့ၣ်လီၤ”အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါ,တၢ်သမံသမိးဘျီဝဲအံၤဝံၤအလီၢ်ခံမ့ၢ်ကဲထီၣ်တၢ်ဘၣ်ဒိဘၣ်ထံး,တၢ်ကီတၢ်ခဲလၢကမျၢၢ်အဂီၢ်ကီၢ်နီၢ်န့ၣ်,ဒ်သိးတၢ်ကပတုၥ်ကွံၥ်တၢ်ဖံးတၢ်မၤအံၤအဂီၢ်ကတဲသကိးဝဲတၢ်ဒီးသုးခိးကီၢ်ဆၢ(ဘံၣ်ကၠံၣ်အဲၣ်)ဒီးကအိၣ်ဝဲလၢကမျၢၢ်တကပၤဒီးကဒီသဒၢဝဲကမျၢၢ်အဂ့ၢ်ပဒိၣ်အီၣ်မီၤအ့စံးအါထီၣ်ဝဲဒၣ်န့ၣ်လီၤ.
တၢ်မၤလၢၢ်အတၢ်ဖံးတၢ်မၤအံၤ,အပူၤကွံၥ်လၢတၢ်ကတ့ထီၣ်ဝဲကီးတရံး,ဖၣ်အၣ်အ့ရှၢၣ်ကျဲမုၢ်အဂီၢ်,ကမျၢၢ်လီၢ်ကဝီၤဖိဒီးသုးခိးကီၢ်ဆၢ(ဘံၣ်ကၠံၣ်အဲၣ်)အဘၢၣ်စၢၤသးလီၤပလိၥ်ဝဲလၢတၢ်ကမၤအီၤဖဲ(၅)နံၣ်အတီၢ်ပူၤန့ၣ်လီၤ.
ဒ်ကမျၢၢ်ဒီးသုးခိးကီၢ်ဆၢ(ဘံၣ်ကၠံၣ်အဲၣ်)အဘၢၣ်စၢၤအတၢ်သးလီၤပလိၥ်အသးအသိး(၅)နံၣ်ပှဲၤထီၣ်အလီၢ်ခံတၢ်ဆဲးမၤဝဲလၢၢ်အံၤတပယူၥ်ဃီအိၣ်ဝဲလၢ(၇)နံၣ်လံအဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
တကတီၢ်ဃီ,တၢ်ဆဲးမၤဝဲလၢၢ်အတၢ်ဖံးတၢ်မၤအံၤအဖီခိၣ်,ခီဖျိ(ဘံၤကၠံၣ်အဲၣ်)သုးရ့ၣ်(၁၀၁၅)သုးခိၣ်ဝ့နဲၣ်စ့ၣ်အပှၤဘိၤစိနဲၣ်ဒီးတၢ်ချၢပှၤလၢအဟဲမၤတၢ်တဖၣ်နုၥ်လီၤမၤသဘံၣ်သဘုၣ်တၢ်လၢကမျၢၢ်လီၢ်ကဝီၤဖိအိၣ်ဆိးတၢ်လီၢ်ဒီးတၢ်ဘံၣ်တၢ်ဘၢတအိၣ်ဝဲလၢလီၢ်ကဝီၤဖိအဂီၢ်ဘၣ်အဃိ,ကမျၢၢ်လီၢ်ကဝီၤဖိတဖၣ်တူၢ်တန့ၢ်ခီၣ်တကဲဘၣ်ဒီးဃ့ထီၣ်ဝဲလၢတၢ်ကပတုၥ်ကွံၥ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,ခီဖျိတၢ်ထုးထီၣ်ဝဲလၢၢ်ဒီးတၢ်မၤဝဲတၢ်ဆါတၢ်ပှ့ၤဆူဖီၣ်စုကဝဲၤကရူၢ်ကရၢတနီၤအစုပူၤအအိၣ်,အိၣ်ဝဲအဃိကဲထီၣ်က့ၤခိၣ်ဃၢၤန့ဆၢၣ်တၢ်လီၤဘၣ်ယိၣ်ဒီးန့ဆၢၣ်တၢ်ဘၣ်ဒိဘၣ်ထံးတၢ်ဂ့ၢ်ပိၥ်ထွဲထီၣ်အသးလၢခံတဖၣ်အါမးအဂ့ၢ်,ကညီကလုၥ်ဒူၣ်အကျါတၢ်ပဲၥ်ထံနီၤဖးဒိၣ်ထီၣ်ဝဲန့ၣ်လီၤ.
