လါအီးကထိဘၢၣ် ၂၂သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်အပူၤ,တနံၤအံၤလါအီးကထိဘၢၣ်(၂၂)သီအနံၤဂီၤခီအနၣ်ရံၣ်(၁၀)အဆၢကတီၢ်တၢ်ခးလီၤဒိးဝဲ(KNLA)လီၢ်ခၢၣ်သးဝဲၤလီၢ်ခိၣ်သ့ၣ်အခိၣ်ဃၢၤတၢ်လီၢ်တၢ်ကျဲတဖၣ်ဒီးဒြိအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
ဒြိလၢတၢ်ခးလီၤဝဲလၢ(KNLA)လီၢ်ခၢၣ်သးသုးဝဲၤလီၢ်ခိၣ်သ့ၣ်အခိၣ်ဃၢၤတၢ်လီၤတဖၣ်အံၤ,မ့ၢ်ဝဲ(SuicideDrone)ဒြိအကလုၥ်တမံၤဒီးတၢ်ခးလီၤဝဲခဲလၢၥ်အိၣ်ဝဲ(၄)ဖျၢၣ်အဂ့ၢ်,သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ,ခီဖျိတၢ်ခးလီၤဒြိမ့ၣ်ပိၢ်ဒ်အံၤအဃိကမျၢၢ်အတၢ်ဘၣ်ဒိဘၣ်ထံးအိၣ်ဝဲစှၤဂၤဒီးဟီၣ်ကဝီၤအပူၤကမျၢၢ်လီၢ်ကဝီၤဖိလၢအအိၣ်ဘူးတဖၣ်ပျံၤတၢ်ဖုးအဃိ,ဃ့ၢ်ထီၣ်အိၣ်ကဒုကွံၥ်ဝဲအသးလၢကီၢ်ကၠီၣ်တဲၣ်ထံကျိအဝၢ်တပၤအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးစ့ၢ်ကီးဝဲဒၣ်န့ၣ်လီၤ.
တကတီၢ်ဃီ,ဘၣ်ဃးဒီးတၢ်ခးလီၤဝဲဒြိအံၤမ့ၢ်သုးကီၣ်ကးကရူၢ်ကရၢဖဲလဲၣ်တဖုမၤဝဲအဂ့ၢ်န့ၣ်,ခ့ၣ်အဲးစံၣ်ပှၤထၢတၢ်ကစီၣ်ဖိတဖၣ်ဆဲးကျိးသံကွၢ်ဝဲပှၤဘၣ်မူဘၣ်ဒါသ့ၣ်တဖၣ်အဖၢမုၢ်ဒံးလီၤအဂ့ၢ်ဒုးသ့ၣ်ညါဘၣ်ပှၤဖးတၢ်ကစီၣ်ဖိတဖၣ်န့ၣ်လီၤ.
သုးကီၣ်ကးဟံးန့ၢ်ဆူၣ်တၢ်စိကမီၤ(၄)နံၣ်ဃၣ်ဃၣ်အပူၤ,ခ့ၣ်အဲၣ်ယူၣ်တၢ်ပၢဟီၣ်ကဝီၤသုးက့အဂၤတဖၣ်အပူၤကိးဘ့ၣ်ဒဲးဃၣ်ဃၣ်,တၢ်ဒုးတၢ်ယၤဆူၣ်ဝဲအိၣ်ဘၣ်ဆၣ်,သုးက့(၇)ဟီၣ်ကဝီၤအပူၤအံၤတၢ်ဒုးတၢ်ယၤတအိၣ်ဝဲဘၣ်န့ၣ်လီၤ.ဒီးဒ်န့ၣ်အသိး,တၢ်ခးလီၤဝဲဒြိမ့ၣ်ပိၢ်အံၤမ့ၢ်ဝဲတၢ်အဆိကတၢၢ်လၢကဲထီၣ်သးလၢသုးက့(၇)ဖၣ်အၣ်ကီၢ်ရ့ၣ်ပူၤအဂ့ၢ်သ့ၣ်ညါဘၣ်န့ၣ်လီၤ.
