လါအီးကထိဘၢၣ် ၃၀ သီ, ၂၀၂၄နံၣ်, ခ့ၣ်အဲးစံၣ်
သုးခိးကီၢ်ဆၢ(BGF) အခိၣ်(၃)ဂၤလၢအပၣ်ဃုၥ်လၢ အီၣ်လဲ(Online) တၢ်ကူၣ်တရံးလံၣ်အီၣ်ကျိၣ်စ့ဒီး ခီပနံၣ်တဖျၢၣ်သ့ၣ်တဖၣ် ဖၢနုၥ်ဝဲဒၣ်လၢအတၢ်ဖီၣ်ဃံးစရီပူၤအဂ့ၢ် ယူရပၤကီၣ်ကး(EU) (European Council)ထုးထီၣ်ဘိးဘၣ်ရၤလီၤဝဲဖဲလါအီးကထိဘၢၣ် (၂၉)သီအနံၤအဂ့ၢ်သ့ၣ်ညါဘၣ်န့ၣ်လီၤ.
(BGF) အခိၣ်(၃)ဂၤလၢ ယူရပၤကီၣ်ကး (EU)ဖီၣ်ဃံးဝဲသ့ၣ်တဖၣ်န့ၣ်မ့ၢ်ဝဲ ကညီသုးမုၢ်ဒိၣ်(KNA)အခိၣ်သုးခိၣ်ဒိၣ်စိစီၤခၠံၣ်သူၣ်,(KNA) အနဲၣ်ရွဲၣ်သဃဲၤ(၂) ဘိၤမီၣ်သိၤ,ဒီး သုးခိၣ်တ့ၤဝ့သ့ၣ်တဖၣ်ဃုၥ်ဒီးခီပနံၣ်လၢသုးခိၣ်ခၠံၣ်သူၣ်ပၢ ခၠံၣ်လ့မၠဲၣ် ခီပနံၣ်သ့ၣ်တဖၣ် ယူရပၤကီၣ်ကးစံးဝဲဒၣ်န့ၣ်လီၤ.
(BGF) ခိၣ်နၢ်လၢ ယူရပၤကီၣ်ကးဖီၣ်ဃံးအဝဲသ့ၣ်တဖၣ်အံၤန့ၣ် မၤဝဲ(Oneline) ပူၤတၢ်ကူၣ်တရံးလံၣ်အီၣ်ကျိၣ်စ့ ဖဲကညီကီၢ်စဲၣ်, ကီၢ်ပယီၤ-ကီၢ်ကၠီၣ်တဲၣ်ကီၢ်ဆၢ ရၤမတံဝ့ၢ်ကပိၥ်ကပၤတၢ်လီၢ်ဒ်အမ့ၢ် စွ့ၣ်ကိၣ်ကိၤ, KK Park သ့ၣ်တဖၣ်ဒီးအိၣ်ဃုၥ်ဒီး တၢ်မူၤတၢ်ဘှီး,တၢ်မၤကၤပှၤကညီ, တၢ်မၤထီဒါပှၤဂ့ၢ်ဝီခွဲးယၥ်ဒ်အမ့ၢ် တၢ်မၢဆူၣ်ပှၤမၤတၢ်ဖိဒီးတၢ်မၤဆါမၤပယွဲသ့ၣ်တဖၣ်အိၣ်ဝဲဒၣ်ဒီးမ့မ့ၢ် ခၠံၣ်လ့မၠဲၣ်ခီပနံၣ်ခီန့ၣ်မၤသကိးတၢ်ဒီးပယီၤသုးဘူးဘူးတံၢ်တံၢ်အဂ့ၢ်ပၥ်ဖျါဝဲဒၣ်စ့ၢ်ကီးန့ၣ်လီၤ.
ဘၣ်ဃးဒီး ယူရပၤကီၣ်ကးအတၢ်ဖီၣ်ဃံးတၢ်ဝဲအံၤန့ၣ် ဖၢနုၥ်လၢခိၣ်နူၥ်ပူၤတဘၣ်ဘၣ်အဂ့ၢ် (BGF)သုးဟီၣ်ကဝီၤနီၣ်ဂံၢ်(၂)အဒုးယၤခိၣ် သုးခိၣ်ဒိၣ်စိစီၤတ့ၤဝ့စံးဝဲဒ်အံၤန့ၣ်လီၤ.
အဝဲစံးဝဲလၢ“တၢ်သ့ၣ်တဖၣ်အံၤနဖၢနုၥ်လၢခိၣ်နူၥ်ပူၤတဘၣ် ဘၣ်. အိၣ်ဒၣ်မၤဟးကညီတၢ်ကရၢကရိလီၤ.ထံဒိၣ်ကီၢ်လဲၢ်သ့ၣ်တဖၣ်န့ၣ် (Online) အိၣ်ဒီဒူၣ်ဒီဂီၢ်နမၤ မးတလၢၤဘၣ်.အဟံးပှၤအရ့ကသ့ဧါ.ပအိၣ်လၢပကစၢ်ကီၢ်, တမ့ၢ်ပလဲၤမၤလၢအကီၢ်ပူၤဘၣ်.မ့ဘၣ်ဃးလၢတၢ် ဆါအီၣ်ပှၤကညီန့ၣ် ပမ့ၢ်သ့ၣ်ညါန့ၣ်ပလူၤဖီၣ်အီၤထီဘိလီၤ.ပမ့ၢ်တသ့ၣ်ညါထွဲဘၣ်ခီန့ၣ်မၤတဘၣ် ဘၣ်.ပှၤလၢဆါတၢ်မ့ၢ်ဂ့ၤ, ပှၤလၢပှ့ၤတၢ်မ့ၢ်ဂ့ၤပဖီၣ်ခဲလၢၥ်ဒီးပဟံးန့ၢ်အရ့တုၤလီၤတီၤလီၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ပှၤလၢဘၣ်တၢ်ဖီၣ်ဃံးအီၤသ့ၣ်တဖၣ်အံၤန့ၣ် တၢ်ပ့းဃၥ်အဝဲသ့ၣ်လၢကနုၥ်လီၤဝဲဒၣ်ဆူ ထံကီၢ်လၢအကဲ ယူရပၤကရူၢ်ဖိသ့ၣ်တဖၣ်အပူၤအဂ့ၢ်သ့ၣ်ညါဘၣ်န့ၣ်လီၤ.
တကီၢ်ခါခဲအံၤန့ၣ်ကီၢ်ပယီၤပူၤ ယူရပၤကီၣ်ကး(EU) ဖီၣ်ဃံးဝဲ ပှၤနီၢ်တဂၤန့ၣ်အိၣ်ဝဲ (၁၀၆)ဒီး မ့မ့ၢ်လၢခီပနံၣ်ခီန့ၣ်အိၣ်ဝဲ(၂၂)ဖျၢၣ်အဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
