လါအီးကထိဘၢၣ် ၁၇ သီ, ၂၀၂၄ နံၣ်, ခ့ၣ်အဲးစံၣ်
တနံၣ်အံၤ ၂၀၁၄ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအဂီၢ် တၢ်ဆှၢထီၣ်မံၤသ့၀ဲလံအဂ့ၢ်န့ၣ် ဖါဖီၣ်ဒ့ရှၢၣ်(Phan Foundation)ထုးထီၣ်ပၥ်ဖျါ၀ဲဖဲမဟါလါအီးကထိဘၢၣ် ၁၆ သီအနံၤန့ၣ်လီၤ.
ပှၤလၢအဆှၢထီၣ်အမံၤလၢပဒိၣ်မါရှၤသးစၢ်ခိၣ်နၢ်ဖိခိၣ်ဖးအံၤအဂီၢ်တဖၣ် ကဘၣ်မ့ၢ်ပှၤအိၣ်(၃၅)နံၣ်ဆူဖီလၥ်,တဘၣ်မ့ၢ်ပှၤလၢ အကွၢ်လီၤနီၢ်ကစၢ်တၢ်ဘၣ်ဘျုးဘၣ်ကဘၣ်ဖျိးစိဒီးကဘၣ်ဟူးဂဲၤဖံးမၤတၢ်လၢပှၤကလုၥ်ပှၤ၀ၢတၢ်ဖံးတၢ်မၤပူၤအဂ့ၢ်န့ၣ် ပဒိၣ်မါရှၤလါဖါ အဖိမုၣ် သရၣ်မုၣ်နၣ်စိၤယၤဖါ စံး၀ဲဒ်အံၤန့ၣ်လီၤ.
“Phan Foundation အံၤဒ်ပမ့ၢ်ပဒိၣ်မါရှၤအဖိမုၣ်ဖိခွါန့ၣ်တနံၣ်တဘျီပဟ့ၣ်မၤလၤကပီၤဒီးပပၥ်ပနီၣ်၀ဲဒၣ်ပှၤကညီသးစၢ် ခိၣ်နၢ်လၢအဖျိးစိအဟ့ၣ်လီၤသးလၢပှၤကလုၥ်အတၢ်ဖံးတၢ်မၤလၢတၢ်ကူၣ်ဘၣ်ကူၣ်တကပၤမ့ၢ်ဂ့ၤ,လၢတၢ်ဆီၣ်ထွဲမၤစၢၤမ့ၢ်ဂ့ၤ, တၢ်ပၢၤဃၥ်က့ၤပပှၤကလုၥ်ထူသနူတၢ်ဆဲးတၢ်လၤ,ဒီးလၢပှၤဟီၣ်ခိၣ်ဖိခွဲးယၥ်တကပၤမ့ၢ်ဂ့ၤမီၤနီၤ.ခဲအံၤပဟ့ၣ်ခိၣ်ဖးအံၤပှဲၤထီၣ်၀ဲ (၁၅)နံၣ်လံ.အဃိပဆၢမုၢ်လၢ်လၢပှၤတ၀ၢခိၣ်နၢ်တဖၣ်သုမ့ထံၣ်ပှၤမၤသကိးတၢ်ဖိလီၤဆီဒၣ်တၢ်ခိၣ်နၢ်သးစၢ်လၢအဖျိးစိဒီးအကြၢးဒိးန့ၢ်ဘၣ်ခိၣ်ဖးအံၤဒ်တၢ်ပၥ်ပနီၣ်အသိးန့ၣ်၀ံသးစူၤဟ့ၣ်ထီၣ်အမံၤဒီးတၢ်ဂ့ၢ်တၢ်ကျိၤတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
လၢခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤသးစၢ်ခိၣ်နၢ်ဖိခိၣ်ဖးအံၤအဂီၢ် ကညီသးစၢ်လၢအိၣ်တၢ်လီၢ်တတီၤဂ့ၤတတီၤဂ့ၤ လၢနီၢ်ကစၢ်တဂၤ(မ့တမ့ၢ်) လၢတၢ်ကရၢကရိအံၤတဆီဆှၢထီၣ်မံၤသ့၀ဲအဂ့ၢ်န့ၣ် (Phan Foundation)လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
လၢန့ၣ်အမဲၥ်ညါသးစၢ်ခိၣ်နၢ်ဖိခိၣ်ဖးအံၤအဂီၢ်န့ၣ်အဲၣ်ဒိးဆီၣ်ထွဲမၤစၢၤကညီသးစၢ်ခိၣ်နၢ်အါဒံအါဂၤဘၣ်ဆၣ် ခီဖျိလၢဂံၢ်ဘါတအိၣ်အါအါဘၣ်အဃိခိၣ်ဖးအံၤဘၣ်တၢ်ဃုထၢဟ့ၣ်လီၤအီၤတနံၣ်မးတဂၤလီၤအဂ့ၢ်န့ၣ် သရၣ်မုၣ်နၣ်စိၤယၤဖါ စံးအါ ထီၣ်၀ဲန့ၣ်လီၤ.
“ပ၀ဲဖိလံၤတဖၣ်ပထံၣ်ဒီးပပလၢၢ်ဘၣ်လၢပပါပဒိၣ်မါရှၤန့ၣ်အတၢ်တူၢ်ခီၣ်ပၥ်သးလၢအပှၤကလုၥ်အဂီၢ်ဒီးအတၢ်အဲၣ်အပှၤကလုၥ်န့ၣ်အသဟီၣ်ဆူၣ်မးလီၤ.စးထီၣ်လၢအမၤလိတၢ်တုၤလၢအကဲထီၣ်ခိၣ်နၢ်န့ၣ်အဟ့ၣ်လီၤသးလၢအပှၤကလုၥ်တၢ်ဂဲၤလိၥ်အဂီၢ်လၢၥ်လၢၥ်စ့စ့လီၤ.ဟ့ၣ်လီၤသးတုၤလၢအတၢ်သါလၢခံကတၢၢ်တစုလီၤ.အဃိပ၀ဲဖိလံၤတဖၣ်ပအဲၣ်ဒိးစိၥ်မူစိၥ်ဂဲၤက့ၤပပါပဒိၣ်မါရှၤအတၢ်အဲၣ်ဘၣ်အပှၤကလုၥ်အသးသဟီၣ်၀ဲအံၤခီဖျိလၢတၢ်မၤစၢၤဆီၣ်ထွဲကညီခိၣ်နၢ်သးစၢ်ဒီးစိၤလၢကဟဲတဖၣ်မီၤနီၤ.ပသးအိၣ်ဆီၣ်ထွဲမၤစၢၤခိၣ်နၢ်သးစၢ်အါဒံအါဂၤလီၤဘၣ်ဆၣ်ပတၢ်ကရၢကရိန့ၣ်ဆံးဆံးဖိဒီးပဂံၢ်ပဘါတအိၣ်ထဲန့ၣ်ဘၣ်အဃိပဟ့ၣ်တၢ်လၤကပီၤ၀ဲအံၤတနံၣ်မးတဂၤလီၤ”အဂ့ၢ်န့ၣ် စံး၀ဲန့ၣ်လီၤ.
(၂၀၂၄)သးစၢ်ခိၣ်နၢ်ဖိခိၣ်ဖးအဂီၢ် တၢ်ကတူၢ်လိၥ်အီၤဆဲးခံကတၢၢ်ဖဲတနံၣ်အံၤလါဒံၣ်စ့ဘၢၣ် ၃၁ သီဒီး ဒ်န့ၣ်အသိးပှၤလၢ အဆှၢ ထီၣ်အမံၤတဖၣ် ကဘၣ်ကွဲးလီၤတၢ်ဂ့ၢ်တၢ်ကျိၤတဖၣ်လၢကညီကျိၥ်,ကီၤလၤ၀ါကျိၥ်,ပယီၤကျိၥ်ဒီး ဆှၢထီၣ်အီၤသ့၀ဲဆူ (bwabwa.phan@phanfoundation.org) သရၣ်မုၣ်နၣ်ဘွါဘွါဖါ အအိၣ်ဒီး ခိၣ်ဖးအံၤတၢ်ကက့ၤဘိးဘၣ်ရၤလီၤအီၤဖဲ ၂၀၂၅ ထီၣ် အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
တကတီၢ်ဃီသးစၢ်ခိၣ်နၢ်လၢတၢ်ဃုထၢထီၣ်အီၤအံၤတၢ်ကဟ့ၣ်လၤကပီၤအီၤဃုၥ်ဒီးအမဲရကၤစ့(၄၀၀၀)ဒီလၣ်ဒီး ဒ်န့ၣ်အသိးခိၣ်ဖးအံၤစးထီၣ်လၢ(၂၀၀၉)တုၤလၢ(၂၀၂၃)န့ၣ်တၢ်ဟ့ၣ်၀ဲအိၣ်(၁၅)ဘျီလံအသိး သးစၢ်လၢအဒိးန့ၢ်ဘၣ်ခိၣ်ဖးစ့ၢ်ကီး အိၣ်၀ဲ(၁၆)ဂၤလံ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါအံၤ ဖဲအပူၤကွံၥ်(၂၀၀၈)လါဖ့ၤဘြူၤအါရံၤ ၁၄ သီအနံၤန့ၣ် ဖီၣ်စုက၀ဲၤ လၢတၢ်တသ့ၣ်ညါ၀ဲတဖၣ်ဟဲခးသံအီၤလၢအဟံၣ်ကီၢ်ကၠီၣ်တဲၣ် မဲၢ်ဆီး၀့ၢ်အပူၤဒီး လၢတၢ်န့ၣ်အဃိဖိမုၣ်ဖိခွါလၢအအိၣ်လီၤတဲၥ် တဖၣ် လၢတၢ်သ့ၣ်နီၣ်ထီၣ်က့ၤအပါပဒိၣ်မါရှၤဒီးအမိနၣ်ကၠ့ၤစွ့ၤခံဂၤအံၤအဂီၢ် ဒုးအိၣ်ထီၣ်၀ဲဖါဖီၣ်ဒ့ရှၢၣ်အံၤဖဲ(၂၀၀၈)အခါန့ၣ်လီၤ.
