လါအီးကထိဘၢၣ် ၁၄ သီ, ၂၀၂၄ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ ဖဲလါအီးကထိဘၢၣ် ၁၂ သီအနံၤ (DKBA)လၢအိၣ်၀ၣ်တရဲၢ်ကၠိမဲၥ်ညါတဖၣ်အံၤ KNLA သုးရ့ၣ်(၁)လဲၤခး၀ဲဒီးဒြိအဃိ (DKBA)တကပၤဘၣ်ဒိ(၄)ဂၤအကျါပၣ်ဃုၥ်သုးခိၣ်တဂၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲန့ၣ်လီၤ.
ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)လၢအအိၣ်ဆီလီၤသးဖဲ၀ၣ်တရဲၢ်ကၠိမဲၥ်ညါအံၤ ဖဲလါအီးကထိဘၢၣ် ၁၂ သီ ဂီၤခီ ၁၀း၂၀ ဃၣ်ဃၣ်အဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁)အပှၤလဲၤခး၀ဲဒီးဒြိအဃိ (DKBA)တကပၤဘၣ်ဒိ၀ဲဒၣ်(၄)ဂၤအကျါပၣ်ဃုၥ်၀ဲသုးခိၣ်ပှၤတီခိၣ်ရိၣ်မဲတၢ်တဂၤဒီး၀ဲၤဒၢးတၢ်သူၣ်ထီၣ်စ့ၢ်ကီးဟးဂီၤ၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးအံၤန့ၣ်လီၢ်က၀ီၤကမျၢၢ်လၢတအဲၣ်ဒိးပၥ်ဖျါအမံၤတဂၤစံး၀ဲလၢ“ပှၤလဲၤခးလီၤန့ၣ်ဒြိခံဖျၢၣ်.ဘၣ်၀ဲဒၣ်လံၥ်ရိဒၢး(စာကြည့်တိုက်)ဒီး၀ဲၤဒၢးတၢ်သူၣ်ထီၣ်ခံဖျၢၣ်န့ၣ်.ပှၤဘၣ်ဒိအကျါန့ၣ်ပၣ်ဃုၥ် ပှၤတီခိၣ်ရိၣ်မဲတၢ်သုးခိၣ်တဂၤ.အမံၤလၢ သုးခိၣ်ကွဲၤလါ.မ့မ့ၢ်အီၤန့ၣ်အတၢ်ဘၣ်ဒိနးတစဲး”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါစဲးပထ့ဘၢၣ် ၂၉ သီအနံၤစ့ၢ်ကီး KNLA သုးရ့ၣ်(၁)အပှၤလဲၤခးဒံး၀ဲ(DKBA)သုးခိၣ်ဘိၤဘံၣ်တၢ်လီၢ်အံၤ ဖဲန့ၣ်အခါစ့ၢ်ကီး(DKBA)တကပၤဘၣ်ဒိ(၃)ဂၤတကးဒံးဘၣ်မုၢ်ဆ့ၣ်ထီၣ်န့ၣ်(DKBA)ခးလီၤကဒါကျိဖးဒိၣ်ဆူ၀ၣ်တရဲၢ်သ၀ီအခိၣ် အဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်လဲၤခး(DKBA)ဘိၤဘံၣ်တၢ်လီၢ်အဆိကတၢၢ်တဘျီ၀ံၤလီၢ်ခံတၢ်ဒ့ၣ်စၢၤအိၣ်ထဲခံနွံဃၣ်ဃၣ်တၢ်လဲၤခးကဒီးကဲထီၣ်ဒ်အံၤအဃိ တကီၢ်ခါခဲအံၤ၀ၣ်တရဲၢ်ကမျၢၢ်တဖၣ်မုၢ်နၤခီန့ၣ်ဘၣ်မံ၀ဲဒၣ်လၢတၢ်ပျံတၢ်ဖုးပူၤ,ဘၣ်အိၣ်လၢတၢ်ပလီၢ်ပဒီပူၤအဂ့ၢ်န့ၣ် ကမျၢၢ်လၢအဂၤတဂၤ စံး၀ဲဒ်အံၤန့ၣ်လီၤ.
“ခဲအံၤမုၢ်နၤခီန့ၣ်ပှၤပျံၤတၢ်ပှၤမံဖုးမံဖုးလီၤ.ပှၤဆိမိၣ်မ့ၢ်တၢ်ကကဲထီၣ်ကဒီးသးဆံးယံၤလဲၣ်.ပှၤကမျၢၢ်န့ၣ်ကိၢ်သးလၢကကဲထီၣ်ဒ်သိးချၢၣ်ဃဲၤသ၀ီန့ၣ်မီၤနီၤ.ပှၤကၠိဖိနါက့တနီၤနီၤန့ၣ်အမိအပါထုးထီၣ်က့ၤလၢကၠိ.တနီၤနီၤပှၤဒုးထီၣ်အီၤကၠိလၢအဂၤ,တနီၤန့ၣ်တဒုးအိၣ်၀ဲလၢၤဘၣ်စ့ၢ်ကီးအိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါစးထီၣ်ဖဲလါစဲးပထ့ဘၢၣ် ၁၉ သီ (DKBA)ဘိၤဘံၣ်အပှၤလဲၤဆ့ၣ်နီၤအိၣ်လၢကၠိမဲၥ်ညါ၀ံၤလီၢ်ခံန့ၣ် ပှၤကၠိဖိလဲၤထီၣ်ကၠိတဘူၣ်လၢၤဘၣ်အသိး ကမျၢၢ်စ့ၢ်ကီးလဲၤက့ၤအိၣ်ဆိးတၢ်ဘံၣ်တၢ်ဘၢတအိၣ်လၢအ၀ဲသ့ၣ်အဂီၢ်လၢၤဘၣ် အဂ့ၢ်န့ၣ် လီၢ်က၀ီၤကမျၢၢ် စံး၀ဲအသိးသ့ၣ်ညါဘၣ်န့ၣ်လီၤ.
တၢ်လီၢ်လၢ(DKBA)ဟဲအိၣ်ဆီလီၤသးအံၤမ့ၢ်၀ဲ KNLA သုးရ့ၣ်(၁)ဟီၣ်က၀ီၤဒီး အတၢ်ဟဲအိၣ်ဆီလီၤသးအံၤစ့ၢ်ကီး ခ့ၣ်အဲၣ်ယူၣ် လီၢ်က၀ီၤပှၤဘၣ်မူဘၣ်ဒါဃုၥ်ဒီးပှၤကမျၢၢ်တအဲၣ်ဒိး၀ဲဘၣ်အဖီခိၣ် ဖဲလါစဲးပထ့ဘၢၣ် ၂၄ သီအနံၤန့ၣ် သုးခိၣ်ဘိၤဘံၣ်ကိးအိၣ်ဖှိၣ် ပှၤကမျၢၢ်ဒီးပှၤကမျၢၢ်ဃ့ထီၣ်လၢကထုးကွံၥ်သုးတၢ်လီၢ်ဘၣ်ဆၣ်တတူၢ်လိၥ်၀ဲဘၣ်အဃိဖဲန့ၣ်လီၢ်ခံတၢ်ဖ့ၣ်စၢကဲထီၣ်၀ဲတပယူၥ်ဃီဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါဒီးကမျၢၢ်စံး၀ဲအသိးန့ၣ် ၀ၣ်တရဲၢ်ကၠိမဲၥ်ညါ(DKBA)တဖၣ်အံၤဘၣ်တၢ်တီခိၣ်ရိၣ်မဲအီၤလၢ စီၤခၠ့ၣ်သါ ဒီး အပူၤကွံၥ်သုးဂံၢ်ဘါကအိၣ်ဒၣ်ထဲ(၃၀)ဂၤဃၣ်ဃၣ်လီၤဘၣ်ဆၣ်ခီဖျိအ၀ဲသ့ၣ်န့ၣ်ပၥ်ဖှိၣ်မၤသကိးတၢ်ဒီးပယီၤသုး,(BGF)အိၣ်အဃိ ခဲအံၤပှၤနီၣ်ဂံၢ်ကအိၣ်လၢ(၁၀၀)ခိၣ်ဃၢၤလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
