KNLA သုးရ့ၣ်(၃)အပှၤ လဲၤခးနးကၠံတိၤခိၣ်ထိးပယီၤသုးကလၢၤတၢ်လီၢ်အဃိ သံတဂၤ

လါအီးကထိဘၢၣ် ၁၆ သီ, ၂၀၂၄ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်ပူၤ ခီဖျိကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)အပှၤလဲၤခး၀ဲနးကၠံသ၀ီ တိၤခိၣ်ထိးပယီၤသုးကလၢၤတၢ်လီၢ်အဃိ ပယီၤသုးတကပၤသံတဂၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ် တၢ်ကစီၣ်ဖိစံး၀ဲန့ၣ်လီၤ.

ဖဲလါအီးကထိဘၢၣ် ၁၄ သီအနံၤ ပယီၤသုးကလၢၤလၢအိၣ်ဆီလီၤသးဖဲနးကၠံသ၀ီ တိၤခိၣ်ဖးဒိၣ်ထိးအံၤတဖၣ် (KNLA) သုးရ့ၣ်(၃) အပှၤ လဲၤခး၀ဲဒီးစနဲးဖၢးကျိအဃိ ပယီၤသုးတကပၤသံ၀ဲဒၣ်တဂၤကဲထီၣ်သးဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲန့ၣ်လီၤ.

သုးဟံန့ၢ်တၢ်စိတၢ်ကမီၤ၀ံၤလီၢ်ခံ ပယီၤသုးလၢအိၣ်တိၤခိၣ်ထိးအံၤဒီးပယီၤသုးကလၢၤလၢအိၣ်နးကၠံသ၀ီပူၤ အံၤတဖၣ် ဘၣ်တၢ်လဲၤခးစဲးပြဲးအ၀ဲသ့ၣ်ဒီးဒြိလၢ(KNLA) သုးရ့ၣ်(၃)သုးပၥ်ဖှိၣ်အိၣ်၀ဲတလီၢ်လီၢ်အဂ့ၢ်န့ၣ် သုးက့(၁) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲ န့ၣ်လီၤ.

အ၀ဲစံး၀ဲလၢ“နးကၠံပယီၤသုးကလၢၤဒီးတိၤစိၥ်ခံန့ၣ်တၢ်ဒ့ၣ်စၢၤအိၣ်တယံၤဘၣ်အိၣ်ဘူးဘူးလီၤ.အ၀ဲသ့ၣ်န့ၣ်အိၣ်ခိးတိၤဖဲန့ၣ်.အအိၣ်လၢသ၀ီပူၤခံဖျၢၣ်လၢၥ်လီၤ.အ၀ဲသ့ၣ်တဖျၢၣ်န့ၣ်အိၣ်လၢသ၀ီပူၤ,အ၀ဲတခါန့ၣ်ခီအိၣ်လၢသ၀ီကဒးပူၤဒ်န့ၣ်.ဖဲဘုလိၥ်ကျိန့ၣ်ပှၤတ့ထီၣ်တိၤ၀ံၤဘျီအ၀ဲသ့ၣ်ဟဲအိၣ်ခိးတၢ်.တိၤစိၥ်ခံန့ၣ်အိၣ်၀ဲယၢ်ပၤယၢ်ပၤအိၣ်၀ဲမုၢ်နုၥ်တကပၤမုၢ်ထီၣ်တကပၤ.အအိၣ်ဖဲန့ၣ်ပၣ် ဃုၥ် (BGF)စ့ၢ်. ပှၤလဲၤခးအီၤဒီးဒြိအိၣ်မၢ်မၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဒ်န့ၣ်အသိးဘံလ့ကီၢ်ဆၣ်ပူၤ ဒူသ၀ီသးပှၢ်လၢအမၤသုးကီၣ်ကးတၢ်ဖံးတၢ်မၤသ့ၣ်တဖၣ် ဘၣ်တၢ်ခးသံအီၤကဲထီၣ်အိၣ်၀ဲတလီၢ်လီၢ် ဒီးလၢန့ၣ်အမဲၥ်ညါအပူၤကွံၥ်လါမ့ၤအခါစ့ၢ်ကီးတၢ်မၤပိၢ်ဖးထီၣ်ဒံး၀ဲတပျဲကျိတိၤဒီးတီၤကလ့တိၤလၢသုးကီၣ်ကးသူ၀ဲလၢသုးတၢ်ဟူးတၢ်ဂဲၤအံၤကဲထီၣ်သးဒံးအဂ့ၢ်န့ သ့ၣ်ညါဘၣ်န့ၣ်လီၤ.

တကီၢ်ခါခဲအံၤဒူသထူၣ်ကီၢ်ရ့ၣ် လီၤဆီဒၣ်ဘံလ့,ကၠဲးထိၣ်,သထူၣ်ကီၢ်ဆၣ်အပူၤ တၢ်ဒုးကဲထီၣ်၀ဲလၢ ဟီၣ်က၀ီၤတၢ်ပၢၢ်ဆၢ သုးပၥ်ဖှိၣ်ကရူၢ်ဒီးပယီၤသုးအဘၢၣ်စၢၤအိၣ်၀ဲခဲအံၤခဲအံၤဒီးဒုၣ်ဒါတကပၤစ့ၢ်ကီးသံဘၣ်ဒိဘၣ်ထံးအိၣ်၀ဲအါမးအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ.