လါနိၣ်၀့ဘၢၣ် ၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤအပူၤ လါအီးကထိဘၢၣ်တလါအတီၢ်ပူၤ တၢ်ဒုးကဲထီၣ်၀ဲ(၁၉)ဘျီဒီး ပယီၤသုးတကပၤသံဘၣ်ဒိဘၣ်ထံး၀ဲ(၄၇)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ် န့ၣ်လီၤ.
ဒူသထူၣ်ကီၢ်ရ့ၣ် ကၠဲးထိၣ်,ဘံလ့,သထူၣ်ဒီးဖၣ်အၣ်ကီၢ်ဆၣ်အပူၤ စးထီၣ်လါအီးကထိဘၢၣ် ၁ သီတုၤ ၃၁ သီ လၢတလါအတီၢ်ပူၤ န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤ တၢ်ခးလိၥ်သးကဲထီၣ်ခဲလၢၥ်အိၣ်၀ဲ (၁၉)ဘျီဒီး ဒုၣ်ဒါတကပၤသံ(၂၆)ဂၤ,ဘၣ်ဒိ(၂၁)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤ ပၥ်ဖျါ၀ဲန့ၣ်လီၤ.
ဒ်တၢ်မၤနီၣ်စရီပူၤအိၣ်၀ဲအသိးန့ၣ် ကီၢ်ဆၣ်(၄)ဘ့ၣ်အံၤအပူၤ ဟီၣ်က၀ီၤ(KNLA)သုးပၥ်ဖှိၣ်လဲၤခးစဲးပြဲး၀ဲဒုၣ်ဒါ(၅)ဘျီ, လဲၤတ့ၢ်လီၤ၀ဲဒီးဒြိ(၅)ဘျီ, ခိးထုးမ့ၣ်ပိၢ်(၆)ဘျီ,လဲၤကွံၥ်၀ဲဒီးစုကွံၥ်မ့ၣ်ပိၢ်(၂)ဘျီ,လဲၤခး၀ဲဒီးစနဲးဖၢး(၁)ဘျီ ခဲလၢၥ်ပၥ်ဖှိၣ်(၁၉) ဘျီ အဃိ ဒုၣ်ဒါသံဘၣ်ဒိဘၣ်ထံးအမဲၥ်ညါသုးကီၣ်ကးအသိလ့ၣ်ဟးဂီၤ(၅)ခိၣ်,တၢ်သူၣ်ထီၣ်ဟးဂီၤတဖျၢၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
လၢန့ၣ်အမဲၥ်ညါတလါအတီၢ်ပူၤတၢ်ဒုးကဲထီၣ်အိၣ်ဂ့ၤတအိၣ်ဂ့ၤ ပယီၤသုးအံၤခးလီၤ၀ဲကျိဖးဒိၣ်လၢလီၢ်က၀ီၤကမျၢၢ်ဒူသ၀ီ အိၣ်ဆိးလီၢ်ကျဲခဲလၢၥ်အိၣ်၀ဲ(၁၃)ဘျီအဃိ ကမျၢၢ်ဘၣ်ဒိ(၇)ဂၤ,ကမျၢၢ်သိလ့ၣ်ဟးဂီၤ(၂)ခိၣ်အမဲၥ်ညါ ကျီးပူၤတၢ်မုၢ်တၢ်ဘိ သ့ၣ်တဖၣ်ဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီပယီၤသုးကလၢၤလၢအခးလီၤကျိဖးဒိၣ်ဆူလီၢ်က၀ီၤဒူသ၀ီပူၤသ့ၣ်တဖၣ်န့ၣ်မ့ၢ်၀ဲ ခီၣ်ချ့သုးရ့ၣ် (ခမရ-၂၀၇), ခီၣ်သုးရ့ၣ်(ခလရ-၈), (၃၁၀)အမျိၥ်သုး, ခီၣ်ချ့သုးရ့ၣ်(ခမရ-၄၀၅), ခီၣ်ချ့သုးရ့ၣ်(ခမရ-၉), အမျိၥ်သုး(၃၁၄)သုးရ့ၣ်သ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိး ဒူသထူၣ်ကီၢ်ရ့ၣ်ပူၤ အပူၤကွံၥ်လါစဲးပထ့ဘၢၣ်တလါအတီၢ်ပူၤစ့ၢ်ကီး လီၤဆီဒၣ်တၢ် ကၠဲးထိၣ်,ဘံလ့ဒီး သထူၣ်ကီၢ်ဆၣ် ကီၢ်ဆၣ်(၃)ဘ့ၣ်အံၤအပူၤန့ၣ် တၢ်ဒုးကဲထီၣ်ခဲလၢၥ်(၂၀)ဘျီဒီး ပယီၤသုးတကပၤသံ(၃၃)ဂၤ, ဘၣ်ဒိ(၄၆)ဂၤ အဂ့ၢ်န့ၣ် သ့ၣ်ညါဘၣ်ဒ်ကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ.
သုးဟံန့ၢ်တၢ်စိတၢ်ကမီၤ၀ံၤလီၢ်ခံ ဒူသထူၣ်ကီၢ်ရ့ၣ်ဟီၣ်က၀ီၤပူၤ ခံခီခံကပၤအဘၢၣ်စၢၤဒုးယၤတၢ်သဘံၣ် သဘုၣ်ကဲထီၣ်၀ဲခဲအံၤ ခဲအံၤဒီး ခီဖျိပယီၤသုးအံၤသူ၀ဲကဘီယူၤ,ကျိဖးဒိၣ်ခးလီၤနါစိၤတၢ်လၢကမျၢၢ်အိၣ်ဆိးလီၢ်ကျဲတလီၢ်လီၢ်အဃိ ကမျၢၢ်သံဘၣ်ဒိ ဘၣ်ထံးကဲထီၣ်စ့ၢ်ကီး၀ဲခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
