လါဒံၣ်စ့ဘၢၣ် ၁၉ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ ဖဲတနံၤအံၤဂီၤခီအဆၢကတီၢ် ပယီၤသုးလၢအိၣ်ခိးသမံသမိးတၢ်လၢကျဲပူၤတဖၣ် (KNLA)သုးပၥ်ဖှိၣ်ခိးထုး၀ဲဒီးမ့ၣ်ပိၢ်အဃိ ဘၣ်ဒိ(၃)ဂၤအဂ့ၢ်န့ၣ် ဂံၢ်ခီၣ်ထံး ပှၤဟ့ၣ်တၢ်ကစီၣ်ဖိ စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
ဖဲတနံၤအံၤလါဒံၣ်စ့ဘၢၣ် ၁၉ သီ ဂီၤခီ ၇း၃၀ အဆၢကတီၢ် သုးကီၣ်ကးသုးတြိၤ(၄၄)စုတီၤဖီလၥ် ပယီၤသုးလၢအိၣ်ခိးသမံသမိး တၢ်ဖဲ လ့တဲၤ(လေးတိုင်)ဒီးညီၤ၀ဲ(ညောင်ဝိုင်း) ဘၢၣ်စၢၤ စါယ့မၠဲၤ(စမ်းရေးမြိုင်)ကျဲခိၣ်ထိးအံၤ တဖၣ် လီၢ်က၀ီၤကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂)သုးပၥ်ဖှိၣ် ခိးထုး၀ဲဒီးမ့ၣ်ပိၢ်အဃိ ပယီၤသုးတကပၤဘၣ်ဒိဘၣ်ထံးကဲထီၣ်သး ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ပယီၤသုးလၢတၢ်လဲၤခးအီၤဖဲမဂီၤသ့ၣ်တဖၣ်အံၤ ဟးအိၣ်ခိးသမံသမိးသိလ့ၣ်လၢကျဲပူၤ,ဃ့အီၣ်စ့လၢပှၤကမျၢၢ်အအိၣ် အိၣ်၀ဲတလီၢ်လီၢ်ဒီးဒ်န့ၣ်အသိးဖဲတၢ်လဲၤခးအ၀ဲသ့ၣ်အခါအနီၣ်ဂံၢ်ကအိၣ်အဂၤ(၁၀)ခိၣ်ဃၢၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ တဂၤ စံးဘၣ်ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤ.
အ၀ဲစံး၀ဲလၢ“တၢ်ဂ့ၢ်ကဲထီၣ်သးဖဲမဂီၤတခါန့ၣ်ဒ်အံၤ ပယီၤသုးတဖၣ်န့ၣ်အကဲ၀ဲဒၣ်သုးတြိၤ(၄၄)အပှၤလီၤ.အ၀ဲသ့ၣ်ဟးအိၣ်ခိး သမံသမိးတၢ်မၢ်မၢ်လီၤ.အ၀ဲသ့ၣ်ဟးသမံသမိးတၢ်န့ၣ်တမ့ၢ်အလီၢ်လၢအအိၣ်ဂၢၢ်၀ဲဘၣ်.အ၀ဲသ့ၣ်န့ၣ်အိၣ်ခိးသမံသမိးသိလ့ၣ်,ခိးထၢ၀ဲဒၣ်ကျိၣ်စ့ဒ်န့ၣ်.ဖဲမဂီၤပှၤလဲၤမၤအီၤန့ၣ်အ၀ဲသ့ၣ်ကအိၣ်အဂၤ(၁၀)ခိၣ်ဃၢၤလီၤ.တမ့ၢ်လၢအအိၣ်ခိး၀ဲမၢ်မၢ်စ့ၢ်ဘၣ်,ဟးခိး၀ဲလၢအံၤတတီၤလၢန့ၣ်တတီၤ,ဟဲပူၤဘျီပူၤဘျီဒ်န့ၣ်မီၤ”အဂ့ၢ်န့ၣ် စံး၀ဲန့ၣ်လီၤ.
တကတီၢ်ဃီဒ်န့ၣ်အသိး ဖဲမဟါလါဒံၣ်စ့ဘၢၣ် ၁၈ သီအနံၤစ့ၢ်ကီး တၢ်ဒုးကဲထီၣ်တအိၣ် ပယီၤသုးခးလီၤ (၁၂၀ မမ)ကျိဖးဒိၣ် ခံဘျီလီၤတဲၥ်ပိၢ်ဖးထီၣ်၀ဲလၢကျူမဲသ၀ီဃၢၤ ကျီးပူၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
“မဟါဟါခီ ၇း၃၇ မံးနံးန့ၣ် ခမရ-၂၀၆ ခးလီၤကျိဖးဒိၣ်လၢကျူမဲသ၀ီဃၢၤတထံၣ်. မ့၀ံၤဖဲဟါခီ ၉ နၣ်ရံၣ်အဆၢကတီၢ်န့ၣ် (၄၀၂)အမျိၥ်သုးခးလီၤကျိဖးဒိၣ်လၢကျူမဲ ကီၣ်ကျီးပူၤန့ၣ်တထံၣ်.တၢ်ဒုးကဲထီၣ်တအိၣ်ဘၣ်.ခဲအံၤပှၤအိၣ်လၢသ၀ီဃၢၤတဖၣ်န့ၣ် ကနၣ်၀ဲကျိဖးဒိၣ်လီၤ တအါဒံးဘၣ်အဃိတဟးစံၣ်ဒံးဘၣ်. ကျိဖးဒိၣ်လီၤမ့အါထီၣ်ဘျီဒုယဆိမိၣ်ကဟဲစံၣ်အိၣ်လၢတၢ်ဘံၣ်တၢ်ဘၢ လီၢ်လီၤ”အဂ့ၢ်န့ၣ် စံး၀ဲန့ၣ်လီၤ.
တကတီၢ်ဃီ ဖဲအပူၤကွံၥ်လါဒံၣ်စ့ဘၢၣ် ၁၂ သီ ဒီး ၁၆ သီအနံၤန့ၣ်စ့ၢ်ကီး ပယီၤသုးတဒူၣ်ဃီ၀ဲအံၤ ခးလီၤ၀ဲ(၁၂၀ မမ) ကျိဖးဒိၣ် ၄ ဖျၢၣ် လီၤတဲၥ်ပိၢ်ဖးထီၣ်၀ဲလၢ ကီးလၢၢ်ကရူၢ် ကျူမဲသ၀ီဃၢၤဒီးနဲၢ်ဖီထၣ်ကရူၢ် ၀ၣ်ပူၣ်သ၀ီဃၢၤ ကဲထီၣ်ဒံး၀ဲဘၣ်ဆၣ်တၢ်သံ တၢ်ဘၣ်ဒိဘၣ်ထံး တအိၣ်၀ဲဘၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
