လါယနူၤအါရံၤ ၂၃သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၄)ဘျံးဒဝဲၢ်ကီၢ်ရ့ၣ်, တီသရံး ဆူ မိတီၤ ကျဲမုၢ်, တၢ်ဒုးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးပၥ်ဖှိၣ်ဒီးသုးကီၣ်ကးအဘၢၣ်စၢၤကိးနံၤဒဲးဃၣ်ဃၣ်အဂ့ၢ်သ့ၣ်ညါဘၣ်လၢကီၢ်ရ့ၣ်အပှၤဘၣ်မူဘၣ်ဒါအအိၣ်န့ၣ်လီၤ.
စးထီၣ်လါဒံၣ်စဲဘၢၣ် ၁၈,၁၉ သီအခါလံၤလံၤ သုးကီၣ်ကးသ့ၣ်တဖၣ်အံၤဒ်သိးဒိၣ်စိဝဲ မိတီၤကီၢ်ဆၢ တုၤလီၤဆူ ယ့ၤဖၠူၤကျဲဒီတဘိကန့ၢ်အဂီၢ် မၤဝဲဒၣ်တၢ်ထီၣ်ဒုး ပှၤကညီနီၣ်ဂံၢ်ကအိၣ်အဂၤ(၄၀၀)ဃၣ်ဃၣ်ဒီးတၢ်ဒုးကဲထီၣ်ဝဲဒၣ်ကိးနံၤဃၣ်ဃၣ်အဂ့ၢ် ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤစီၤအဲၣ်နၤစံးဘၣ်ဝဲ ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်အိၣ်သးဝဲအံၤစးထီၣ်သးလၢလါဒံၣ်စဲဘၢၣ် (၁၈),(၁၉)သီအခါလံၤလံၤလံန့ၣ်လီၤ.ပယီၤသုးအနီၣ်ဂံၢ်ကအိၣ်အဂၤ(၄၀၀)ဃၣ်ဃၣ်န့ၣ်လီၤ.အဝဲသ့ၣ်ဟးထီၣ်န့ၢ်ဝဲလၢ ယ့ၤဖၠူၤဒုးယၤသုးကလၢၤဒ်သိးကမၤတၢ်ထီၣ်ဒုးဆူ မိတီၤကီၢ်ဆၢတကပၤန့ၣ်လီၤ.အဝဲသ့ၣ်ဟဲထီၣ်ဒီးဘၣ်တၢ်ခိးခးအီၤဖဲသ့ခိသဝီအဃိဆဲးတိဝဲဆူညါတန့ၢ်ဒံးဘၣ်.ဒုၣ်ဒါအံၤအတၢ်တိၥ်လၢကဒိၣ်စိဝဲဒၣ်မိတီၤကျဲခီဖျိအဝဲသ့ၣ်အသုးကလၢၤအိၣ်လၢမိတီၤကီၢ်ဆၢန့ၣ်လီၤ.ဘၣ်ဆၣ် မိတီၤကျဲဒီတဘိန့ၣ် KNLA သုးရ့ၣ်(၁၁)အိၣ်,KTLA(ထံဆဲးမဲးယွၤသုးကျိၤ)ဒီးPDFသ့ၣ်တဖၣ်စ့ၢ်ကီးအိၣ်အဃိအဝဲသ့ၣ်ဆဲးတိဝဲဆူညါတန့ၢ်ဒံးဘၣ်န့ၣ်လီၤ.အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဖဲတၢ်ဒုးအကတီၢ် သုးကီၣ်ကးတကပၤတၢ်ဘၣ်ဒိၣ်ဘၣ်ထံးတၢ်သံတၢ်ပှၢ်အိၣ်ဒ်လဲၣ်အဂ့ၢ်န့ၣ်တသ့ၣ်ညါဘၣ်ဒံးဘၣ်ဘၣ်ဆၣ် တၢ်မၤန့ၢ်ဝဲသုးကီၣ်ကးတၢ်စုကဝဲၤဒီးကျိချံပှၥ်သၣ်အိၣ်ဝဲဒၣ်အဂ့ၢ်ပဒိၣ်အဲၣ်နၤတဲအါထီၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိးခီဖျိတၢ်ဒုးတၢ်ယၤအဃိ သဝီသၢဖျၢၣ် ဒ်အမ့ၢ် သံခိ,မဲးဝါ,ထံမူ သဝီ,ဟံၣ်ခိၣ်(၈၀၀)ဘျဲၣ်, ပှၤကညီနီၣ်ဂံၢ်(၄၀၀၀)ဘျဲၣ်ဘၣ်ဃ့ၢ်ပဒ့ၣ်သးလၢဒူသဝီကပူၤကပၤခိခိၣ်ပှၢ်လၢ်ကျါဒီးဆူဒူသဝီလၢအဂၤအိၣ်ဝဲအဂ့ၢ်ဒီးပှၤပဒ့ၣ်သးလၢတၢ်ဒုးသ့ၣ်တဖၣ်အံၤကဒိးန့ၢ်ဘၣ်တၢ်မၤစၢၤအဂီၢ် တၢ်ရဲၣ်ကျဲၤအီၤအဖၢမုၢ်လီၤအဂ့ၢ် သ့ၣ်ညါဘၣ်လၢကီၢ်ရ့ၣ်အပှၤဘၣ်မူဘၣ်ဒါအအိၣ်န့ၣ်လီၤ.
တနီသရံး ဆူ မိတီၤ ကျဲမုၢ်တၢ်ဒုးအဆၢကတီၢ်သုးကီၣ်ကးသူဝဲကလံၤကျါတၢ်ဒုးဟဲခးလီၤတၢ်ဒီးကဘီယူၤအိၣ်တစှၤန့ၣ်အဘျီ(၁၀)ဘၣ်အဂ့ၢ်သ့ၣ်ညါဘၣ်ဒ်ဂံၢ်ခီၣ်ထံးတၢ်ကစီၣ်တနီၤပၥ်ဖျါဝဲဒၣ်အသိးန့ၣ်လီၤ.