လါဖ့ၤဘြူၤအါရံၤ ၂ သီ, ၂၀၂၅ နံၣ်, ခ့ၣ်အဲးစံၣ်.
ကီၢ်ကၠီၣ်တဲၣ်,ကီၢ်ပယီၤကီၢ်ဆၢတးကီၢ်ရ့ၣ်,ထၣ်စီၣ်ယါကီၢ်ဆၣ်,မဲၢ်ရမၣ်ဝ့ၢ်ဟီၣ်ကဝီၤအပူၤ ဖဲမဟါ လါဖ့ၤဘြူၤအါရံၤ(၁)သီအနံၤ ကၠီၣ်တဲၣ်ပှၤဘၣ်မူဘၣ်ဒါတဖၣ်ဖီၣ်န့ၢ်ဝဲကၠါဖၠၣ်(တၢ်မၤလံၣ်အီၣ်လီအီတၢ်)ခီၣ်ဖၠူထၢၣ်(၁၉)ဖျၢၣ်ဃုၥ်ဒီးလီတဲစိအဖျၢၣ်(၁၀၀၀)ဘျဲၣ်အဂ့ၢ်န့ၣ် ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
ဖဲမဟါလါဖ့ၤဘြူၤအါရံၤထီၣ်(၁)သီအနံၤ,ကၠီၣ်တဲၣ်ပှၤဘၣ်မူဘၣ်ဒါတဖၣ်ကိးပတုၥ်သမံသမိးဝဲတိယိတၣ်,(RevoGRSport)သိလ့ၣ်၀ါတခိၣ်ဖဲမဲၢ်ရမၣ်သိၣ်လ့ၣ်ကျဲတတီၤအကတီၢ် ဖီၣ်န့ၢ်ဝဲခီၣ်ဖၠူထၢၣ် (၁၉)ဖျၢၣ်,လီတဲစိ(၁၂၅၁)ဖျၢၣ်ဃုၥ်ဒီးဆ့မ်ကး(၂၇၄)ဘ့ၣ်အဂ့ၢ်န့ၣ်ကၠီၣ်တဲၣ်(AEC Asia News)တၢ်ကစီၣ်ပၥ်ဖျါဝဲဒၣ်န့ၣ်လီၤ.
လၢန့ၣ်အမဲၥ်ညါ,ပှၤနီသိလ့ၣ်ဖိလၢအတီၣ်စိၥ်ဆှၢဝဲကၠါဖၠၣ်တၢ်လံၣ်အီၣ်လီအီတၢ်ပီးတၢ်လီတဂၤအံၤအသးနံၣ်အိၣ်ဝဲ(၄၅)နံၣ်ဒီး,စံးဝဲလၢလဲၤဟံန့ၢ်ဝဲတၢ်ဖိတၢ်လံၤတဖၣ်အံၤလၢသူမှံထံကျိကၢၢ်နံၤအဂ့ၢ်န့ၣ် ( AEC Asia News) ပၥ်ဖျါစ့ၢ်ကီးဝဲဒၣ်န့ၣ်လီၤ.
ဒီးပှၤနီသိလ့ၣ်ဖိအံၤ ဘၣ်တၢ်တၢ်ငါအီၤစိၥ်ဆှၢဝဲအီၤ တၢ်ဖိတၢ်လံၤသ့ၣ်တဖၣ်အံၤ လၢစ့ယိၤ(၅၀၀၀)ဘးအဂ့ၢ်န့ၣ် ကၠီၣ်တဲၣ်တၢ်ကစီၣ်သန့ ( AEC Asia News)ပၥ်ဖျါ စ့ၢ်ကီးဝဲဒၣ်န့ၣ်လီၤ.
တကတီၢ်ဃီ,ခီၣ်ဖၠူထၢၣ်ဒီးလီတဲစိလၢကၠီၣ်တဲၣ်ပှၤဘၣ်မူဘၣ်ဒါဖီၣ်န့ၢ်ဝဲသ့ၣ်တဖၣ်အံၤ,တၢ်သမံသမိးဒီးဃုထံၣ်သ့ၣ်ညါဘၣ်ဝဲလၢအအိၣ်ဟဲဝဲလၢကညီကီၢ်စဲၣ်ရၤမတံ(CallCenter)တၢ်မၤလံၣ်လီအီၣ်တၢ်အလီၢ်တကပၤန့ၣ်လီၤ. ဒီး ခီဖျိတၢ်ကစိၥ်ဆှၢခီဝဲဆူ ကၣ်ဘီဒံၣ်ယါထံကီၢ်အဃိ ကၠီၣ်တဲၣ်ပှၤဘၣ်မူဘၣ်ဒါတဖၣ်ဖီၣ်ကတီၤပၥ်ကွံၥ်ဝဲအဂ့ၢ်န့ၣ် ကၠီၣ်တဲၣ်တၢ်ကစီၣ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,တကီၢ်ခါခဲအံၤ,တးကီၢ်ရ့ၣ်,ကီၢ်ဆၢကီၢ်ဆၣ်(၅)ဘ့ၣ်ကီၢ်ဆၢတၢ်ဟးထီၣ်က့ၤလီၤကျဲတဖၣ်န့ၣ် ကၠီၣ်တဲၣ်ခိၣ်နၢ်ပှၤဘၣ်မူဘၣ်ဒါတဖၣ်ပၥ်လီၤဝဲတၢ်အိၣ်ခိးသမံသမိးတၢ်အလီၢ်တဖၣ်အိၣ်ဝဲတပယူၥ်ဃီအသိး,မၤဝဲတၢ်ဟးဆှၣ်တၢ်,တၢ်ခိးကွၢ်ဟုၣ်ထံဆၢကီၢ်ဆၢတၢ်အိၣ်သးတပယူၥ်ဃီအိၣ်ဝဲအဂ့ၢ်န့ၣ် ကၠီၣ်တဲၣ်တၢ်ကစီၣ်(AEC Asia News)ပၥ်ဖျါဝဲဒၣ်န့ၣ်လီၤ.
