လါဖ့ၤဘြူၤအါရံၤ ၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃)ဟီၣ်ကဝီၤ,လၢၢ်ဒိၣ်ကီၢ်ဆၣ်အပူၤဖဲအပူၤကွံၥ်လါဖ့ၤဘြူၤအါရံၤ(၄)သီ အနံၤ,ပယီၤသုးအပှၤ(၄)ဂၤဟဲဟ့ၣ်လီၤသးဃုၥ်ဒီးတၢ်စုကဝဲၤသ့ၣ်တဖၣ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၉)အအိၣ်အဂ့ၢ်န့ၣ်ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါပယီၤသုးအပှၤဖိလၢဟဲက့ၤဟ့ၣ်လီၤအသး(၄)ဂၤအံၤမ့ၢ်ဝဲ ညံၤညံၤလွ့ၤ, ကိၤမၠ့ၣ်ဝ့, မၠိမ့သဲၣ်, စီၤအ့ဖြ့ၣ် သ့ၣ်တ ဖၣ်ဒီးအဝဲသ့ၣ်အံၤအခီၣ်ထံးပယီၤသုးကီၣ်ကးဖီၣ်န့ၢ်ဆူၣ်အဝဲသ့ၣ်(ပီၤတၥ်)ဝံၤဘၣ်တၢ်မၢန့ၢ်ဆူၣ်နုၥ်လီၤလၢသုးပူၤဒ်အံၤလီၤအဂ့ၢ်,အဝဲသ့ၣ်အံၤဟဲလီၤဘၣ်မူဒါဖဲပယီၤသုးခီၣ်ချ့သုးရ့ၣ်(ခလရ-၅၈၄)သုးရ့ၣ်အပူၤလီၤအဂ့ၢ်လၢၢ်ဒိၣ်ကီၣ်ဆၣ်ပှၤကတိၤတၢ်ပၢပဒိၣ်စီၤ ဝါမုၢ်စံးဝဲဒ်အံၤန့ၣ်လီၤ.
“ဘၣ်ထွဲဒီးဒုၣ်ဒါဟဲဟ့ၣ်လီၤအသးလၢပဟီၣ်ကဝီၤအပူၤ(၄)ဂၤအံၤန့ၣ်မ့ၢ်ဝဲဒၣ်(ခမရ-၅၈၄)အသုးလီၤ. သုးဖိ(၄)ဂၤအံၤန့ၣ်မ့ၢ်ဝဲပှၤလၢ အိၣ်လီၢ်ယံၤသ့ၣ်တဖၣ်အိၣ်ဝဲလၢဝ့ၢ်တကူၣ်,ပသံၣ်မီၤနီၤ. ဒီးခီဖျိလၢဒုၣ်ဒါတၢ်ရဲၣ်တၢ်ကျဲၤလၢအမ့ၢ်ဝဲကမျၢၢ်တၢ်ဘၣ်ကဲသုးသဲးစး တၢ်ဘျၢအဃိလၢတၢ်ဃုဖံးဃုမၤ,တၢ်လဲၤတၢ်က့ၤအဖီခိၣ်န့ၣ်ဘၣ်တၢ်ဖီၣ်န့ၢ်အဝဲသ့ၣ်မီၤနီၤ. မ့ၢ်လၢတၢ်ဖီၣ်ဃံးအဝဲသ့ၣ်အဃိဘၣ်နုၥ် လီၤကဲဝဲဒၣ်သုးဒ်အံၤဒီးဟဲလီၤဘၣ်မူဒါဖဲ(တိၤသ့ၣ်ဖူ)ဒီး(ဘီကထၣ်)အဘၢၣ်စၢၤသိလ့ၣ်ကျဲမုၢ်ပူၤဖဲန့ၣ်လီၤ. ဟဲဟ့ၣ်လီၤသးပၣ်ဃုၥ် ဒီးတၢ်စုကဝဲၤလီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
ပယီၤသုးဖိ(၄)ဂၤလၢဟဲက့ၤဟ့ၣ်လီၤသးလၢ(KNLA)သုးရ့ၣ်(၉)အစုပူၤအံၤ,ဟဲက့ၤစိၥ်ဃုၥ်ဝဲဒီးတၢ်စုကဝဲၤဒ်အမ့ၢ်ကျိ MA4 – ၁ ခိၣ်, MA1 – ၂ ခိၣ်, ကျိချံ ၇၅ ဖျၢၣ်ဒီးကျိဆၣ်ဒၢ ၃ ဘ့ၣ် သ့ၣ်တဖၣ်စ့ၢ်ကီးန့ၣ်လီၤ. ခီဖျိဟဲက့ၤစိၥ်ဃုၥ်ဝဲတၢ်စုကဝဲၤ ,ကျိချံပှၥ်သၣ် သ့ၣ်တဖၣ်အံၤအဃိ(KNLA)သုးရ့ၣ်(၉)ဟ့ၣ်လၤဟ့ၣ်ကပီၤအဝဲသ့ၣ်လၢကျိၣ်စ့တဂၤစုၥ်စုၥ်န့ၣ်အကလီၢ်(၁၀)ကၠးအဂ့ၢ်န့ၣ်စံးဝဲဒၣ်န့ၣ်လီၤ.
ပှၤသုးဖိလၢအဟဲဟ့ၣ်လီၤသးသ့ၣ်တဖၣ်အံၤဒ်သုးတၢ်သိၣ်တၢ်သီတၢ်ဘျၢ,အတၢ်မၤကျဲအိၣ်ဝဲအသိးန့ၣ်တၢ်တူၢ်လိၥ်အဝဲသ့ၣ်,တၢ်အံးထွဲကွၢ်ထွဲအဝဲသ့ၣ်ဂ့ၤဂ့ၤဘၣ်ဘၣ်ဒီးဒ်န့ၣ်အသိးပယီၤသုးဖိလၢမ့ၢ်တအဲၣ်ဒိးကဲလၢၤသုးသ့ၣ်တဖၣ်မ့ၢ်ဂ့ၤ, မ့ၢ်အဲၣ်ဒိးဟဲက့ၤဟ့ၣ် လီၤအသးသ့ၣ်တဖၣ်မ့ၢ်ဂ့ၤ တၢ်အိၣ်ဒီးတၢ်တူၢ်လိၥ်မုၥ်အဝဲသ့ၣ်ထီဘိလီၤအဂ့ၢ်ပဒိၣ်စီၤဝါမုၢ်တဲဒုးသ့ၣ်ညါအါထီၣ်ဝဲဒၣ်န့ၣ်လီၤ.
မ့ၢ်ဘၣ်ကွၢ်က့ၤဖဲအပူၤကွံၥ်စှၤသီအတီၢ်ပူၤန့ၣ်ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ဟီၣ်ကဝီၤပူၤဒီးကျဲမုၢ်လၢအမ့ၢ် နၣ်သၤကွ့ ထီၣ်ဆူ မုၢ် သဲးတတီၤ, ပဒဲကီဟီၣ်ကဝီၤ ဒီးထီၣ်ဆူ ဆီထံးဟီၣ်ကဝီၤတတီၤ, ကျဲမုၢ်ဝဲန့ၣ်သ့ၣ်တဖၣ်န့ၣ်တၢ်ဒုးတၢ်ယၤကဲထီၣ်အသးအိၣ်ဝဲကိး နံၤဒဲးဃၣ်ဃၣ်စ့ၢ်ကီးအဂ့ၢ်လီၢ်ကတီၤအပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးလၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါယနူၤအါရံၤ(၆)သီအနံၤန့ၣ်စ့ၢ်ကီးပယီၤသုးခီၣ်သုးရ့ၣ်(ခလရ-၂၈၈)အပှၤ (၂)ဂၤဟဲဟ့ၣ်လီၤသးလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၉)အအိၣ်ဃုၥ်ဒီးတၢ်စုကဝဲၤသ့ၣ်တဖၣ်အဂ့ၢ်န့ၣ်ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
