လါအ့ဖြ့ၣ် ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်က၀ီၤအပူၤ သုးဟံန့ၢ်တၢ်စိတၢ်ကမီၤ(၄) နံၣ်ဘျဲၣ် အတီၢ်ပူၤ ခီဖျိသုးမီၤစိရိၤအကဘီယူၤဒီးကျိဖးဒိၣ်အဃိ ဖိသၣ်သံဘၣ်ဒိဘၣ်ထံးခဲလၢၥ်အိၣ်၀ဲ(၅၂)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ်ပၥ်ဖျါ၀ဲဖဲမဟါလါအ့ဖြ့ၣ် ၁၈ သီအနံၤန့ၣ်လီၤ.
မုၢ်တြီၢ်ကီၢ်ရ့ၣ်ပူၤ စးထီၣ်(၂၀၂၁)သုးဟံန့ၢ်တၢ်စိတၢ်ကမီၤတုၤလၢတနံၣ်အံၤ(၂၀၂၅)လါအ့ဖြ့ၣ် ၈ သီအနံၤန့ၣ် ခီဖျိသုးမီၤစိရိၤ အပှၤခးလီၤကျိဖးဒိၣ်ဒီးသူစ့ၢ်ကီး၀ဲကဘီယူၤလဲၤတ့ၢ်လီၤမ့ၣ်ပိၢ်အဃိ ဖိသၣ်(၁၇)နံၣ်ဆူဖီလၥ်သံ၀ဲ(၁၁)ဂၤ ဒီးဘၣ်ဒိ(၄၁)ဂၤ ဘၣ်ဟဲကဲထီၣ်၀ဲဒ်အံၤန့ၣ်လီၤ.
ဒ်မုၢ်တီၢ်ကီၢ်ရ့ၣ်တၢ်မၤနီၣ်စရီပူၤဖျါ၀ဲအသိးန့ၣ် ပှၤဖိသၣ်သံဘၣ်ဒိဘၣ်ထံး(၅၂)ဂၤအကျါန့ၣ်မ့ၢ်၀ဲပိၥ်မုၣ်(၂၆)ဂၤဒီး ပိၥ်ခွါ(၂၆)ဂၤန့ၣ်လီၤ. တကတီၢ်ဃီပှၤဖိသၣ်လၢအသံ(၁၁)ဂၤန့ၣ်မ့ၢ်၀ဲပိၥ်မုၣ်(၅)ဂၤ,ပိၥ်ခွါ(၆)ဂၤဒီးဘၣ်ဒိ(၄၁)ဂၤန့ၣ်ပိၥ်မုၣ် (၂၂)ဂၤ, ပိၥ်ခွါ(၁၉)ဂၤန့ၣ်လီၤ.
ဒ်န့ၣ်အသိးဘၣ်ဃးတၢ်ကဲထီၣ်သးဒ်အံၤန့ၣ် မုၢ်တြီၢ်ကီၢ်ရ့ၣ်အမဲၥ်ညါ ခ့ၣ်အဲယူၣ်ကီၢ်ရ့ၣ်/သုးက့လၢအဂၤတဖၣ်န့ၣ်စ့ၢ်ကီး သုးဟံန့ၢ်တၢ်စိတၢ်ကမီၤ၀ံၤလီၢ်ခံ ခီဖျိကျိဖးဒိၣ်ဒီး,ကဘီယူၤအံၤအဃိ ကမျၢၢ်သံဘၣ်ဒိဘၣ်ထံးအါမးအကျါ ပၣ်ဃုၥ်စ့ၢ်ကီး၀ဲ ဖိဒံဖိသၣ်သ့ၣ်တဖၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤမုၢ်တြီၢ်ကီၢ်ရ့ၣ်ဒီတဘ့ၣ်ဃၣ်ဃၣ်အပူၤတၢ်အိၣ်သးတဂ့ၤဒံးဘၣ်အသိးခီဖျိကျိဖးဒိၣ်,ကဘီယူၤလဲၤတ့ၢ်လီၤမ့ၣ်ပိၢ် အိၣ်ဒံးတလီၢ်လီၢ်အဃိ ဒူသ၀ီကမျၢၢ်လၢအဃ့ၢ်ထီၣ်ဟးစံၣ်အိၣ်လၢပှၤဒူပှၤသ၀ီ,တၢ်လီၢ်လၢအဂၤတဖၣ်န့ၣ်တုၤလၢခဲအံၤ တက့ၤအိၣ်ဘၣ်ဒံးလၢအဒူသ၀ီထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးမီၤစိရိၤအံၤစးထီၣ်လၢအဟံန့ၢ်ဆူၣ်ထံကီၢ်တၢ်စိတၢ်ကမီၤတုၤဃီၤလၢခဲအံၤတစုန့ၣ် တၢ်ဒုးကဲထီၣ်အိၣ်ဂ့ၤ, တအိၣ်ဂ့ၤ ခးလီၤ၀ဲ ကျိဖးဒိၣ်,သူ၀ဲ ဒြိ,ပညိၣ်ဟးခးလီၤတၢ်ဒီးကဘီယူၤလၢကလုၥ်ဒူၣ်တၢ်ပၢၢ်ဆၢကရူၢ်ကရၢအဟီၣ်က၀ီၤပူၤတဖၣ် အဃိကၠိ,သီခါဖၠၣ်, ခံရံၥ်ဖိတၢ်ဘါယွၤသရိၥ်,ကမျၢၢ်အဟံၣ်အဃီလီၤပှီၢ်ဟးဂီၤ၀ဲဒၣ်အါမးအသိးကမျၢၢ်သံဘၣ်ဒိဘၣ်ထံးအါအါဂီၢ်ဂီၢ်အကျါပၣ်ဃုၥ်စ့ၢ်ကီး၀ဲ သူၣ်ဘီၣ်သးစၢ်, ဖိဒံဖိသၣ်,ပှၤကၠိဖိဃုၥ်ဒီးသီခါတပွဲအါမးန့ၣ်လီၤ.
