လါအ့ဖြ့ၣ် ၂၇ သီ, ၂၀၂၅နံၣ်, ခ့ၣ်အဲးစံၣ်,
ကီၢ်သူလ့ၤသုးမုၢ်ဒိၣ်(KTLA Commando )အသုးရ့ၣ်ခိၣ်,သုးခိၣ်ဒိၣ်ဂီၢ်ဂ့ၢ် စီၤစးလိတီခိၣ်ရိၢ်မဲ (KTLA)သုးဖိတနီၤ ဖဲတနံၤအံၤလါအ့ဖြ့ၣ်(၂၆)သီအနံၤန့ၣ် ဟဲက့ၤပၥ်ဖှိၣ်မၤ သကိးက့ၤတၢ်ဒီးတၢ်ဘၣ်ဘျုးဒံၣ်မိၣ်ကရ့ၣ်စံၣ် ကညီ သုးမုၢ်ဒိၣ်(DKBA)အဂ့ၢ်န့ၣ် သ့ၣ်ညါဘၣ်န့ၣ်လီၤ.
(KTLA Commando) သုးရ့ၣ်လီၤဆီအသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤစးလိအံၤ,ဖဲအပူၤကွံၥ်(၂၀၂၃)နံၣ် လါအီးကထိဘၢၣ်အပူၤ ဘၣ်တၢ်ပတုၥ်ကွံၥ်အမူအဒါ လၢကီၢ်သူလ့ၤသုးမုၢ်ဒိၣ်(KTLA)အပူၤ(၉)လါ၀ံၤအလီၢ်ခံ အ၀ဲဟဲက့ၤ မၤသကိးက့ၤတၢ်ဒီး DKBA ကရၢကဲထီၣ်အသးဒ်အံၤန့ၣ်လီၤ.
လၢတၢ်က့ၤမၤသကိးက့ၤဝဲတၢ်ဒီး(DKBA)ကရူၢ်ကရၢအဖီခိၣ်အံၤန့ၣ် သုးခိၣ်ဒိၣ်ဂီၢ်ဂ့ၢ် စီၤစးလိစံးဘၣ် ခ့ၣ်အဲးစံၣ် ကညီတၢ်ကစီၣ် အကွဲၤလ့လိၤ ဒ်အံၤန့ၣ်လီၤ.
“အဲၣ်ဒိးဒုးသ့ၣ်ညါကမျၢၢ်တခါလၢဝံသးစူၤတဘၣ်ဆိမိၣ်ကမၣ်ယၤတဂ့ၤ,ယၤဒုပှဲၤသိးတၢ်အိၣ်ဒီးယၤသွံၣ်ထံကပၢၤကဝါလၢၥ်ဒီးကျိချံပှၥ်သၣ်,ပျဲၢ်ဘီၣ်တၢ်ကိးမံၤဒဲးယဟ့ၣ်လီၤလၢၥ်လံ,ခီဖျိလၢတၢ်တဘၣ်လီၢ်ဘၣ်စးဒီးယမၤက့ၤတန့ၢ်လၢၤဘၣ်အဖီခိၣ်,ယဘၣ်တၢ်ပတုၥ်ကွံၥ်လၢမူဒါလီၤ. တမ့ၢ်လၢယသ့ၣ်စၤဖီၣ်ဒီး ယပှၤကလုၥ်ယခိၣ်ယနၢ် ယပျဲၢ်ယဘီၣ်ဘၣ်.တၢ်ပတုၥ်ယၤမူဒါဝံၤအလီၢ်ခံယအိၣ်ခိးဒံး ဘၣ်ဆၣ်အဘျီအါထီၣ်အဃိ လၢတၢ်အိၣ် တၢ်ဆိးတၢ်အီၣ်တၢ်အီတၢ်ဟဲနုၥ်တကပၤတဘၣ်လီၢ်ဘၣ်စးဘၣ်အဃိန့ၣ်ပဘၣ်ဃုခိၣ်နၢ်က့ၤဝဲခိၣ်နၢ်လၢအသီလၢအဂ့ၤလၢပဖီခိၣ်န့ၣ်လီၤအဂ့ၢ်န့ၣ် ယအဲၣ်ဒိးတဲနၢ်ပၢၢ်ဒၣ်ဒ်န့ၣ်လီၤ”အဂ့ၢ် စံးဝဲဒၣ်န့ၣ်လီၤ.
သုးခိၣ်ဒိၣ်ဂီၢ်ဂ့ၢ် စီၤစးလိဃုၥ်ဒီးအပှၤလၢဟဲက့ၤမၤသကိးက့ၤဝဲတၢ်ဒီး တၢ်ဘၣ်ဘျုးဒံၣ်မိၣ်ကရ့ၣ်စံၣ် ကညီသုးမုၢ်ဒိၣ်(DKBA)အံၤ ပၥ်ဖှိၣ်ခဲလၢၥ်အိၣ်ဝဲ(၄)ဂၤအဂ့ၢ်န့ၣ် သ့ၣ်ညါဘၣ်ဒ်(DKBA)ပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ.
ဒီးလၢတၢ်တူၢ်လိၥ်က့ၤဝဲသုးခိၣ်စီၤစးလိအံၤအဖီခိၣ်,(DKBA)သုးရိၢ်မဲခိၣ်ကျၢၢ်(၂)သုးခိၣ်ကျၢၢ်စိစီၤရွ့ၣ်ဝၣ်စံးဘၣ်ခ့ၣ်အဲးစံၣ်ကညီတၢ်ကစီၣ်အကွဲၤလ့လိၤဒ်န့ၣ်လီၤ.
“ဟဲက့ၤကဒါက့ၤလၢယအိၣ်ဒၢးယတူၢ်လိၥ်အီၤလီၤ.ဘၣ်ဆၣ်ယတဲအီၤလၢနမ့မၤလၢခံတဘျီတခီယသးကညီၤနၤတသ့လၢၤဘၣ်.အဝဲနါက့ကဘၣ်ဘှီလီၤအသးလီၤထံထံဆးဆးလီၤ. တကီၢ်ခါခဲအံၤ ပဒိန့ၢ်အဝဲသ့ၣ်(DKBA) ကးလံ,အလီၢ်လၤတခီမ့ၢ်ဒၣ်လၢသုးရ့ၣ်ခိၣ်လီၤ.ဘၣ်ဆၣ်ဂံၢ်ဘါတပှဲၤဒံးဘၣ်အဃိန့ၣ်,ဟံဆိဝဲတၢ်ဘံၣ်တၢ်ဘၢဖဲယခီၣ်ထံးလီၤ.အဂံၢ်ဘါမ့ၢ်ပှဲၤထီၣ်တခီန့ၣ်ပကပၥ်က့ၤအီၤဒ်အပူၤကွံၥ်လီၢ်လၤလီၢ်လီၢ်အသိးန့ၣ်လီၤ”အဂ့ၢ် စံးဝဲဒၣ်န့ၣ်လီၤ.
သုးခိၣ်ဒိၣ်ဂီၢ်ဂ့ၢ် စီၤစးလိအံၤ အပူၤကွံၥ်(၂၀၁၉)နံၣ် တုၤလၢ(၂၀၂၂)နံၣ်န့ၣ် မ့ၢ်တ့ၢ်ဝဲတၢ်ဘၣ်ဘျုး ဒံၣ်မိၣ်ကရ့ၣ်စံၣ်ကညီသုးမုၢ်ဒိၣ် (DKBA) သုးကျိၤခိၣ်တဂၤန့ၣ်လီၤ.
စးထီၣ်ဖဲ(၂၀၂၂)နံၣ်,လါအ့ဖြ့ၣ်န့ၣ် အလဲၤပၥ်ဖှိၣ်မၤသကိးဝဲတၢ်ဒီး ကီၢ်သူလ့ၤ ကညီသုးမုၢ်ဒိၣ်(KTLA)လၢဘၣ်တၢ်ဒုးအိၣ်ထီၣ်အီၤလၢသုးခိၣ်ကျၢၢ်ဖိစီၤနၢၤနါမၠးန့ၣ်လီၤ. ဖဲန့ၣ်အဝဲဖီၣ်၀ဲ ခီၣ်မဲဒိၣ်သုးရ့ၣ်လီၤဆီအသုးရ့ၣ်ခိၣ် ယံၥ်ဝဲ(၂)နံၣ်ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
