လါအ့ဖြ့ၣ် ၂၂သီ, ၂၀၂၅နံၣ်, ခ့ၣ်အဲးစံၣ်,
မါတလ့ကီၢ်ခီဒိၣ်,အိဘိၤဃိၥ်အပူၤအပူၤကွံၥ်လါမးရှး(၂၈)သီအနံၤဟီၣ်ခိၣ်ဟူးကဲထီၣ်သးအဃိထံရုၢ်ကီၢ်သဲးပှၤဃိၥ်ဖိဃုၥ်ဒီးပှၤဃိၥ်ဖိလၢအဂၤတဖၣ်ခဲလၢၥ်အဂၤ(၃၀)ဘျဲၣ်ဃၣ်ဃၣ်ဘၣ်သံဝဲအဂ့ၢ်,ပှၤကွၢ်ထွဲမၤစၢၤထံရုၢ်ကီၢ်သဲးပှၤဃိၥ်ဖိကရူၢ်ကရၢ(၇)ဖုပၥ်ဖျါဝဲဖဲအပူၤကွံၥ်လါအ့ဖြ့ၣ်(၂၀)သီအနံၤန့ၣ်လီၤ.
အိဘိၤတၢ်ဒုးဃၥ်ဃိၥ်အပူၤဟီၣ်ခိၣ်ဟူးအဃိပှၤဃိၥ်ဖိဘၣ်ဒိဘၣ်ထံးအိၣ်ဝဲအဂၤ(၂၈၀)ဘျဲၣ်အကျါပၣ်ဃုၥ်ဝဲထံရုၢ်ကီၢ်သဲးပှၤဃိၥ်ဖိမုၥ်(၁၀)ဂၤ,ခွါ(၁၀)ဂၤအမဲၥ်ညါ,ဘၣ်သံဝဲတစှၤန့ၢ်အဂၤ(၃၀)ဘၣ်အိၣ်ဝဲအသိး,ဟီၣ်ခိၣ်အမဲၥ်ဖံးအိၣ်တၢ်သံတၢ်ပှၢ်တၢ်ဘၣ်ဒိဘၣ်ထံးအါန့ၢ်ဒံးတၢ်မၤနီၣ်မၤဃါစရီတၢ်အိၣ်သးအိၣ်ဝဲသ့အဂ့ၢ်,ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ.
တကီၢ်ခါခဲအံၤ,ထံရူၢ်ကီၢ်သဲးပှၤဃိၥ်ဖိလၢအအတူၢ်ဘၣ်ဟီၣ်ခိၣ်ဟူးတၢ်ဘၣ်ဒိဘၣ်ထံးတဖၣ်,တဒိးန့ၢ်ဘၣ်ဝဲထံဂုၤကီၢ်ဂၤကရူၢ်ကရၢတၢ်ဟ့ၣ်ပှၤကညီတၢ်ဒိသူၣ်ဒိသးတၢ်တိစၢၤမၤစၢၤဘၣ်အမဲၥ်ညါ,ပှၤလၢအတူၢ်ဘၣ်နီၢ်ခိနီၢ်သးတၢ်ဘၣ်ဒိဘၣ်ထံးတဖၣ်တဒိးန့ၢ်ဘၣ်ဝဲဃိၥ်ဆူၣ်ချ့တၢ်အံးထွဲကွၢ်ထွဲလၢလၢပှဲၤပှဲၤဘၣ်အိၣ်ဝဲအဂ့ၢ်,သ့ၣ်ညါဘၣ်ဒ်လံၥ်တၢ်ပၥ်ဖျါအသိးန့ၣ်လီၤ.
ဘၣ်ဃးဒီးတၢ်ဂ့ၢ်အံၤ(PPNM)ကမံးတံၥ်ပှၤတီခိၣ်ရိၢ်မဲတၢ်ကိၤသဲၣ်ထိအူစံးဝဲလၢ“ဂံၢ်ခီၣ်ထံးတၢ်ဟ့ၣ်ကသံၣ်ကသီတၢ်အိၣ်ဆူၣ်အိၣ်ချ့ဒၣ်လဲၥ်လၢလၢပှဲၤပှဲၤတအိၣ်ဘၣ်အဃိ,ပှၤဃိၥ်ဖိသ့ၣ်တဖၣ်ဘၣ်ကူစါယါဘျါအနီၢ်ကစၢ်ဒ်အနီၢ်ကစၢ်တၢ်လၢၥ်ဘူၣ်လၢၤစ့ၤအသိးန့ၣ်လီၤ.အဃိန့ၣ်ပအဲၣ်ဒိးဆီၣ်တခူစံးလၢထံဂုၤကီၢ်ဂၤကရူၢ်ကရၢတဖၣ်ကပၥ်သူၣ်ပၥ်သးဘၣ်ဃးဒီးကီၢ်ပယီၤဟီၣ်ခိၣ်ဟူးတၢ်ဂ့ၢ်အံၤဒီးသုတကွၢ်ကပၥ်ပၥ်တ့ၢ်ပှၤဃိၥ်ဖိသ့ၣ်တဖၣ်တဂ့ၤအဂီၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,သုးကီၣ်ကးအံၤမၤလီၤဘၢလီၤမၢ်ကွံၥ်ဝဲပှၤဃိၥ်ဖိလၢအဘၣ်သံဝဲလၢဃိၥ်ပူၤသ့ၣ်တဖၣ်အကစီၣ်ဒီးမၢဆူၣ်ဝဲထံရုၢ်ကီၢ်သဲးပှၤဃိၥ်ဖိတဖၣ်လၢကနုၥ်လီၤအိၣ်လၢဟီၣ်ခိၣ်ဟူးတၢ်သူၣ်ထီၣ်လီၤပှီၤဟးဂုၤဟးဂီၤတဖၣ်အပူၤအိၣ်ဝဲအသိး,တၢ်မ့တလူၤပိၥ်မၤထွဲဝဲတခီမၤပျံၤမၤဖုးဝဲလၢကဆှၢဝဲဆူသၣ်ယၣ်ဝတံၣ်ဃိၥ်အပူၤ,ကဆီတလဲဝဲဃိၥ်အိၣ်ဝဲအဂ့ၢ်,(PPNM)ပၥ်ဖျါဝဲဒၣ်စ့ၢ်ကီးန့ၣ်လီၤ.
လၢတၢ်န့ၣ်အဃိ,ဘီမုၢ်စၢဖှိၣ်ကရၢဃုၥ်ဒီးထံဂုၤကီၢ်ဂၤပှၤဂ့ၢ်ဝီခွဲးယၥ်ကရူၢ်ကရၢတဖၣ်ကကွၢ်ဟုၣ်ကွၢ်စုၣ်ဝဲကီၢ်ပယီၤဃိၥ်အပူၤသုးကီၣ်ကးအတၢ်မၤအၢမၤသီလၢထံရုၢ်ကီၢ်သဲးပှၤဃိၥ်ဖိတဖၣ်အဖီခိၣ်တပယူၥ်ဃီအဂ့ၢ်ဃ့ထီၣ်ပၥ်ဖျါဝဲဒၣ်လၢကရူၢ်(၇)ဖုအလံၥ်ထုးထီၣ်ပၥ်ဖျါအပူၤန့ၣ်လီၤ.
ဒ်န့ၣ်အသိး,ဘၣ်ဃးဒီးလံၥ်ထုးထီၣ်ပၥ်ဖျါအံၤကီၢ်ပယီၤဒီဘ့ၣ်ထံရူၢ်ကီၢ်သဲးပှၤဃိၥ်ဖိပှၥ်ဘျးစဲ(PPNM),ပှၤကွၢ်ထွဲထံရုၢ်ကီၢ်သဲးပှၤဃိၥ်ကရူၢ်ကရၢ(AAPP),ကရံၣ်နံၣ်ထံရုၢ်ကီၢ်သဲးပှၤဃိၥ်ဖိကရူၢ်(KPPA),ပိၥ်မုၣ်ပိၥ်မၢၤထံရုၢ်ကီၣ်သဲးပှၤဃိၥ်ဖိကရၢ(WOPP),ထံရူၢ်ကီၢ်သဲးပှၤဃိၥ်ဖိလီၢ်လံၤကရၢ(FPPS)နွ့ၣ်အူတမၣ်တၢ်ကွၢ်ထွဲထံရုၢ်ကီၢ်သဲးပှၤဃိၥ်ဖိကရူၢ်ဒီးတၢ်ဆှၢလံၥ်ဆူဃိၥ်ကရူၢ်ကရၢထုးထီၣ်ပၥ်ဖျါဝဲဒၣ်န့ၣ်လီၤ.
