လါအ့ဖြ့ၣ် ၁၉သီ, ၂၀၂၅နံၣ်, ခ့ၣ်အဲးစံၣ်.
KNU-ကညီဒီကလုၥ်စၢဖှိၣ်ကရၢဟီၣ်ကဝီၤ,တနံၤဃီတီၢ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ်ထီၣ်မၤန့ၢ်ဝဲ ပယီၤသုးကီၣ်ကးအသုးကလၢၤ(၂)ဖျၢၣ်အဂ့ၢ် သ့ၣ်ညါဘၣ်လၢ KNLA အပှၤဘၣ်မူဘၣ်ဒါအအိၣ်န့ၣ်လီၤ.
ပယီၤသုးကီၣ်ကးအသုးကလၢၤ(၂)ဖျၢၣ်လၢ (KNLA)ဒီးသုးပၥ်ဖှိၣ်ထီၣ်မၤန့ၢ်ဝဲသ့ၣ်တဖၣ်န့ၣ်မ့ၢ်ဝဲ KNU သုးက့(၄),ထံမိၢ်ပှၢ်ဟီၣ်ကဝီၤ ထံထၣ်ပယီၤသုးဒုးယၤနီၣ်ဂံၢ်(၁)သုးကလၢၤတဖျၢၣ်ဒီး KNUသုးက့(၇),တန့ဆါကီၢ်ဆၣ်,KNLAသုးရ့ၣ်(၁၀၁)ဟီၣ်ကဝီၤ လ့ဂီၤ(ကိး)မီၤကလၤ ပယီၤသုးကီၣ်ကးအသုးကလၢၤတဖျၢၣ်အဂ့ၢ် KNLAအပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ဘၣ်ဃးဒီးတၢ်ထီၣ်မၤန့ၢ်ဝဲ ထံထၣ်ပယီၤသုးဒုးယၤနီၣ်ဂံၢ်(၁)အသုးကလၢၤန့ၣ် KNU သုးက့(၄)အသုးက့ခိၣ် သုးခိၣ်ကျၢၢ်ဖိစီၤဖိလ့စံးဝဲလၢ“ဖဲတနံၤအံၤဟါခီ(၅)နၣ်ရံၣ် ဃၣ်ဃၣ်န့ၣ် ပပှၤထီၣ်မၤပျီကွံၥ်ထံထၣ်ပယီၤသုးဒုးယၤနီၣ်ဂံၢ်(၁)ဝံၤလံန့ၣ်လီၤ.တၢ်ဒုးဝဲအံၤမ့ၢ်ဝဲ(၆)သီတီၢ်ပူၤတၢ်ဒုးန့ၣ်လီၤ.တၢ်ဂ့ၢ်တၢ်ကျိၤလီၤတံၢ်လီၤဆဲးခီန့ၣ်တသ့ၣ်ညါဘၣ်ဒံးဘၣ်.”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ ထံထၣ်ပယီၤသုးကလၢၤအံၤ ဟဲအိၣ်ဆီလီၤသးဖဲ ထံမိၢ်ပှၢ်ဟီၣ်ကဝီၤအံၤစးထီၣ်လၢ ၁၉၉၇အခါလံၤလံၤဒီးဖဲတနံၤအံၤန့ၣ် KNLAသုးက့(၄)ဒီးသုးပၥ်ဖှိၣ်ထီၣ်မၤန့ၢ်ကွံၥ်ခဲလၢၥ်အဂ့ၢ် အဝဲတဲအါထီၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိး ဘၣ်ဃးဒီး KNU သုးက့(၇)ထီၣ်မၤန့ၢ်ဝဲ လ့ဂီၤ(ကိး)မီၤကလၤပယီၤသုးကလၢၢၤန့ၣ် KNLA သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၣ်နံၣ် စံးဝဲလၢ“ မ့ၢ်လီၤ. ပှၤထီၣ်န့ၢ် န့ၣ်(၂)သီမ့တမ့ၢ်(၂)သီဘျဲၣ်လီၤ.တးတးဖိလီၤ.သုးကလၢၤန့ၣ်အအိၣ်ဖဲလ့ခိၣ်ဒီးလၢအပူၤကွံၥ်န့ၣ်တၢ်ထီၣ်န့ၢ်ကွံၥ်အီၤတဘျီလံ,ဝံၤဒီးအဝဲသ့ၣ်ဟဲက့ၤအိၣ်ကဒါက့ၤန့ၣ်လီၤ. အိၣ်ဝဲဖဲ လ့ဂီၤ, မီၤကလၤလ့ခိၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲညါ လ့ဂီၤ,မီၤကလၤသုးကလၢၤဝဲအံၤစ့ၢ်ကီးဟဲအိၣ်ဆီလီၤသးကအိၣ်အနံၣ်(၂၀)ဘျဲၣ်လံဒီး မ့ၢ်ကွၢ်လၢကၠီၣ်တဲၣ်ကီၢ်တကပၤန့ၣ်အလိၤလိၥ်သးဒီးညၣ်မူၤကျိဒီးတၢ်ဂ့ၢ်တၢ်ကျိၤလီၤတံၢ်လီၤဆဲးန့ၣ်ခဲမဆ့ၣ်မးတၢ်မၤလီၤတံၢ်အီၤကန့ၢ်အဂ့ၢ် သုးခိၣ်ကျၢၢ်ဒိၣ်စိစီၤကၠီၣ်နံၣ်တဲအါထီၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိးလီၤ တကီၢ်ခါခဲအံၤ ခ့ၣ်အဲၣ်ယူၣ် သုးက့(၆), ကီးတရံးဒီးကြုၢ်တုကီၢ်ဆၣ်ဟီၣ်ကဝီၤပူၤ KNLA သုးပၥ်ဖှိၣ်ဒီးပယီၤသုးကီၣ်ကးအဘၢၣ်စၢၤ တၢ်ဒုးဆူၣ်ဝဲဒၣ်အဖၢမုၢ်ဒီး တၢ်ပၢၢ်ဆၢသုးပၥ်ဖှိၣ်တပၤမၤန့ၢ်စ့ၢ်ကီးဝဲပယီၤသုးအသုးကလၢၤအိၣ်ဝဲအဂ့ၢ် သ့ၣ်ညါဘၣ်လၢ တၢ်မဲၥ်ညါ KNLAဒီးKNDO အပှၤဘၣ်မူဘၣ်ဒါအအိၣ်န့ၣ်လီၤ.
