လါမ့ၤ ၅သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကြုၢ်တုကီၢ်ဆၣ်ဟီၣ်ကဝီၤအပူၤတၢ်ဒုးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤအဃိ,နံၣ်လၢကဟဲတၢ်မၤလိမၤဒိးအဂီၢ်ပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်အိၣ်ဝဲဒီးတၢ်ဘၣ်ယိၣ်ဘၣ်ဘှီလၢဖိလံၤတဖၣ်အဂီၢ်အဂ့ၢ်,လီၢ်အိၣ်ကဒုဖိတဖၣ်စံးဝဲဒၣ်န့ၣ်လီၤ.
ကြုၢ်တုကီၢ်ဆၣ်ဟီၣ်ကဝီၤအပူၤ,အပူၤကွံၥ်လါအ့ဖြ့ၣ်(၁၄)သီအနံၤအပူၤတၢ်ဒုးတၢ်ယၤဆူၣ်ထီၣ်ဝဲအဖီခိၣ်,ကမျၢၢ်လီၢ်ကဝီၤဖိတဖၣ်ဘၣ်ဃ့ၢ်ထီၣ်အိၣ်ကဒုဝဲအသးဒီးလီၢ်အိၣ်ကဒုဖိလၢအဃ့ၢ်ထီၣ်အိၣ်ကဒုဝဲအသးတဖၣ်အံၤနံၣ်လၢကဟဲတၢ်မၤလိမၤဒိးအဂီၢ်ဘၣ်ယိၣ်ဝဲလၢဖိလံၤတဖၣ်တဒိးန့ၢ်မၤလိဘၣ်ဝဲတၢ်ဘၣ်အဂ့ၢ်,သ့ၣ်ညါဘၣ်န့ၣ်လီၤ.
နံၣ်လၢကဟဲဖိလံၤတၢ်ဖံးလိမၤလိအဂီၢ်တၢ်ဘၣ်ယိၣ်ဘၣ်ဘှီအိၣ်ဝဲဒ်န့ၣ်အဂ့ၢ်န့ၣ်ကြုၢ်တုကီၢ်ဆၣ်သဝီကမျၢၢ်လီၢ်ကဝီၤပိၥ်မုၣ်လၢအဃ့ၢ်အိၣ်ကဒုသးတဂၤစံးဝဲဒ်အံၤန့ၣ်လီၤ.
“ပဘၣ်ယိၣ်ဘၣ်ဘှီဝဲတၢ်ဒိၣ်မး,ပမုၢ်လၢ်လၢ်လၢပဖိသ့ၣ်တဖၣ်အံၤဖးလံၥ်ကွဲးလံၥ်ဘၣ်,ကဲထီၣ်ပှၤဂ့ၤပှၤဝါလဲၤဖျိက့ၤဖျိဒ်ပှၤထံပှၤကီၢ်ပှၤဖိပှၤလံၤအသိးန့ၣ်လီၤ.ခဲအံၤပထံပကီၢ်တၢ်အိၣ်သးဒ်အံၤတဘျီပတၢ်မုၢ်လၢ်လီၤမၢ်လၢၥ်လံ,သဝီပူၤကၠိအိးထီၣ်တဘူၣ်,မ့ၢ်ပကဘၣ်လဲၤဆှၢက့ၤပဖိပလံၤဖဲလဲၣ်ပတသ့ၣ်ညါဘၣ်.ပသးကညီၤဘၣ်ဖိဒံဖိသၣ်ဒိၣ်မးန့ၣ်လီၤ.ပဖိပလံၤအံၤအနီၢ်ဒိၣ်ထီၣ်ကလီလီလီၤ.တန့ၢ်မၤလိဘၣ်တၢ်မုၥ်မုၥ်နီၢ်နီၢ်ဘၣ်.ဘၣ်ပျံၤဘၣ်ဖုးတၢ်,ခဲအံၤဟးစံၣ်အိၣ်နါက့မ့နၢ်ဟူကဘီယူၤသီၣ်န့ၢ်ဃ့ၢ်ဖိးဟုမိၢ်ပၢ်ညါ,အဝဲသ့ၣ်ဒိးန့ၢ်ဘၣ်သးတၢ်တူၢ်ဘၣ်မ့ၢ်မၤလံၥ်လဲၢ်ကဘၣ်ဒံးဧါတသ့ၣ်ညါလၢၤဘၣ်”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,စးထီၣ်လၢအပူၤကွံၥ်နံၣ်အပူၤကဘီယူၤတၢ်လီၤဘၣ်ယိၣ်အိၣ်ဝဲအဃိ,မိၢ်ပၢ်တနီၤထုးထီၣ်ဆိကွံၥ်ဝဲဖိလံၤလၢကၠိအိၣ်ဝဲဒီးကဲထီၣ်ဝဲတၢ်လီၤတိၢ်လၢဖိဒံဖိသၣ်တၢ်ဒိၣ်ထီၣ်ထီထီၣ်အဂီၢ်အဖီခိၣ်,နံၣ်လၢကဟဲတၢ်မၤလိအပူၤမုၢ်လၢ်ဝဲလၢဖိလံၤတဖၣ်ကဆဲးမၤလိဘၣ်တၢ်အဂ့ၢ်,ကြုၢ်တုကမျၢၢ်လီၢ်ကဝီၤပိၥ်မုၣ်လၢအဂၤတဂၤစံးစ့ၢ်ကီးဝဲဒၣ်ဒ်အံၤန့ၣ်လီၤ.
“ယလံၤတဖၣ်န့ၣ်တထီၣ်ဘၣ်ကၠိဘၣ်.ဟးထီၣ်ကၠိလၢအပူၤကွံၥ်နံၣ်န့ၣ်လံ,တၢ်သီၣ်တၢ်သဲအဃိန့ၣ်ပဘၣ်ထုးထီၣ်ကွံၥ်ကၠိမီၤမ့တမ့ၢ်ဘၣ်ခီတၢ်မ့ကဲထီၣ်န့ၣ်ပဃုက့ၤတဘၣ်လၢၤဘၣ်အဃိန့ၣ်ပဘၣ်ယိၣ်တၢ်န့ၣ်လီၤ.ပဘၣ်ပျံၤဝဲကဘီယူၤတၢ်ကွံၥ်လီၤတၢ်တခါန့ၣ်လီၤမီၤ.ပအဲၣ်ဒိးပၥ်အဝဲသ့ၣ်ကၠိဝဲဘၣ်ဆၣ်,တၢ်အိၣ်သးဒ်အံၤအဃိပပၥ်တဘူၣ်လၢၤဘၣ်.နါက့ခဲကၢၥ်တနံၣ်ဒုအဲၣ်ဒိးဆဲးပၥ်ကၠိဒံးဝဲ,တသ့လံၥ်လဲၢ်နီတဖျၢၣ်ဒံး”အဂ့ၢ်စံးဝဲဒၣ်န့ၣ်လီၤ.
ကြုၢ်တုကီၢ်ဆၣ်,ဝၣ်ကးသဝီအပူၤအပူၤကွံၥ်လါအ့ဖြ့ၣ်(၂၃)သီအနံၤအပူၤသုးကီၣ်ကးကဘီယူၤတ့ၢ်လီၤဝဲမ့ၣ်ပိၢ်ဒီးခးလီၤဝဲကျိဖးဒိၣ်အဃိ,ကၠိတၢ်သူၣ်ထီၣ်ဒီးကမျၢၢ်ဟံၣ်ဃီဘၣ်ဟးဂုၤဟးဂီၤဝဲအဂ့ၢ်,သ့ၣ်ညါဘၣ်န့ၣ်လီၤ.
ခီဖျိဒုးယၤတၢ်သဘံၣ်ဘုၣ်အိၣ်ဒံးဝဲအဖၢမုၢ်အဃိ,ကြုၢ်တုကီၢ်ဆၣ်ဟီၣ်ကဝီၤအပူၤနံၣ်လၢကဟဲကၠိတၢ်မၤလိနံၣ်အဂီၢ်တၢ်တၤတၢ်အိၣ်ဝဲဒီးမ့ၢ်တၢ်ကီတၢ်ခဲဖးဒိၣ်လၢဖိဒံဖိသၣ်တဖၣ်အဂီၢ်အဂ့ၢ်,ကြုၢ်တုၢ်ကီၢ်ဆၣ်ခိၣ်,(ပဒိၣ်မါကၠၤညိၣ်)စံးဝဲဒ်အံၤန့ၣ်လီၤ.
“ဘၣ်ဃးတၢ်ကူၣ်ဘၣ်ကူၣ်သ့တကပၤဒုတနံၣ်အံၤကြုၢ်တုကီၢ်ဆၣ်အပူၤတၢ်ကီတၢ်ခဲအိၣ်ဝဲအါမးလီၤ.ခဲအံၤကစၢၢ်ခီၣ်ထံးဒီတကျိၤကဘီယူၤဟဲထီၣ်ဟဲလီၤဒီယုၢ်ဒ်အံၤဒုတၢ်မၤတကဲထီၣ်ဘၣ်.ပယီၤသုးအံၤပညိၣ်ဝဲထဲကၠိတၢ်သူၣ်ထီၣ်သီခါဖၠၣ်တၢ်သူထီၣ်လီၤဒုတၢ်လီၤဘၣ်ယိၣ်အိၣ်ဝဲဒိၣ်မးလီၤ.အဃိန့ၣ်တနံၣ်အံၤဒုကဲထီၣ်တၢ်ဒိဘၣ်လၢဖိသၣ်တၢ်ကူၣ်ဘၣ်ကူၣ်သ့တၢ်ဒိၣ်ထီၣ်ထီ,တၢ်ဒိးန့ၢ်ဘၣ်ပီညါလီၤ”အဂ့ၢ်စံးဝဲဒၣ်န့ၣ်လီၤ.
ကြုၢ်တုကီၢ်ဆၣ်ဟီၣ်ကဝီၤအပူၤ,တၢ်ဒုးကဲထီၣ်လၢခံခီခံကပၤအဘၢၣ်စၢၤအဆၢကတီၢ်သုးကီၣ်ကးအံၤခီဖျိသူကဘီယူၤတ့ၢ်လီၤမ့ၣ်ပိၢ်ခးလီၤဝဲတၢ်လၢကမျၢၢ်အိၣ်ဆိးတၢ်သူၣ်ထီၣ်ဘှီထီၣ်လီၢ်ကျဲတဖၣ်အပူၤ,ကြုၢ်တုဟီၣ်ကဝီၤကမျၢၢ်ဒူသဝီအဖျၢၣ်(၄၀)ဃၣ်ဃၣ်ဘၣ်ဃ့ၢ်ထီၣ်အိၣ်ကဒုဝဲအသးအဂ့ၢ်,သ့ၣ်ညါဘၣ်ကီၢ်ဆၣ်ပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ.
