တၢ်မၤကမၣ်မုၣ်ခွါသွံၣ်ထံးတၢ်စုဆူၣ်ခီၣ်တကး လၢကလုာ်ဒူၣ်တဖၣ်အဖီခိၣ်တၢ်ကဟံးအရ့အဂီၢ် KHRG ဃ့ထီၣ်

လါယူၤ ၂၂ သီႇ ၂၀၂၀ နံၣ်ႇ စးအဲၣ်ဆူ

ဖဲအပူၤကွံာ်ဆၢကတီၢ်န့ၣ်လၢကလုာ်ဒူၣ်တဖၣ်အဖီခိၣ်ၦၤလၢအမၤကမၣ်၀ဲမုၣ်ခွါသွံၣ်ထံးတၢ်စုဆူၣ်ခီၣ်တကးလၢကလုာ်ဒူၣ်တဖၣ်အဖီခိၣ်န့ၣ်ထံကီၢ်ပဒိၣ်ဒီး သုးမုၢ်ဒိၣ်အံၤ ကက့ၤဃိထံမၤဖျါထီၣ်သမံသမိးဒီးဟံအရ့အဂီၢ်ဖဲလါယူၤ ၁၉ သီအနံၤ လၢအလီၤဘၣ်၀ဲဟီၣ်ခိၣ်ဒီဘ့ၣ် တၢ်သဘံၣ်သဘုၣ်လၢအိၣ်လီၢ်က၀ီၤပူၤတဖၣ် မုၣ်ခွါသွံၣ်ထံးတၢ်စုဆူၣ်ခီၣ်တကးအမုၢ်နံၤအံၤကညီၦၤဂ့ၢ်၀ီခွဲးယာ် -KHRG ဃ့ထီၣ်၀ဲန့ၣ်လီၤႉ

လီၢ်က၀ီၤလၢတၢ်သဘံၣ်သဘုၣ်ကဲထီၣ်တဖၣ်န့ၣ်ပယီၤသုးမုၢ်ဒိၣ်အံၤ လၢကလုာ်ဒူၣ်တဖၣ်အဖီခိၣ် မၤ၀ဲဒၣ်မုၣ်ခွါသွံၣ်ထံးတၢ်စုဆူၣ်ခီၣ်တကးဒီး သူ၀ဲဒၣ်ဒ်တၢ်စုက၀ဲၤအသိးအဃိ တၢ်လၢအ၀ဲသ့ၣ်မၤကမၣ်၀ဲလၢအပူၤကွံာ်တဖၣ်အံၤန့ၣ်ခီဖျိလၢအပူၤဖျဲးထီၣ်လၢတၢ်ကမၣ်ဒီး တၢ်က့ၤဃိထံသမံသမိးက့ၤအီၤအဃိခါဆူညါအဂီၢ် ဖျါလီၤဂာ်ဒ်သိးဒီးတၢ်ဟ့ၣ်အခွဲးလၢကဆဲးမၤကမၣ်တၢ်အဂီၢ်လီၤအဂ့ၢ်န့ၣ် KHRG စံး၀ဲန့ၣ်လီၤႉ

KHRG ၦၤနဲၣ်တၢ် နီၢ်ထူထူ စံး၀ဲလၢ “တၢ်စုဆူၣ်ခီၣ်တကးတဖၣ်အံၤ ဒ်သိးဒီးသုတပူၤဖျဲးထီၣ်လၢတၢ်ကမၣ်သုတကဲထီၣ်သးလၢၤတဂ့ၤအဂီၢ်ႇလၢတၢ်ထဲသိးတုၤသိးအဂီၢ် ပဒိၣ်ဒီးသုးမုၢ်ဒိၣ်တဖၣ်ကဘၣ်ဃိထံသမံသမိးအီၤန့ၣ် လိၣ်၀ဲဒၣ်လီၤႉ မ့တမ့ၢ်ဘၣ်န့ၣ်ၦၤလၢအတူၢ်ဘၣ်တၢ်တဖၣ်အဂီၢ်န့ၣ် တၢ်ထဲသိးတုၤသိးလီၤမၢ်၀ဲဒၣ်ဒီး လၢၦၤဂ့ၢ်၀ီတၢ်ကရၢကရိစ့ၢ်ကီး ဘၣ်တူၢ်ဘၣ်၀ဲတၢ်တၤတၢ်အကလုာ်ကလုာ်န့ၣ်လီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါတၢ်မ့ၢ်က့ၤဃိထံသမံသမိးက့ၤ၀ဲန့ၣ် တၢ်တီတၢ်တြၢ်လၢအဘၣ်ထွဲ တၢ်ကရၢကရိခိၣ်နၢ်တဖၣ်အမဲာ်ညါလၢအဘၣ်ဃးဒီးၦၤဂ့ၢ်၀ီခွဲးယာ်တၢ်ကရၢကရိတဖၣ်ႇပိာ်မုၣ်ဂံၢ်ခီၣ်ထံးတၢ်ကရၢကရိတဖၣ်ကဘၣ်ပာ်ဖှိၣ်ဟံးထီၣ်ဖီၣ်ထီၣ်၀ဲဒၣ်ဒီး တၢ်သ့ၣ်တဖၣ်အံၤတၢ်ထၢဖှိၣ်မၤနီၣ်မၤဃါတၢ်ဂ့ၢ်တၢ်ကျိၤ အိၣ်၀ဲအါအါဂီၢ်ဂီၢ် အဂ့ၢ်န့ၣ်နီၢ်ထူထူ ဆဲးစံး၀ဲန့ၣ်လီၤႉ

ကညီၦၤဂ့ၢ်၀ီခွဲးယာ်ကရူၢ် -KHRG အံၤဖဲအပူၤကွံာ် ၂၀၁၂ နံၣ် တုၤလၢ ၂၀၁၈ နံၣ်အတီၢ်ပူၤ မုၣ်ခွါသွံၣ်ထံးတၢ်စုဆူၣ်ခီၣ်တကးခဲလၢာ်အိၣ်၀ဲ ၂၇ ခါပၣ်ဃုာ်၀ဲဒၣ် လံာ်တၢ်ပာ်ဖျါ ၅၂ ဘ့ၣ်အံၤ ထၢဖှိၣ်ဃာ်၀ဲအသိးႇ တၢ်စုဆူၣ်ခီၣ်တကးတဖၣ်အံၤဖဲတၢ်သဘံၣ်သဘုၣ်အတီၢ်ပူၤကဲထီၣ်တ့ၢ်အသးအၢအၢသီသီဒီး ဒ်န့ၣ်အသိးတုၤ၀ဲဒၣ်လၢ ၂၀၁၉ နံၣ်န့ၣ်မုၣ်ခွါသွံၣ်ထံးတၢ်စုဆူၣ်ခီၣ်တကးဒီး ဘၣ်ဃးဒီးလံာ်တၢ်ပာ်ဖျါတဖၣ်န့ၣ်ဆဲးဒိးန့ၢ်ဘၣ်ဒံး၀ဲအဂ့ၢ် ဖဲလါယူၤ ၁၉ သီအနံၤုံၤွ လံာ်တၢ်ပာ်ဖျါအပူၤ ပာ်ဖျါ၀ဲဒၣ်လီၤႉ

တကီၢ်ခါဆၢကတီၢ်ခဲအံၤသုးမုၢ်ဒိၣ်တဖၣ် မၤကမၣ်၀ဲမုၣ်ခွါသွံၣ်ထံးတၢ်စုဆူၣ်ခီၣ်တကးအံၤ စှၤလီၤ၀ဲဘၣ်ဆၣ်ႇ ကလုာ်ဒူၣ်ဖီၣ်စုက၀ဲၤကရူၢ်ဒီး သုးမုၢ်ဒိၣ်တဖၣ်အဘၢၣ်စၢၤ ဖီၣ်စုက၀ဲၤတၢ်သဘံၣ်သဘုၣ်ဆဲးကဲထီၣ်ဒံး၀ဲဒၣ်ဒီး တၢ်အိၣ်သးအဖီလာ်အံၤ တၢ်ဘၣ်ယိၣ်ဘၣ်ဘှီအိၣ်ဒံး၀ဲဒၣ်လီၤအဂ့ၢ်န့ၣ် KHRG စံး၀ဲဒၣ်လီၤႉ

ဘၣ်ထဲဒွီး KHRG ထုးထီၣ်၀ဲ လံာ်တၢ်ပာ်ဖျါအံၤအဖီခိၣ်ၦၤဟူးဂဲၤတၢ်လၢပိာ်မုၣ်ခွဲးယာ် လၢအမ့ၢ် ကညီပိာ်မုၣ်ကရၢ -KWO အံၤတူၢ်လိာ်သဂၢၢ်၀ဲဒၣ်ဒီး လၢအ၀ဲသ့ၣ်တပၤစ့ၢ်ကီး ၦၤလၢအဘၣ်ဒိဘၣ်ထံးတဖၣ်ဒ်သိးတၢ်တုၤသိးထဲသိးကအိၣ်အဂီၢ် ဃ့ထီၣ်၀ဲတပယူာ်ဃီစ့ၢ်ကီးန့ၣ် စံး၀ဲလီၤႉ

KWO ၦၤဂ့ၢ်၀ီမူဒါခိၣ်နီၢ်ဒါမုၣ် စံး၀ဲ “မ့မ့ၢ်ဘၣ်ဖုးပယီၤသုးအံၤမ့ၢ်မၤကမၣ်၀ဲတၢ်သ့ၣ်တဖၣ်အံၤန့ၣ်မ့ၢ်ဘှါဆှဲဟံအရ့လၢသုးကွီၢ်ဘျီၣ်န့ၣ်ၦၤလၢအဘၣ်ဒိဘၣ်ထံးတဖၣ်အဂီၢ်တမ့ၢ်လၢကန့ၢ်ဘၣ်တၢ်တုၤသိးထဲသိးဘၣ်အသိးႇ ပ၀ဲတဖၣ်စ့ၢ်ကီး ကဟံအရ့ဒ်လဲၣ်န့ၣ်ပတသ့ၣ်ညါဘၣ်ႉ တၢ်အဃိန့ၣ်ၦၤလၢအမၤကမၣ်တၢ်တဖၣ်န့ၣ် ကြၢးလၢတၢ်ကဘၣ်ဘှါဆှဲဒီးဟံအရ့ဖဲကမျၢၢ်ကွီၢ်ဘျီၣ်အရူန့ၣ်လီၤႉ မ့မၤဒ်န့ၣ်မး ပ၀ဲသ့ၣ်တဖၣ် ၦၤလၢအဘၣ်ဒိဆါတဖၣ်အဂီၢ် ကဒိးန့ၢ်ဘၣ်တၢ်တီတၢ်တြၢ်လီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ

တၢ်လၢမုၣ်ခွါသွံၣ်ထံးတၢ်စုဆူၣ်ခီၣ်တကးစံးတၢ်န့ၣ်လီၢ်က၀ီၤတၢ်သဘံၣ်သဘုၣ်တဖၣ်အပူၤပိာ်မုၣ်တဖၣ်ႇပိာ်ခွါတဖၣ်ႇပိာ်မုၣ်ဖိသၣ်တဖၣ်အဖီခိၣ်မုၣ်ခွါသွံၣ်ထံးတၢ်မၤဆူၣ်မၤဆိးႇသွံၣ်ထံးကုၢ်ႇ တၢ်မၢဆူၣ်လၢကဟုးသး၀ဲအဂီၢ်ႇ တၢ်မၢဆူၣ်လၢကမၤဟးဂီၤဟုးသးႇ တၢ်ဖျီဆူၣ်တၢ်ႇ ဒ်သိးစၢၤသွဲၣ်သုတအိၣ်ဘၣ်အဂီၢ်မၢဆူၣ်မၢဆိး၀ဲဒီး ကယဲၢ်မ့ၢ်မုၣ်ခွါသွံၣ်ထံးတၢ်စုဆူၣ်ခီၣ်တကးခဲလၢာ်န့ၣ်ပၣ်ဃုာ်၀ဲဒၣ်ဒီးတၢ်မၤကမၣ်န့ၣ်လီၤႉ